جيتيني مثل الشروق الي محى عتم الليالي

Part 48

—
_________________________
بالمستشفى |
ريحّت لين على احد الكراسي بعد اقناع من عبدالله انها تجلس وترتاح غطت وجهها بكفوف يدها وهي مره خايفه على لطيفه وبذات انها حامل الخوف اكثر عندها رفعت راسها على طول من انفتح الباب الزجاجي وطلعت النيرس وتقدمو لها عبدالله وسلمان بسرعه اما لين استحت توقف بجانبهم واكتفت بانها تسمع كلام النيرس من بعيد
عبدالله : بشري شصار !
تنهدت الدكتوره وقالت : هي بخير والبيبي بعد وعطيناها مسكنات وسبب الالم ماهي ملتزمه بالادوية الي اعطاها الدكتور من بدايات حملها زفرت لين من سمعت كلام النيرس وحطت يدها على قلبها وهمست : الحمدالله
سلمان : طيب يمدي نشوفها ؟
النيرس : ايوه حياكم
قامت لين من الكرسي ماشيه خلفهم الى ان دخلو الغرفه وتجمعت الدموع بعيون لين من شافت وجهه لطيفه كان اصفرر وذبلان وواضح عليها التعب ركضت تحضنها وتبكي وجسدها يتحرك دليل على شهقاتها الي خافيتها بصمت عشان ماتقومها ابتسم عبدالله على حنية لين وخوفها على لطيفه فتحت عيونها بصعوبه وحركت راسها الى جهة اليمين وعقدت حواجبها وقالت : لين ؟
شهقت لين ورفعت راسها وقالت : يالله يا لطيفه ليش سويتي كذا !!
ابتسمت لطيفه بصعوبه وقالت : اما تبكين ؟
قامت لين وضربت لطيفه ضربه خفيفه على كتفها وقالت : شرايك يعني ؟
مشت لين للزاويه وعطتهم ظهرها ورفعت نقابها تمسح دموعها تقدم عبدالله وطبع بوسه على جبينها وهمس لها : اعلمك بالبيت والله لا اهزئك
شهقت لطيفه ودفت عبدالله وقالت : اقول بس انا بروح عند امي
لف عبدالله على سلمان المتكتف وغمز وقال : يا حرام بينام لحاله !
دخلت النيرس وقالت : كتبنا خروج وارجو منك تلتزمين بالادوية !
هزت راسها لطيفه وقامت بمساعدة لين واخيرا طلعو من المستشفى
________________________________
بالمدرسه تحديدا بالفسحه |
لفت الجوهره على نوف ولاحظت هدؤها التام جدا وقالت : نوف فيك شي ؟
لفت نوف وقالت : هاه ؟ لا مافيني شي
صغرت الجوهره عيونها وقالت : لا مافيك شي ابد ابد مو مبين
تنهدت نوف وقالت : اوف خلاص يالجوهره مو وقتك
الجوهره بحده : كيف مو وقتي هاذي جزاتي ابي اعرف شفيك ؟
جت ساره بعد ماشترت من المقصف وقالت : ماتحسون ان صوتكم عالي حبايبي ؟
شمقت نوف وقامت من الكرسي ومشت برا الفصل جلست ساره بعد مافتحت علبة المويه وقالت : شفيها ذي الحين ؟
الجوهره بحده : مدري عنها ذي اختك
لين : احس حرام خلوها يمكن متضايقه عشان لطيفه بس لانهم متهاوشين ماتبي تبين اهتمامها شفيكم انتم !
ليان بانفعال : اي صح !
فتحت ساره فطيرتها وقالت : الصراحه بكيفها اهم شي اخلص فطوري بعدين اروح لها
ضحكت الجوهره وقالت : اقسمي لي معك تكفين
قسمت ساره الفطيره نصين ومدت يدها تعطي الجوهره النص الثاني
اكلت الجوهره وتوسعت عيونها وقالت : الله لذيذذذه
ساره بحده : اقول انقلعي اشتري لك تخلصين حقتي !
رجعت لين شعرها على ورا وقالت : والله لطيفه لها مكان !
