Daomu Biji (Myanmar Translation)

6

#Unicode
အခန်း(၆)
အလောင်းပစ်တဲ့မြေနေရာ
<<<<<

ငါတို့တွေလှေကို ရပ်လိုက်ကြတယ်။ ဒါက ရေအောက်ဥမင်တစ်ခုလုံးမှာ အန္တရာယ်အကြီးဆုံးနေရာဖြစ်နိုင်တာကြောင့် မပြင်ဆင်ရသေးဘဲ ပြေးဝင်သွားလို့ မရဘူးလေ။ ဦးလေးသုံးက သူ့လက်ပတ်နာရီကိုကြည့်ပြီး ပြောလိုက်တယ်။
"ဒီ အလောင်းဥမင်က အဝင်လွယ်ပေမဲ့ အထွက်ခက်တဲ့နေရာမျိုးပဲ... ငါ သင်္ချိုင်းဖောက်သူခိုးလုပ်ခဲ့တာ နှစ်ပေါင်းများစွာကြာနေပြီဆိုပေမဲ့ အခုမှ ဒီလိုနေရာမျိုးကို ပထမဆုံးဝင်ဖူးတာပဲ... ဒီဥမင်ထဲမှာ အတော်ကြီးထူးဆန်းတဲ့ အရာတစ်ခုရှိနေလောက်တယ်လို့ ငါထင်မိတယ်!"

ဖန်ကျစ်က အသံတိုးတိုးကဖြတ်ပြောလိုက်တယ်။
"လခွမ်းလိုပဲ... အဲ့ဒါတွေမပြောပဲ ဝင်လည်းရပါတယ်ဟ.."

ဦးလေးသုံးက သူ့ကိုမျက်စောင်းထိုးလိုက်ပြီး ဆက်ပြောလိုက်တယ်။
"ဒါပေမဲ့ ငါတို့ကြားခဲ့သမျှက လူအိုကြီးဘက်ကပြောတဲ့ ဇာတ်လမ်းတွေပဲ... ဒီဥမင်က လှေသမားတစ်ယောက်ပဲဝင်လို့ရတာ ဟုတ်မဟုတ် ငါတို့မသိကြဘူး... ဒီဥမင်ကသာ တကယ်ကြီး အလောင်းဥမင်ဖြစ်နေခဲ့ရင်...."
သူ ဖိပြောလိုက်တယ်။
"အရှေ့မှာ အန္တရာယ်တွေရှိနေမှာပဲ...ငါတို့ဘာတွေကြုံတွေ့ရမှာလဲဆိုတာ ငါတို့ကိုယ်တိုင်လည်းမသိကြဘူး... လှေကဘယ်ကို ဆက်သွားနေလဲဆိုတာ မသိတာကြောင့် ဒါက တစ္ဆေနံရံကိုဝင်တိုးတဲ့(1) အခြေအနေမျိုးလည်း ဖြစ်နေနိုင်တယ်... ဒါမှမဟုတ် ရေသရဲတွေ ရာကျော်က ငါတို့လှေကို ပြောင်းပြန်လှန်လိုက်မှာလည်း ဖြစ်နိုင်တာပဲ..."

တကွေ့က ပင့်သက်ရှိုက်မိသွားတယ်။
"မဖြစ်နိုင်တာ...."

"အတိုချုံးပြောရရင် ဘာမဆိုဖြစ်သွားနိုင်တယ်... ငါတို့တွေ သင်္ချိုင်းထဲမရောက်သေးတာတောင် အန္တရာယ်တွေအများကြီးနဲ့ ရင်ဆိုင်ခဲ့ရတာက တကယ့်ကိုကံဆိုးခဲ့တာပဲ... ဒါပေမဲ့ သင်္ချိုင်းဖောက်မယ်ဆိုမှတော့ သရဲတစ္ဆေတွေကို ကြောက်နေလို့တော့မဖြစ်ဘူးလေ.. သရဲတစ္ဆေကြောက်နေရင် သင်္ချိုင်းဖောက်သူခိုးမဖြစ်လာနိုင်ဘူး... ငါတို့တွေက ဒီလိုအလုပ်ကိုလုပ်နေတယ်ဆိုမှတော့ ထူးဆန်းတဲ့ဖြစ်ရပ်တွေ မကြုံရဘူးဆိုတာကမှ အဓိပ္ပါယ်မရှိတာပဲ..."
ဦးလေးသုံးက ဖန်ကျစ်ကို သူ့အိတ်ထဲကနေ နှစ်လုံးပြူးသေနတ်ကိုထုတ်ခိုင်းလိုက်တယ်။
"ဒါပေမဲ့ အခု ငါတို့လက်ထဲမှာ အရင်ခေတ်တုန်းက သုံးခဲ့တဲ့ ပစ္စည်းပစ္စယတွေထက် ပိုပြီးအသုံးဝင်သလို တစ်ပန်းသာနေတဲ့ နည်းပညာမြင့်လက်နက်တွေရှိနေတယ်... ဒီနေရာမှာ ရေသရဲတွေ တကယ်ရှိနေတယ် ဆိုရင်တောင်မှ ဒါတွေရှိနေရင် သူတို့အတွက် ကံဆိုးတာပဲ!"