جيتيني مثل الشروق الي محى عتم الليالي

Part 58

__
____________________________
اليوم الثاني |
لبست الحلق كاخر شي في طلتها الانيقه شافت انعكاس راكان على المرايه يناظرها بكل عصبيه تاففت وقالت : شفيك انت وبعدين ؟ راكان بحده : لااا ابد سلامتس مافيني شي ! يعني انتي مقتنعه باللبس ذا ؟ ناظرت العنود لبسها وقالت : شفيه ؟
عقد راكان حواجبه وقال : شفيه ؟ فوق الركبه ! الله واكبر عليتس يالعنود مالقيتي اقصر منه ؟ طنشته العنود لان تعبت من ذا الموضوع راحت غرفة نايف ابتسمت تشوفه جالس على السرير مندمج بالايباد وبيده كيس بطاطس تقدمت له وقالت : نايف ! لا يتوصخ ثوبك واول ماتخلص غسل ايدك زين هز نايف راسه وضحكت العنود لان واضح انه يسلك طلعت من الغرفه وسكرت الباب خلفها نزلت للدور الاول دق الجرس وقالت للمساعده تروح تفتح الباب حطت عبايتها وشنطتها على الكنب وكانت انتظر راكان عقدت حواجبها من سمعت صوت وحده تقول بسخريه : ماشاءالله يالبيت صار فيه روح !
مشت العنود للباب ورفعت حاجبها وقالت : سلامات مين انتي داخله بيتي كذا ؟ ناظرت العنود من فوق لتحت بكل حقد رفعت صبعها وقالت : انتي العنود ؟ ناظرتها العنود بنفس النظره وقالت : ايه ! انا العنود شتبين الحين ومن انتي اصلا ! ضحكت منيره وقالت : انا طليقة راكان واُم وشدة على هاذي الكلمة بذات وقالت نايف بلعت العنود ريقها وقالت بتوتر : طيب شتبين الحين مافهمت ؟ بدت منيره تتمشى حول الصاله وصوت كعبها باذن العنود وقالت : والله مثل ماهو بيتك كان بيتي ! ضحكت العنود بسخرية وقالت : انتي قلتيها بنفسك كان فعل ماضي ! تكتفت منيره وقالت : انا جايه اشوف ولدي واخذه معي توسعت عيون العنود وقالت : ولدك ؟ الحين تذكرني ان عندك ولد اصلا ؟ انتي تسمين نفسك اُم اصلا ؟ راميه ولدك عند طلقيك ولا تدرين عن هوا داره اصلا ! اخذت لها العنود نفس وبدت تتخيل حياتها بدون نايف غير حياتها للافضل تصبح وتنام معه صدق انه مو هي الي انجبته لكنه تعتبره ولدها بلعت ريقها من سمعت خطواته نازل من الدرج يدندن باسمها وصل للدور الارضي وطاحت عيونه على ملامح العنود كان واضح التوتر عليها لا راسه يشوف منيره مقابله العنود احتدت ملامحه وبرزت عروقه دليل على عصبيته راحت العنود خلفه ووقفت على اطراف اصابعها عشان تحاول توصل لطوله بحكم انه عريض وطويل همست باذنه : تكفين لا تسوي شي مشى راكان خطوتين وقال بحده : من سمح لتس تدخلين بيتي ؟ ناظرته بسخريه وقالت : ذا تسميه بيت ؟ اقول بس لا يكثر وجب ولدي واغراضه جن جنون راكان وقال : اسمعيني زين ! اسلوبتس ذا ماتطلعينه علي فاهمه ! ونايف تحلمين تشوفينه ولا تاخذينه معتس احتدت ملامح منيره ورفعت صبعها وقالت : هيه انت .. مين تحسب نفسك ! نفس ماهو ولدك ولدي انا بعد ! مسك صبعها ونزله للاسفل وقال : اول شي صبعتس تنزلينه فاهمه وثاني شي تخسين وتعقبين يصير ولدتس ولدي نايف امه ماهي وحده رخيصه تطلع مع عيال والله اعلم عن الباقي مايحطها بذمتي توسعت عيونها من نطق بكلمة " رخيصه " جن جنونها ورفعت يدها لاجل تضربه لكن استوقفتها يده شد على يدها وقال : بيتي يتعداك يا منيره ولو اشوفك مره ثانيه ما يحصل خير ! طلعت منيره وقفلت الباب بقوه سكر عيونه يمنع الغضب عنه لف على العنود الي كانت متجمده بمكانها نطق راكان : انتظركم بالسياره
____________________________
بيت الجد عبدالله بحيث الكل متواجد بمناسبة زواج ساره وعبدالرحمن |
انتهو مـن الغداء الي الجد عبدالله يسويه بعد اي زواج من احد احفاده نروح للحريم قامو البنات يزينون الصاله بعد الغداء دخلت ساره صحون الغداء للمطبخ كشرت ملامحها من توسخت يدها بسبب الصحون فتحت صنبور المغسله تغسل يدها قشعر بدنها من حست بيد تحاوط خصرها كامل قبّل رقبتها وقال : وحشتيني لفت وصدت على طول بحكم المسافه المعدومه بينهم قالت بصوت خافت : عبدالرحمن ! مو وقتك تراهم يشيلون صحون الغداء رفع عبدالرحمن حاجبه وقال : طز عاد خليهم يشوفون سكرت ساره صنبور الماي وقالت بخجل : طيب ابعد شوي مسك عبدالرحمن ضحكته على خجلها وقال : شغلتس معي بالليل بلعت ريقها ساره وخذت مناديل تنشف يدها اشرت له بيدها انه يروح ابتسم وطلع من المطبخ حمرّت خخدودها من تذكرت الموقف على طول راحت الصاله واستغربت من عدم تواجد البنات اخذت جوالها ودخلت مجلس الحريم تخصرت وقالت : عسى ماشر ليه ماقلتو لي انكم هنا ؟؟؟ ابتسمت ليان وقالت : حياتس اقلطي عندي سالفه
