جالسه بينهم تسمع سوالفهم وتبتسم لنظراتهم..فتحت محادثة ميان الي ارسلت من فتره وماشافت الرساله واخر ظهورها كان قبل ساعات..استغربت وحست بشي غريب لكن سرعان ماداهموا شرودها لما سمعت منادة باسمها ورفعت راسها تدور مصدر الصوت وابتسمت تلقائيًا : سمي
ام عبدالله ( مرت عم سلطان ) : شخبارك حبيبتي ؟ عسى امورك زينه؟
هزت ماسه راسها بابتسامه: الحمدلله كل شي تمام
منيره ( مرت اخو سلطان: راكان ) : فستانك ماشاء الله يهبل..من وين؟
ماسه : تسلمين! صديقتي مصممه واغلب تجهيزي من تصاميمها
ام حمد ( زوجة اخو سلطان : راشد ) : نفسها الي جات في استقبالك ؟
هزت ماسه راسها بالنفي : لا وحده ثانيه..الي جات معي ميان مجالها تسويق وعندها شركة
منيره عقدت حواجبها : ميان! هي نفسها صاحبة شركة الميان!
هزت ماسه راسها بايه تحت استغراب منها ومنهم وكانت ناسيه موضوع زواجها بولد عمهم
ام حمد لفت على منيره : هذي الي تزوجها سيف!..هزت راسها منيره : شكلها هي ولا ياماسه!
ماسه تنهدت : ايه هي
بدت اسألتهم عنها وعن عايلتها واسمها! وكيف وشلون تزوجوا والاهم ليه! ماجاولت على ولا سؤال منهم وماكان منها الا انها تتجاهل سؤال وحده وتناظر في الثانيه الي تطرح سؤال مختلف وبدون جواب..ارتبكت من الضغط الي عليها ونظراتهم الي تنتظر اجوبه منها..بعد اقل من دقيقه انقذ موقفها دخول ام سلطان الي قالت لهم ان سلطان بيدخل يسلم على عماته وحريم اعمامه..ودخلوا داخل البنات الي مو محرم له وحريم اخوانه وبقى العمات مع حريم اعمامه وامه وماسه الي وقفت مع وقوفهم اول مااقبل عليهم وبدا من اليمين يسلم عليهم ويحب راسهم وعيونه تسرق النظر لها ولوقوفها وشكلها المميز بالنسبة له
توقعته يتعداها ويكمل سلامه لكنه وقف قبالها وحط يده على خدها وباس خدها الثاني وسط ابتساماتهم واحراجها ولونها الي قلب احمر..ناظرته كيف ابتسم من ملامحها الي قلبت والخجل الي بان عليها ومشى يكمل سلامه ويرجع يجلس جمبها ويده ورا ظهرها وناظر عماته وحريم اعمامه الي بدوا يسولفون معه ويسألون عن حاله ويسأل عن حالهم..بعد دقايق من السوالف لف لعمته ( مزنه ) الي تكلمت : عساني افرح بخبر حملك قريب يابنتي!
ابتسم ولف عليها من نزلت هزت راسها وابتسمت وبان على ملامح وجهها الخجل والاحمرار..وماكان منه الا انه لف لعمته: الله يكتب الي فيه الخير
فاطمة ( مرت عمه الكبير ) والي تعتبر اكثر شخصية ماتفكر بالكلمة الي تقولها والي بقلبها على لسانها: خبري فيك ماطولت قبل وهالمزيونه ماهقوتي تتاخر
كحت ام سلطان بتغيير للموضوع : توهم بسم الله عليهم لاحقين ان شاء الله
لف سلطان على ماسه ولاحظ تغير تعابير وجهها ويدينها المشبوكة ببعض وصدرها الي يهبط ويرتفع بسرعه..فهمها وفهم سبب تغيرها حتى بدون ماتتكلم وتذكر كلامها وقت قالت له
" اطنش لاني مااحب كلام الناس! اطنش لاني ابغى الكلام يجي منك ! واصدقه منك " ومد يده يفك تشابك يدينها وحط يده مكانهم
لفت تناظر بعيونه الي تناظر كل ملامح وجهها ولف على صوت ضحكهم وهمساتهم وام سلطان الي ابتسمت بحب وبراحة وهي تناظر ولدها وعيونه على زوجته والي ماشافته فيه بزواجه الاول غير الصدود والتعب والهم! وصحيح الحين هي مااختارتها وجاته عطيه الا انها افضل من اختيارها وتعترف بهذا الشي في داخلها..قاموا من قام سلطان وللحين يدها ماسكه يد ماسه ونطق : يالله انا استأذنكم..ولف من لفوا كلهم يناظرون دخلوها بلبسها لفستان اسود ضيق ويبين مفاتنها كلها ويوصل لفوق ركبتها والي كانت مو منتبها بوجوده..وتعالت الاصوات تنبهها ولفت وجهها تناظر فيه ولانه صاد عنها وجهت نظرها لماسه الي مكشره بوجهها وابتسمت ابتسامة سخرية وعلت صوتها : اعذروني ماانتبهت ولا احد عطاني خبر
واتجهت للغرفة الداخلية تدخلها
أنت تقرأ
يـامـيان عـيوني ويـاثرى قـلبي
Romanceالعهد 🇸🇦 انه ماضي ليس الا, مخاوفنا تشكلت من ماضينا..من حكاية خُطت على اقدارنا حين ولِدنا, اخطائُنا..افعالنا..ردودنا..واخيرا! نهايتنا..رُسِمت من قبل ان تخرج رؤوسنا من الارحام!، Insta; rwayh_119