الجوهره : منجددد
_________________________________
بيت الجد عبدالله تحديدا غرفة ساره |
رفعت راسها من انفتح باب الغرفه ونزلت السماعه من اذنها دخل هتان وجلس قدامها على السرير وقال : شخبارتس
ابتسمت ساره وقالت : الحمدالله انت شخبارك بعد ؟
ابتسم هتان وقال : نحمد الله
عقدت ساره حواجبها وقالت : ايوه شعندك ؟
حك هتان دقنه وقال : لا والله طفشان يا وخيتي
ضربت ساره فخذها واشرت له بمعنى تعال ابتسم على طول من فهم قصدها لان يحب لمن ينسدح عليها وتلعب بشعره انسدح هتان على فخذ ساره وبدت تلعب بشعره وقالت : مستعد لزواجك ؟
ضحك هتان وقال : شرايتس انتي يعني ؟
ساره : مدري يعني عنك انت
هتان : لا لا معليتس مستعد انا
اخذت ساره جوالها والتقطت صوره وهي تلعب بشعر هتان ورسلتها بالقروب وسكرت جوالها وقالت : ماتحس بشعور غريب يوم تزوجو نوف وعبدالله وما بقى الا انا وانت ؟
تنهد هتان وقال : اي والله صادقه شعور غريب
ضربت راسه على خفيف وقالت : مسوي انك طالع منها وزواجك قرب يحمار !
مسك هتان راسه تحديدا مكان الضربه وقال : خلاص ياخي تزوجي انتي بعد !
ساره بحده : وهو انا الي اخطب لي واحد يعني !
ابتسم هتان وقال : ان شاءالله تاخذين واحد نفسي
ساره بهمس : لا والله شخصيته غير عنك
توسعت عيون هتان وقام من فخذ الجوهره وقال : شتقصدين شخصيته غير عني ليكون تحبين !
توترت ساره وقالت : اقصد ان مايكون نفسك كذا ابي
شخصيته غير !
حط هتان عينه بعينها وقال : والله انتي غريبه اصلا
طنشته ساره واخذت جوالها تتصل على الجوهره وحطته باذنها واشرت بيدها حق هتان * 🤌🏼* لين ماردت الجوهره وقالت ساره بانفعال : جوجوووو
الجوهره : ها عيوني
ابتسمت ساره بخبث حق هتان وقالت : بالله تعالي غرفتي طفشانه
الجوهره : اوكيه بجيب معي الفيزياء عشان نذاكر !
سكرت ساره الجوال وقالت : يلا اطلع برا بنذاكر
رفع هتان حاجبه وقال : تمزحين ؟
كشّرت ساره وقالت : لا يا حبيب امك مامزح هيا دزها يا هتان
قام هتان من السرير وتوجهه للباب وقال : هيا خليكِ قدها يا ساره والله ماحمشيها
بدت ساره تضحك لان فجاه طلع العرق الجداوي وقالت : اشتقت لجده مره
مسك هتان مقبض الباب لكن انفتح من نفسه وطلعت بوجهه الجوهره رمت ساره كتابها على السرير ولفت عليهم وشافتهم مصنمين وقالت : لقاء الجبابره هههههههههه
ابتسمت الجوهره ابتسامة الوهقه وقررت تدخل ودخلت وجلست على السرير وقالت : خلصيني خلينا نذاكر
_______________________________
بيت نوف وفارس |
خلصت نوف مذاكرتها وسكرت الكتاب تحطه بالشنطه واخذت جوالها ونزلت تحت لمحها فارس وفتح لها حضنه وركضت متوجهه له وقالت : حضنك مره دااافي
شد عليها فارس وقال : ذاكرتي ؟
ابتسمت نوف وقالت : اي والحين جوعانه شرايك نطلع نتعشى ؟
عقد فارس حواجبه وقال : اما عاد ؟؟
بدت تناظره بنظرات بريئه وقالت : تكفين فارس تكفين الله يخليك امانه امانه