جت ساره وتربعت بجانب اختها نوف اخذت ليان نفس وقالت : سعد يبي يخطبني ضحكت لطيفه وقالت : وانا اشوف سعد متغير هالفتره شلعتو قلوب اخواني انتي واختس ! نزلت ليان راسها وقالت : وش اسوي طيب رشفت من فنجان القهوة وقالت : اول مره اشوف ليان تستحي ضحكت الجوهره وقالت : العنوووود وربي صادقه صغرت نوف عيونها وقالت : الا اقول ساره شصار ؟ بلعت ساره ريقها وحكت رقبتها وقالت : ما لمسني شهقت العنود وقالت : وخزياه ! لا تدري عنس جدتس
نوف بحده : يا قرادة حظي صدقيني مالمسك الا انك خايفه .. ياعمري عليك يا دحوم عقدت ساره حواجبها وقالت : لا تمونين كثير احس .. كشّرت نوف وقالت : يا شيخه سري نطقت لطيفه : اسمعي انا بشوف متى اهلي يجونك يعني عشان اقولك تجهزين رفعت الجوهره حاجبها وقالت : دقيقه بتوافقين ! بلعت ليان ريقها وحمّرت خدودها وقالت : انا ؟ ضحكت الجوهره وقالت : لاااا البنت طايحه على وجهها ... بسم الله عليك ياختي وش جاتس ! تغيرت ملامح ليان ونطقت بحده : ابك انتي وش تقولين اتركي عنك الكلام الي ماله داعي ! غمزت الجوهره وقالت : علينا ؟ الحين كلامي صار ماله داعي
____________________________
ميلانو - ايطاليا |
نزلت راسها تناظر بطنها وتمسح عليه ابتسمت من حست برفسه وقالت : تحس فيني ؟ يلا كلها شهر بالقليل واعرف انت او انتي وشو ! رفعت راسها اول مادخل سلمان الشقه فتحت يدها تستقبله الى حضنها ابتسم على طول وحط اغراضه على الطاوله وتقدم يحضنها انسدح بحضنها وقال : تعبببان دخلت يدها بشعره تلعب فيه وقالت : بسم الله عليك ! فتح عيونه وقال : ترا بعد اسبوعين بنرجع السعوديه توسعت عيونها وقالت : امانه سلمان ! انرسمت الابتسامه على شفته وقال : اي والله ... تدرين سعد بيخطب ليان اختس ! لين بانفعال : اييي قالت لي ومتوتره حدها تقول تعالي قبل الزواج ! رفع سلمان حاجبه وقال : سعد يبي يسوي عقد قران بعدين زواج مره وحده وخفيف زي ساره وعبدالرحمن  لين : الصراحه احسن لهم من خساير مسح على بطنها وقال : شخبار النونو ؟ ابتسمت لين وقالت : متعبني جدا قام سلمان وقال : يالله الله يعينك ان شاءالله ويقومك بالسلامه يا عيوني
____________________________
نرجع للبنات انهت الجوهره الاتصال ومسكت راسها وقالت : جاب لي الجونان ! حطت ساره راسها على حضن الجوهره وقالت : شفيك ؟ بعدت الجوهره راس ساره وقالت : بعّدي انتي بعد ... يوم زانت الجلسه قال يلا الثور ذا ! رفعت نوف حاجبها وقالت : هتان ؟ قامت الجوهره تلبس عبايتها وقالت : من غيره يعني ؟ لبست نقابها وقالت : يلا اشوفكم ان شاءالله طلعت الجوهره وقالت : وين فارس وعبدالرحمن ؟ عقد هتان حواجبه وقال : شتبين بهم ؟ سكرت عيونها تمنع الغضب عنها وقالت بحده : اخواني ! اخواني ! بسلم عليهم استغرب من عصبيتها المبالغ فيها لكن جا بباله انها هرمونات دوره فتحت يدها تستقبل حضن فارس حضنها فارس بكل مافيه فيه لهفه وشوق لاخته وحبيبته اخر عنقوده نطق بصوت خافت : اشتقت لس جوهرتي ضرب هتان ظهر فارس وقال : يالحبيب قمت تمون واجد هدها بس رفعت الجوهره راسها على دخول عبدالرحمن الي ابتسم اول ما شافها حضنها وقال : اخييييه متى نتهاوش ! ضربته على كتفه وقالت : يالحقير انت ! ابتسم هتان وقال : يلا نستأذن اجل
____________________________
بيت راكان |
حطت يدها على مقبض الباب وفتحته صرخت من المنظر الي شافته قدامها
__________________
نكمل بعدين حبايبي  ❤️
ادري اني تاخرت عليكم كثييير كثييير وانا اعتذر لكم ولو سمحتو مابي عتاب يضايقني بسبب تاخيري ❤️
اوه صح ! عساكم من عواده 🤍🌙
سامحوني على الاخطاء الاملائيه .. ولا ننسى -⭐️- !
على فكره ... قرب الختام 😢😢!