ساعات سليمه

السابع والثلاثون

ساعات سَــــليـمـه

رِيحانــه الشيــخ

شلونك يبو طول الحلو
يالماعرفت شلوني
غطيّت وجهي بموتتك
ما اريد اصدگ عيوني
تمنيت دكتورك يجي
ويگلي هذا صوابك
اتغرب ارهنلك گلب
اتبهذل اتعب انطلب 
كلها اهون من ترابك

بدينا ريحاناتي 🌱

=========================

سلمى

ممَنون مِنك حيّل يـا متعّب الحِيل
يـا مگصّر الضّحكات ومَطوّل الليّل

جاوبت نورس بالگوه..

نورس: شلونج سلمى شلون وضعچ اخبارچ

سلمى: الحمدلله داگه صاير شي ؟

نورس: اي صاير وبالكوه گدرت اخابرچ ادري بيج تعبانه البارحة دگت عليه مهج ساعة عشرة ونص حتى زوجي انصدم گتله خل اروحلها ورحت البنية كلش مريضة ومتعبها هالحمل خو ما صاير بيناتهم شي؟

سلمى: انه ببيتي وما ادري

نورس: اكلج ترى مهج ما الها احد وبس ولد خالها اذا تكدرين تحاچينه هالايام يبقى يمها يداريها ترى البنية حيل تعبانه
وتتمنى تتطلگ منه بس شتسوي
حتى خايفة كلش ما ادري شبيها

سلمى: ان شاء الله احاچي مايصير خاطرها إلا طيب والله انه ماعندي شي وياها وتعرفين شكد احبها بس ما اعرف شكو بيناتهم حتى هشكل علاقتهم

نورس : شبيج فحطانه جنتي تشتغلين ؟

سلمى: لا والله تعبانه حيل جسمي مكسّر ومحد يمي

نورس : اجيج ؟

سلمى: لا يا حبيبتي عليمن مابيّه شي ببيتي ماعندي شي

نورس: والله اجيج ماعندي شي انه

سلمى: لا حبيبتي اذا اريد اگلچ والله

سلمت عليه وسدته..
دزيتله رسالة
" مهج تعبانه ومريضة وحامل ، اذا صار بيها شي لو بالطفل مستحيل تسامحك لو تسامحني على اعتبار انه ورطّتها بيك اذا تسمح تترك اشغالك والدولة وتتفرغ لمهج لان مالها ذنب تعذبها هيچ
جرّبت تعذيبك وذلتك وعرفت شنو قصدك من تگلي مهج خايفة منك ، البنية هذا اول زواج الها وتوقعت انك انسان متفهم وواعي وتوفق بيني وبينها "
ماتوقعت تنهان وتنذل بس لان هي مو سلمى
ارجوك لخاطر الحب الچذب العيشتني بيه ولخاطر فضة والكرار واخوهم الي يتمنونه
دير بالك عليها وعلى ابنك