Burning Heart

Part 15

လှည်းက တချက်​ဆောင့်သွားစဥ် ၀မ်ရိ​ပေါ်က ​မေးလိုက်သည်..။

"ကိုယ်​ပြောတဲ့ ဘိုး​ဘေးကို မင်းမှတ်မိလား"

ရှစ်ယင်က ​ခေါင်းယမ်းလိုက်သည်..။

"ကျွန်​တော် လူ့ဘ၀မှာတုန်းက အဲ့ဒီအဖြစ်အပျက် ဖြစ်ခဲ့တာ ဖြစ်မယ်"

"စာအုပ်ကို ​ရေးတဲ့ ဘိုး​​ဘေးက သူ​သေသာသွားတယ်.. အဲ့ဒီ အဖြူ​ရောင်၀တ်စုံနဲ့ သူ​တော်စင်ကို မ​မေ့ဘူး.. သူ့အတွက်​တော့ ​မေ့မရတဲ့ အတိတ်ပဲ"

ရှစ်ယင်၏ နှလုံးသားက ​အေးခဲသွားသည်..။ သူ ဘယ်အရာကိုမှ ​ကောင်း​ကောင်း မမှတ်မိ..။ သူ့အတွက်​တော့ များစွာ​သော လူတို့မှာ လမ်း​ပေါ်က ဖြတ်သွားဖြတ်လာ​တွေလို..။ သို့ရာတွင် အမှတ်တမဲ့ ပြုလုပ်လိုက်​သော အပြုအမူတခု ၊ လမ်းကြုံ​ပေးလိုက်​သော အကူအညီတခုတို့သည်လည်း မျိုးဆက်တဆက်ပြီး တဆက်တိုင်​အောင် စွဲထင်ကျန်​စေခဲ့သည်ပင်..။

သူက လျှိုရှန်းယွိနှင့် ဆုံခဲ့​သော ​နေ့ကို ပြန်စဥ်းစားမိသည်..။ ကြီးမားလှ​သော သူ့ပုံတူရုပ်ထု​အောက်တွင် ငို​ကြွေးလျက် မျက်လုံးဖွင့်ကြည့်လှည့်ပါ သူ့ကို ကိုးကွယ်တဲ့ ကမ္ဘာကို ငဲ့ကြည့်လှည့်ပါဟု ​တောင်းပန်​နေသူ..။ ရှစ်ယင် နှလုံးသားထဲတွင် ရှက်ရွံ့မှုတို့ကို ခံစားလိုက်ရသည်..။

၀မ်ရိ​ပေါ်က သူမူမမှန်တာကို သတိထားမိသွားသည်..။

"ရှစ်ယင်.. ဘာ​တွေစဥ်းစား​နေတာလဲ"

"ကျွန်​တော် ဘာ့​ကြောင့်လဲဆိုတာ နားမလည်နိုင်ဘူး"

သူက ဒီ့ထက်ပိုမရှင်းပြ.. သို့​သော် ၀မ်ရိ​ပေါ်က နားလည်ပုံရသည်..။ သူပြန်​မေး​သောအခါ သူ့အသံက နက်ရှိုင်းလျက်..။ ရှစ်ယင်အ​နေဖြင့် ​ကောင်းကင်ဘုံ၏ နာမည်​ကျော်ကြား​သော စစ်နတ်ဘုရားထံမှ တ​နေ့ ဒီလို ​မေးခံရမည်ဟု မ​မျှော်လင့်ဖူး..။

"လူ​တွေ မင်းကို ဘာ​ကြောင့် ချစ်ကြ မြတ်နိုးကြ ကိုးကွယ်ကြသလဲဆိုတာ နားမလည်နိုင်တာလား"

၀မ်ရိ​ပေါ်၏ အမူအရာမှာ အရင်အတိုင်း ​အေးစက်စက်..။ သို့ရာတွင် သူ့မျက်၀န်းများမှာ ​ရေခဲစိုင်တို့ အရည်​ပျော်လာသလို..။ ရှစ်ယင်ကို ကြည့်​နေပုံမှာ နှင်းကန္တာရထဲမှ ​ပျောက်ဆုံး​နေ​သော ​ရေပူစမ်းက​လေးလို..။ သူ၏ ​အေးခဲ​နေ​သော နှလုံးသားထဲမှာ ရှစ်ယင်သည်သာ တခုထဲ​သော အ​နွေးဓါတ်က​လေးလို..။