သူ ဘယ်သူလဲ

အခန်း ၂၁

သူ ဘယ်သူလဲ?

ဘာသာပြန် - Zeus

စာစဉ် (၃)

အခန်း(၂၁) မင်းကို လက်ဆောင်ပစ္စည်းလေးတခု ပေးလိုက်မယ်

“ဆရာကြီး လီချန်ချင်း ရောက်နေတာလား” ယန်ပါးထောင်၏ မျက်ဝန်းများသည် အရောင်တောက်သွားခဲ့လေသည်။သူက ဒီရက်ပိုင်းတွင် လီချန်ချင်းများ ရောက်လာလိမ့်မလားဆိုတဲ့ မျှော်လင့်ချက်နဲ့ အစစအရာရာကို တခါတည်း ပြင်ဆင်ထားခဲ့လေသည်။

သူက မဟာအကြီးအကဲအမိန့်ပြားကို လီချန်ချင်းထံ ပေးထားသည့်တိုင် လီချန်ချင်းမှ တခါမှ ရောက်မလာခဲ့သောကြောင့် သူ၏ မျှော်လင့်ချက်များကုန်ဆုံးသွားခဲ့ရတော့လေသည်။

သူက အချိန်တခဏကြာအောင် စောင့်ဆိုင်းပြီးမှသာ ယန်ယွီရှစ်နှင့်အတူတူ တခုခုကို အကြောင်းပြပြီးနောက် လီချန်ချင်းထံသို့ သွားရောက်လည်ပတ်ရန်အတွက် စီစဉ်ထားခဲ့သည်။

ယနေ့လိုမျိုး လီချန်ချင်းကိုယ်တိုင် ရောက်လာမယ်လို့ ဘယ်သူက ထင်မိမှာလဲ

လီချန်ချင်းလို ပုဂ္ဂိုလ်မျိုးမှာ သူတို့လို သေးနုတ်သော ယန်မိသားစုနှင့် အဆက်ဆံမလုပ်ချင်မှာကို စိုးရိမ်နေခဲ့မိသည်လေ။

ယခုအခြေအနေအရတော့ မျှော်လင့်ချက်ရှိသည့်ပုံပင်။

ယန်မိသားစုသာ လီချန်ချင်း၏ ထောက်ပံ့မှုကို ရရှိပါက ဒီချန်ထင်မြို့တွင် ယန်မိသားစုမှာ နံပတ်တစ် ဩဇာအာဏာအကြီးမားဆုံးသော မိသားစုတစု ဖြစ်လာမည်ကို ယန်ပါးထောင်က ယုံကြည်မှု ရှိလေသည်။

ကံကောင်းလျှင် သူတို့မိသားစုသည် မင်ဟုန်ခရိုင်တွင် ခြေကုပ်ရယူနိုင်လိမ့်ဦးမည်။

“ဆရာကြီး လီချန်ချင်းက အခု ဘယ်နေရာမှာလဲ” ယန်ပါးထောင်သည် မိမိကိုယ်ကို သပ်သပ်ရပ်ရပ်ဖြစ်အောင် ပြုပြင်ရင်း မေးလိုက်ခြင်း ဖြစ်ပါသည်။