သူ ဘယ်သူလဲ

အခန်း ၃

သူ ဘယ်သူလဲ

ဘာသာပြန် - Zeus

အခန်း(၃) ယန်သခင်လေး

ပန်းပုထုရန်အတွက် ပစ္စည်းများစွာ လိုအပ်ပေသည်။ ဆောက်၊တူ၊ဓားပြား၊ပုဆိန်၊လွှ စသဖြင့် ရှိပေသည်။

ပုဆိန်နှင့် လွှများမှာမူ ဝယ်ယူရန် လွယ်သည့်တိုင် သူလိုအပ်သော အခြားပစ္စည်းများမှာမူ ဤကမ္ဘာတွင် ရှိမနေခဲ့ချေ။

ထို့ကြောင့် ပန်းပဲဖိုသို့ ရောက်သောအခါ လီချန်ချင်းသည် လိုအပ်သည့်ပစ္စည်းများ၏ ပုံတူကို ‌အသေးစိတ်‌ရေးဆွဲပြပြီးနောက် ပန်းပဲဆရာကို ထုလုပ်ခိုင်းရတော့လေသည်။

လီချန်ချင်းတယောက် ထိုထူးဆန်းသည့် ပစ္စည်းများကို ဘာလို့ လိုချင်တာလဲဆိုတာကို ပန်းပဲဆရာက နားမလည်သော်လည်း ငွေစငါးစကို လီချန်ချင်းက ပေးလိုက်သောအခါတွင် ပစ္စည်းများကို သုံးရက်အတွင်း ရစေရမည်ဟု ပြုံးပြုံးရွှင်ရွှင်နှင့် ကတိပြုခဲ့လေတော့သည်။

ထို့နောက်တွင် လီချန်ချင်းသည် သစ်သားများကို စတင်၍ ‌ရွေးချယ်တော့လေသည်။

ပန်းပုထုရန်အတွက် မှန်ကန်သော သစ်သားများကို ရွေးချယ်ရန်မှာလည်း လွန်စွာ အရေးကြီးလှပေသည်။

အလွန်မာကျောသော သစ်သားများသည်လည်း ပန်းပုထုရန်အတွက် အဆင်မပြေပေ။ထို့အတူ အလွန်းပျော့ပျောင်းသော သစ်သားများသည်လည်း အဆင်မပြေပြန်ချေ။လီချန်ချင်း၏ အရင်ဘဝတုန်းက ဟွမ်ဟွာလီနှင့် ကျိထန် သစ်သားအမျိုးအစားမျိုးကို အများဆုံး အသုံးပြုခဲ့လေသည်။သို့သော် ဤလောကတွင်တော့ ထိုကဲ့သို့သော သစ်သားမျိုးကို ရှာဖွေရန် ခက်ခဲပေလိမ့်မည်။

ရက်နည်းနည်းကြာသည်အထိ လီချန်ချင်းသည် မြို့အတွင်းရှိ သစ်ဆိုင်များစွာတို့ထံ သွားကာ သူ့အတွက် သင့်တော်မည့် သစ်သားကို သွားရောက်ရှာဖွေခဲ့လေသည်။နောက်ဆုံးတွင် ခရမ်းရောင်ကတ္တပါဟူသော သစ်သားမျိုးကို ရွေးချယ်ခဲ့တော့လေသည်။ထိုသစ်သားများမှာ နှင်းဆီသစ်သားနှင့် ဆင်တူသောကြောင့် သူ့အတွက် ပန်းပဲထုလုပ်ရာ၌ အသုံးဝင်လိမ့်မည်ဟု လီချန်ချင်းက ထင်မြင်ခဲ့လေ၏။