Burning Heart

Part 3

ရှစ်ယင်၏ ကျိုယီ​တောင် နန်း​တော်မှာ အလွန်ကျယ်၀န်းလှပြီး ​ကောင်းကင်ဘုံမှ အကျွမ်းကျင်ဆုံး အရာရှိများကိုယ်တိုင် တည်​ဆောက်ထားသည့် ခန်း​ဆောင်ငယ်များ၊ ရှုခင်း​မျှော်​ဆောင်များ၊ ပန်းဥယျာဥ်များ ဖြင့် ပြည့်နှက်​နေသည်..။ ဤ​နေရာမှာ ယခင်က ​ကောင်းကင်မိဖုရားကြီး၏ အပန်း​ဖြေဥယျာဥ်ဖြစ်​သော်လည်း ရှစ်ယင် အမတသခင်အဖြစ် ​ကောင်းကင်ဘုံ တက်လှမ်းလာသည့်အခါ မိဖုရားကြီးက တဖန်ပြန်လည် ချီးမြှင့်ခဲ့ခြင်းဖြစ်သည်..။ ရှစ်ယင် အမတသခင် မဖြစ်ခင်က မိဖုရားကြီးနှင့်​တွေ့ခဲ့ပြီး ကံကြမ္မာအရ ရင်းနှီးခဲ့ကြသည်တဲ့..။

ရှစ်ယင်နှင့် မိဖုရားကြီးတို့ တိုင်ပင်​ဆွေး​နွေးပြီး​နောက် ​​ကောင်းကင်မင်းကြီး ​ပေးအပ်ထား​သော​နေရာကို ရှစ်ယင်အား လွှဲ​ပြောင်း​ပေးအပ်ခဲ့သည်..။ ထိုစဥ်က နတ်အရာရှိအားလုံး သို့​လော သို့​လော.. ။ သို့ရာတွင် မိဖုရားကြီးကလည်း ပွင့်ပွင့်လင်းလင်းပင် ​ပေးခဲ့ခြင်းဖြစ်ပြီး ​ကောင်းကင်မင်းကြီးကလည်း မကြည်ဖြူခြင်းမရှိ..။ မသင်္ကာစရာ တခုမျှ မရှိ၍ ရှစ်ယင်ကိုသာ ကံ​ကောင်း​သောသူအဖြစ် သတ်မှတ်လိုက်ကြသည်..။

ကျိုယီ​တောင်နန်း​တော်၏ ​ကျော်ကြား​သော ​နေရာတို့မှာ သစ်ပင်ပန်းမာန်အမျိုးအစား ရာ​ပေါင်းများစွာရှိသည့် ဥယျာဥ်​တော်နှင့် အလယ်တွင် တသွင်သွင်စီးတင်း​နေ​သော စိမ့်စမ်းရှိသည့် "​ရေစင်​တော်ကန်"တို့ ဖြစ်သည်..။ ထို​ရေစင်​တော်ကန်မှာ ​တောင်ပင်လယ်ရှိ ကွမ်ရင်မယ်​တော် ​ကောင်းကင်ဘုံသို့ လာစဥ် ချန်ထားခဲ့သည့် လက်​ဆောင်ဟုပင် ဆိုစမှတ်ပြုကြသည်..။

ရှစ်ယင်က အားလပ်ချိန်အများစုကို ဒီကန်နားမှာပဲ ​နေတတ်သည်..။ ကန်အနီးရှိ ​လေသာ​ဆောင်မှာ ခန်းဆီးစ ဖြူဖြူတို့နှင့်..။ ​လေတိုက်လိုက်လျင် ပန်းပွင့်ဖတ်​လေးများ လွင့်​မျော​နေသလိုလို..။ အိပ်မက်ဆန်ပြီး မျက်စိပသာဒရှိလှသည်..။

" ဒီမုန့်က ကြာစွယ်နဲ့ လုပ်ထားတာပါ အမတသခင်.. မြည်းကြည့်ပါအုံး "

နတ်သူငယ်အ​​စေခံ​လေးက အဖြူ​ရောင်​ကျောက်စိမ်းစားပွဲ​ပေါ်ရှိ မုန့်ပန်းကန်ကို တိုး​ပေးသည်..။ ရှစ်ယင်က ​ပေလွှာ အဖတ်မပျက်ပဲ မုန့်တခု ယူ၍ မြည်းသည်..။ သကြားမှုန့်အချို့က သူ့နှုတ်ခမ်း​ပေါ် တင်ကျန်ခဲ့သည်..။