يـامـيان عـيوني ويـاثرى قـلبي

Part : 3

بــيــت ال هــاشــم
دخلت البيت بعد مافتحت لها الخادمه وسألتها عن ماسه وردت عليها بانها فوق وصعدت اول الدرج ووقفت عند اول درجه تنتبه لنزوله واردفت ميان بحده : جعله مايتم
تركي صد بنظره وكمل نزوله يرد عليها : بيتم طرق عن خشوم
ميان ناظرت نزوله وتعديه عنها وصده وهزت راسها بايه بسخريه : اذا فيه خشوم!
تركي اخذ نفس بغضب وتجاهلها يطلع من البيت لمجلس الرجال الخارجي يشوف التجهيزات ويكون عند استقبالهم مع جموع عائلته من كبيرهم لصغيرهم، اما ميان ف راحت فوق عند صاحبتها واول مادخلت شالت غطاها وشافتها جالسه عند المرايه ومسك تسوي شعرها، ماسكه مناديل بيدها ومنزله راسها والواضح انها كانت تبكي، تقدمت لها بلهفه : ماسي!!
مسك بعدت لورا تسمح لماسه الي رفعت راسها بلهفه وحزن واضح على ملامح وجهها بانها تقوم وتفتح يدينها لميان الي توجهت تضمها بقوه وبهمس : انتِ اقوى ياامي انتِ اقوى من كذا تكفين لاتهدين حيلي!
ماسه تنفست بهدوء تمسك بكاها : الحمدلله على كل حال
ميان هزت راسها بايه: اجلسي كملي كشختك اجلسي، كملت مسك تسوي شعرها وبعتب نطقت : اقول لها بسوي لك تسريحه خفيفه لكن ماهي راضيه تبيه ساده
ميان يتمعن لملامح وجهها : خليه مثل ماتبي
ماسه هزت راسها بايه: وميك اب خفيف مارح اكثّر ومارح ابين اني راضيه ابدًا!
ميان هزت راسها بالنفي ونزلت لمستواها ومسكت يدينها تناظر بعيونها الباكية : لاتبينين انك انتِ مغصوبة على هذا الشي..خلك قويه وكملي! بيني له انك اقوى وان لك رأي بهذا الشي
ماسه هزت راسها بالنفي تتنفس بعمق : ميان هذي شخصيتك انتِ مو انا! انا غير وبتعامل بنفس شخصيتي انا مابي اتناقض وانا عارفه نفسي بيوضح علي!
ميان تنهدت : الي يريحك ياامي الي يريحك بس بكل الحالات لاتضعفين ولا تبكين قدامه لايشوف دموعك!
ماسه هزت راسها بايه ووجهت انظارها للمرايه تشوف انعكاسها ووجهها المايل للاحمرار اثار البكي وبعد ماخلصت اختها شعرها ستريت وخلته على راحته وبدت تحط لها ميك اب خفيف جدًا يبرز ملامحها ولا يزيد شي..لبست فستانها الناعم باللون الوردي الفاتح واكسسوارتها وبعد ماانتهت طلعت من غرفة ملابسها ووقفت تناظرهم ويناظرونها بانبهار
مريم توجهت لها تضمها : بسم الله عليك!الله يحفظك تهبلين،  ردت ماسه بابتسامه باهته وضمتها، لفت على ميان الي ابتسمت وتوجهت لها تضمها : طول عمرك حلوه لاضاف عليك هذا شي ولا نقص منك شي
ماسه ردت لها الابتسامه والضمه وهزت راسها بايه ردًا لكلامها

————————

موكب سيارات ورا بعض وعلم بحجم متوسط عليه شعار السيفين معلق بكل سياراتهم من ورا..عائلة ال سياف تأكد حضورهم للحي ووقفوا جمب بعض في موقف السيارات المخصوص لبيت الهاشم ونزلوا من السيارات على شكل جموع ودخلوا كل ثلاث وكل اثنيين مع بعض والي يميزهم واحد حاط البشت على يدينه ويمشي بكل هيبه ووقار وهذا دليل انه هو المعرس " سلطان بن عبدالله ال سياف "
ورحب تركي ورجاله بهم وقلطهم المجلس
وهذا كله تحت انظار البنات الي يناظرونهم من الشباك
ووسط ذهول مسك الي نطقت : الي عنده البشت هذا هو ؟
مريم هزت راسها بايه
مسك همست لاختها : حسبي الله عليهم! يخوف طويل وعريض
مريم اشرت لها بالسكوت : لاتسمعك الحين ترجع تبكي
مسك بتردد وبنفس همسها : حرام مريم حرام هي وين وهو وين !! شايفه شلون حجمه
مريم حطت يدها على فم اختها : اسكتي!! وش تبين نسوي يعني!! نكنسلها !!
مسك تنهدت ولفت تشوف اختها الي جالسه على الكنبه وحاطه يدينها على وجهها وجمبها ميان الي تحاول انها تخفف عنها
مريم رفعت صوتها تخاطب ماسه : وصلوا تجهزي باي وقت بيجيب اخوك الكتاب توقعينه
ماسه رفعت راسها بتردد وعيونها تغرق، ترفع راسها لفوق تاخذ نفس وتزفره، تهدي نفسها قد ماتقدر ولفت لميان الي انطقت بحده : ان ماوقعت على وجه تريكي!
ماسه مسكت يدينها : لا ميان لا! اهجدي هالمره مابي مشاكل معاه تكفين
ميان صدت وهزت راسها بايه
———-