ضحك فارس وقال : يلا تم قومي بس ترا لاني جوعان مو عشان نظراتك اغرتني ولا شي
طنشته نوف وصعدت فوق متوجهه للغرفه وطلعت لها توب ازرق عاري الاكتاف مع بنطلون اسود وسيع ولبستهم وحطت شوي عطر وسوت شعرها ذيل حصان وتوجهت للتسريحه وحطت مرطب بعدها تنت على خدينها وشفايفها واخذت الفرشه تدمج الي على خدينها ثم خذت مسكره وحطتها على رموشها وزاد كثافتها وطولها وحطت في الرموش السفليه بعد واخذت مرطب لابيلو وحطته على شفايفها واخذت عبايتها السوداء الي مزينه من الاكمام بورود لونها وردي ولبستها واخذت شيلتها تلبسها بعدها اخذت شنطتها وحطت فيها جوالها ومحفظتها وعطر وعلك وسكرتها وعلى اخر شي قررت تلبس كعب وجلست على طرف السرير تلبس الكعب وقاطعها صوت فارس يقول : يلا انا بنزل تحت
نوف : تمام
لبست كعبها واخذت نقابها متوجهه للمرايا تلبسه واخذت المناكير معها تحطه بالسياره نزلت تحت وطفت الانوار وطلعت برا متوجهه للسياره وركبت وسكرت الباب ومدت يدها تفتح الانوار وفتحت المناكير عشان تحطه
عقد حواجبه فارس وقال : شتسوين ؟
نوف بتركيز : احط مناكير
سكر فارس عيونه وبدا يفركها وقال : الافضل ماتحطين حبيبتي
عقدت نوف حواجبها وقالت : ايوه وليه ؟
فارس بحده : عشان الرجاجيل يطالعون بيدك واظافرك !؟
احتدت ملامح نوف وقالت : شدخل ربط المواضيع عندك عجيب !
تعوذ من الشيطان وطنشها وحرك للمطعم والصمت سيد الموقف اخذت نوف السلك وشبكت جوالها وشغلت اغنية
" اليوم ممكن تقولي " ورجعت ظهرها على ورا وبدت تحرك راسها على انغام الموسيقى وتغني بهمس لين جاء البارت الي هي تبيه واعتلى صوتها وبدت تردد معه
وانـا فـي درب الهـلاك
ظهـرت لـي يـا مـلاك
غيـرتي مجـرى حـياتي
شـفت الـسعاده معـااك
واليـوم يمـكن تـقولي
يـا نفـس إنـك سعيـدة
لف عليها فارس وبدا يناظرها بكل حب والابتسامه ماتفارق وجهه لين خلصت الاغنيه وكان بنفس الوقت وصولهم للمطعم جا واحد وفتح الباب لنوف ونزلت وبرضو نفس الشي لفارس ومد له المفتاح يصف السياره له قربت نوف منه ومسكت ذراعه ودخلو المطعم كان مطعم فخم وراقي واجواء هادئه وانوار لونها اصفر استقبلهم النادل وطلب منهم يتبعونه لاجل يدلهم على طاولتهم جلسو وبدت نوف تتامل المكان ماهي دقايق الا ووصلت القهوه قبل العشاء طلعت نوف جوالها من الشنطه وشافت قروب البنات مولع وبدت تقرا الرسايل
" بالقروب "
ليان : الا غريبه وين نوف طاسه ؟
الجوهره : تلقونها خامده
ساره : نوف وراها بلى صدقوني
نوف : وجع هاذاني موجوده !!!
لين : حرام عليكم شوفوها جتكم
نوف : ترا تقدرون تعترفون انكم ماتقدرون بدوني عادي مره
ليان : يع عليك يا نوف غثيييثه
نوف : مافيها شي لو اعترفتي !
ساره : ماعلينا شتسوين ؟
ضغطت نوف على خانة الكاميرا الي على جنب والتقطت صورة للقهوه ورسلتها للقروب
______________________________
نكمل بعدين حبايبي ❤️
طبعا استحيت على وجهي ونزلت لكم بارت 🥳

تعالو انستا ولا بشخصنها