فتحت عيونها من اشعة الشمس الساطعة عليها..مسحت على ملامحها وعدلت جلستها وانتبهت انها نايمه في مكانه وتذكرت ليلتها والي صار وتمنعها عنه وكلامه وانتهت بنومتها في حضنه والحين مو موجود حولها
تنهدت واخذت جوالها تفتح الواي فاي وتشوف الرسايل والقروبات..عقدت حواجبها من رسايل قروب البحث
" ماسه ترى كل مره اروح له يعصب ويقول وين قائدة قروبكم هي الي المفروض تجي "
" صدق ماسه ليه ماتروحين؟ ترى عادي مارح ياكلك "
تأففت ومسحت على عيونها..مستحيل تروح له بعد اصراره هذا..مستحيل تعرض نفسها لموقف محرج ومستحيل تقدر انها تقول لسلطان وماتدري وش بتكون ردة فعله او وش بتقول له اصلا ؟ ممكن تلميحات لها اصل او مالها اصل وممكن مايقتنع بمجرد كلام بإطار الجامعة
اخذت روبها وتوجهت لدورة المياه تاخذ لها شاور وطلعت تلبس ملابس الجامعة تنوره ميدي باللون الاسود وبلوزه بيضاء بأكمام قصيرة طايحة من على كتوفها وجزمه سبورت رفيعه
وقفت عند المرايا وشهقت من العلامات الي على رقبتها باكثر من مكان وكيف صار لونهم كذا من مجرد قبلات! حاولت تمسحهم باصابعها ولا كان فيه فايده
تأففت بوهقه وناظرت للتسريحه الي امامها وطرت عليها فكرة الميك اب، فتحت مكياجها تحاول تخفيه وبالفعل اختفى وتنهدت براحه، سرحت شعرها وحطت ميك اب خفيف جدًا وتعطرت ولبست ساعة واسوارة وحلق وعقد بسيط..لبست عباتها وحطت الطرحة على راسها واخذت شنطتها واغراضها
قبل ماتطلع من الجناح جاتها رساله من سلطان " السواق برا " ماردت عليه ونزلت من المصعد وتوقفت خطواتها من صوت ام سلطان الجاي من الصالة الداخليه : الولد جن وقعد! يقول مابي اشوف وجهها في البيت ولا بطلع منه!!
ابو سلطان شرب قهوته وتنهد : لاحول ولا قوة الا بالله..وولدك وش له بكلام وسوالف الحريم؟
ام سلطان : مو راضي يسمع مني كلمه! واول مره اشوفه كذا! ياما ميعاد هبلت فينا في الجمعات ولامره قال شي! وش غيره الحين وطلّع شراره!
ماحبت تسمع اكثر وتقدمت تضرب الباب تسلم وتستأذن بالدخول واستقبلتها التراحيب والتهاليل..تقدمت تسلم عليهم وتقبل راسهم وجلست جمب ام سلطان الي اشرت لها بجنبها
نطق ابو سلطان بابتسامه رحبه : شلونك يابوك ؟ عساك امورك زينه
ماسه هزت راسها وابتسمت : الحمدلله تمام
ابو سلطان هز راسه : الحمدلله الحمدلله..ان شاء الله انك مرتاحه هنا؟
ابتسمت ماسه وهزت راسها: الحمدلله مرتاحه
ام سلطان : ماسه حبيبتي اليوم عندنا عزومه لمزرعة عم سلطان بمناسبة زواجكم خلك جاهزه
ماسه: ان شاء الله
ام سلطان ناظرت في عباتها: اشوفك لابسه يبنتي ؟ على وين ؟
ماسه : الجامعه
ام سلطان : يوه صح نسيت انك تدرسين! الله يوفقك ويسمح دربك
ابو سلطان: فالك الدرجات العاليه
ماسه استجابة لكلماتهم وهزت راسها بابتسامه على محياها واستأذنت منهم تلبس حجابها ونقابها وتطلع تركب السيارة
أنت تقرأ
يـامـيان عـيوني ويـاثرى قـلبي
Romanceالعهد 🇸🇦 انه ماضي ليس الا, مخاوفنا تشكلت من ماضينا..من حكاية خُطت على اقدارنا حين ولِدنا, اخطائُنا..افعالنا..ردودنا..واخيرا! نهايتنا..رُسِمت من قبل ان تخرج رؤوسنا من الارحام!، Insta; rwayh_119
