လက်ဖ၀ါးပြင်ထက်က ကမ္ဘာ (သို့)ဖက်တီးလေး နှင့် သူ၏မိတ်ဆွေများ (၀မ်ပေါင်လဲ့) book 1

721 - 725

လက်ဖဝါးပြင်ထက်က ကမ္ဘာ
မူရင်းစာရေးဆရာ - Ergen

အခန်း (၇၂၁) - ယိုရန်၏ ပုံသဏ္ဍာန်အစစ်အမှန်

ဝိညာဉ်သုံးခု၏ တေးသီဆိုသံများ မိုးကောင်းကင်ထဲ၌ ပဲ့တင်ထပ်သွားကြသောအခါ ကောင်းကင်ယံကြီးမှာ မှောင်မိုက်သွားပြီး အနက်ရောင်လေပြင်းများ စတင်တိုက်ခတ်လာ၏။ သို့ဖြစ်ရာ အမှောင်အဆောင်ပစ္စည်း၏ စွမ်းအားများကြောင့် မြေကြီးအပေါ်သို့ ထိုးထွက်လာကြသည့် အနက်ရောင်မီးခိုးငွေ့များမှာ အရပ်မျက်နှာအနှံ့သို့ ပို၍ပင် မြန်ဆန်စွာ ပျံ့နှံ့သွားတော့သည်။ သို့ဖြစ်ရာ ထိုတိုက်ပွဲကြီးအား စောင့်ကြည့်နေကြသည့် လူတိုင်းမှာ ဝမ်ပေါင်လဲ့၏ ပတ်ပတ်လည်ရှိ ကောင်းကင်ယံကြီး အနက်ရောင်မီးခိုးများဖြင့် ပြည့်နှက်နေသော ပင်လယ်ကြီးတစ်စင်းအဖြစ်သို့ ပြောင်းလဲသွားသည်ကို မြင်လိုက်ရသည်။

ထို မီးခိုးငွေ့ပင်လယ်ကြီးမှာ ‌မြေပြင်နှင့် မိုးကောင်းကင် နှစ်ခုစလုံးကို လွှမ်းခြုံထားသောကြောင့် အင်္ဂါဂြိုဟ်ကြီးမှာ ယခင်တုန်းက ပုံစံနနှင့် လုံးဝမတူတော့ပေ။ ထိုအချိန်တွင် ဝမ်ပေါင်လဲ့၏ ခန္ဓာကိုယ်ပေါ်ရှိ အမှောင်မီးတောက်များမှာ ဝင်းလက်တောက်ပလာ၏။ ထို အေးစက်စက် အပြာရောင် မီးတောက်များထဲတွင် စကြဝ‌ဠာကြီး၏ ဥပဒေသများ ကိန်းအောင်းနေသကဲ့သို့ပင်။

၎င်းတို့ကြောင့် အမှောင်ပင်လယ်ကြီးမှာ ၎င်း၏ စွမ်းအားများကို နောက်ထပ်တစ်ကြိမ် ထပ်၍ ထုတ်လွှတ်လိုက်ပြန်သည်။ ထို့ကြောင့် ဝိညာဉ်စွမ်းအင်လှိုင်းများမှာ တားဆီး၍ မရနိုင်သော အမြန်နှုန်းမျိုးဖြင့် တာအိုဘုန်းတော်ကြီးယိုရန်ဆီသို့ ထိုးထွက်လာကြပြီး သူ့အား လွှမ်းခြုံသွားတော့မည့်ပုံပင်။

နေရာအနှံ့တွင် ကြောက်မက်ဖွယ်ရာကောင်းသော မိုးခြိမ်းသံများဖြင့် ပြည့်နှက်နေ၏။

တာအိုဘုန်းတော်ကြီးယိုရန်မှာ အမှောင်ပင်လယ်ကြီးဆီမှ ထွက်ပြေးလွတ်မြောက်နိုင်ရန် အစွမ်းကုန် ကြိုးစားလိုက်ပါသော်လည်း အချည်းနှီးပင်။ ထို့ကြောင့် သူသည် ကြောက်ရွံ့တုန်လှုပ်ကာ မျှော်လင့်ချက်များ ပျက်သုဉ်းသွားရပြီဖြစ်သည်။ နောက်ဆုံးတွင် သူသည် အသံကုန် အော်ဟစ်လိုက်ပြီးနောက် အပြင်းအထန် ကြိုးစားရုန်းကန်ကာ တုံ့ပြန်တိုက်ခိုက်ရန် ပြင်လိုက်တော့သည်။