القى الشيخ افتتاحية الخطبة بالنصيحة على الزواج وانه احصن للنفس، اخذ فتره قصيره يستفتح بالصلاة على النبي ووجه كلامه ل تركي : قول ياولدي..زوجتك موكلتي ماسه
تركي هز راسه بالاستجابه ورفع نظره لسلطان الي جالس على يمين الشيخ يردد : زوجتك موكلتي ماسه
الشيخ : على سنة الله ورسوله
تركي : على سنة الله ورسوله
الشيخ : وعلى المهر المتفق بيننا
تركي : وعلى المهر المتفق بيننا
الشيخ لف لسلطان الجالس جمبه : رد ياولدي.. وانا قبلت
سلطان تنهد في داخل نفسه ثم نطق يناظر تركي: وانا قبلت
الشيخ ابتسم : بارك الله فيكما وبارك عليكما
وتعالت اصوات الجموع بالتباريك وفزوا يسلمون وسط زغاريط الحريم المسموعه داخل من اهل ماسه..وبعد فتره تعتبر طويله رجع تركي وبيده الكتاب الي موقعه عليه ماسه جمب اسم سلطان والواضح قطرة الدمعه جمب توقيعها لكن هذا الشي تجاهله تركي وماانتبه له الشيخ
وبعد ربع ساعة بالضبط رفع صوته تركي يرحب بالضيوف بشكل عام وبأهل ال سياف بشكل خاص وقلطهم على الذبايح الجاهزه والصحون الموجوده في الساحة الخارجية..ماهي الا ساعتين تعشوا الجموع ووقفوا يغسلون بالعود وسط توجيهات تركي الي مازال يرحب فيهم من صغيرهم لكبيرهم لحد مااختفت سيارات ال سياف من عند بيتهم ماعدا سيارة وحده لوحتها معروفه..طلع تركي من المجلس الخارجي بعد ماقال لسلطان ينتظر عشان يشوف اخته ويجلس معها وماكان من سلطان الا انه هز راسه باستجابة وفي هذي الفتره انشغل سلطان بمكالمات جواله الي اشغلته طول اليوم لكن كان يتجاهلها

————————-

في الغرفة واقفه تناظر الصناديق ولوح الاطقم الي جابوها والي ماليه غرفتها ومنحوت عليهم اسمها واسمه وطقم يعتبر ماهو قليل مكتوب عليه اسم العائلتين والواضح انه اهداء من الام والاب وماكان ايّ شعور طاغي عليها الان كثر الرهبه والتوتر الي محتلها ورجفت يدينها الي تحاول انها تخبيها وماتبينها توجهت جمب اختها من عرفت ان فيه شوفه وجلسه معاه وماكان منها الا الصدمه مسكت يد اختها بترجي : تكفين مريم مابي اشوفه مابي تكفين قولي لاخوك
مريم مسحت على ملامح اختها بحنيه : لازم ياماسه لازم وش تبيني اقول له ؟
ماسه خلخلت اصابعها وسط شعرها ترجعه للخلف وزفرت : كل شي مو براضي كل شي غصب كل شي!! وين ميان؟
مريم بانفعال : وش تبين بميان ! خلاص خلي كل شي يعدي على خير ياماسه
ماسه هزت راسها بالنفي: اسأل عنها بس لو ابي اسوي شي سويته من زمان مو الحين بعد مافات الفوت!
مسك تنهدت : نزلت تجيب ايبادها والشاحن من السيارة
ماسه : تأففت..وانقطع صوتها من انطق الباب وبصوت جهوري : ماسه جاهزه؟
ماسه بتوتر : تركي مابي مابي
تركي تنهد : الرجال قاعد ينتظر تحت وش اقول له يعني؟
ماسه : قول له تعبانه قول له مريضه مافيها حيل ايّ شي!
تركي هز راسه بالنفي: اطلعي الحين اشوف
ماسه : تركي!!
تركي بحده : بلا تركي بلا هم وش بيصير وجهي قدامه وانا ناطعه صار لي ساعة بالمجلس اطلعي الحين يلا لاتخلينه ينتظر اكثر من كذا !!، ردت عليه بنبرة باكيه تهزه : تركي تكفى ياخوي تكفى مابي
تركي اخذت نفس وزفره من توترها ومن خوفها يالي كان واضح من نبرة صوتها لكن ماكان منه الرد الا بالهدوء : مارح اخليك تطولين معاه بخليكم ربع ساعة او عشر دقايق بالكثير واجيك وعد مني يلا تعالي
ماسه تنهدت وتقدمت تفتح الباب وتناظره بخوف لثواني..مد يده خلف ظهرها بحنية يمشيها معه ونزلوا متوجهين للمجلس الخارجي..وقف عن الباب واشر لها تدخل