جيتيني مثل الشروق الي محى عتم الليالي

Part 49

—
_________________________
سكرت نوف جوالها ومدت يدها تاخذ المنيو الموجود على الطاوله وبدت تتصفحه وقالت : وش ودك فيه ؟
مد يده ياخذ المنيو منها وقال : بطلب ستيك
حط المنيو على الطاوله واخذته نوف وقالت : بطلب باستا روزيتو اشتهيتها
اشر فارس بيده للنادل عشان ياخذ طلباتهم واخذ طلباتهم فعلا وراح دقايق وبدا فارس يضحك بدون سبب رفعت نوف انظارها له وقالت : مجنون ؟
ضحك فارس وقال : تذكرين يوم جيتو الرياض ودخلتي غرفتي ؟
توسعت عيون نوف من تذكرت الموقف وغطت عيونها وقالت : ياربيييه يا فارس وش الطاري ؟
تكتف فارس وقال : وش كنتي تسوين اصلا ؟
رجعت نوف ظهرها على ورا وقالت : مدري المكان كان غريب علي وماعرفت انام وجلست استكشف بس طحت بيد واحد قليل ادب على طول يمسك الخصر !!!
ابتسم فارس وقال : تدرين من يومها وانا حاطك براسي ؟
بلعت نوف ريقها وقالت : من جدك ؟
ابتسم فارس ابتسامه خفيفه وقال : ايه طحت بغرامك
سكتت نوف بعدم وجود اي رد لكن انقذها النادل من جاء وعربية الاكل بيده وبدا يحط الاطباق على الطاوله والكاسات المليئه بالثلج وفتح الببسي وصبه داخل الكاسه وبداو ياكلون نوف وفارس
____________________________
بيت الجد عبدالله تحديدا الدور الارضي بالصاله |
كانو المتواجدين الجد عبدالله والجده ساره والجوهره وساره ومرام ومريم
تنحنح الجد عبدالله وقال : بكره خالد والهنوف وبنتهم راجعين من العمره وبنسوي لهم عشاء خفيف بينا طلع جواله من جيبه ومده للجوهره وقال : امسكي يا جوّيهر اكتبي بالقروب !
مدت يدها تاخذ الجوال من جدها وقالت : ابشر
قامت ساره وجلست بجانب الجوهره وبداو ينسقون وش يكتبون بالرساله بالظبط
بالقروب *
عائلة المطِيري 💐
الجد عبدالله : السلام عليكم ورحمة الله وبركاته ابنائي وبناتي وحفائدي وحفيداتي ان شاءالله غداً ساقيمُ عشاء في منزلي بمناسبة عودة ابني خالد و زوجته وابنتهم ساره من العمره يارب اجعلها عمره مقبوله لهم واتمنى منكم الحضور جميعاً على تمام الساعه 6:00 مساءً وتصبحوا على خير ❤️
فارس : ماشاءالله جدي انت كاتب كل ذا ؟
الجوهره : تتنمر انت ؟ انا كاتبتها
فارس : حبيت اسلوبك دقيق جدا نفس اخوك 👌🏽
__________
سكرت الجوهره الجوال ومدته للجد عبدالله ودخله بجيبه وقال : وانتي يا مرام خلي هتان ولدتس يروح العزبه يجيب لنا خاروفين
ابتسمت مرام وقالت : ابشر يا عم الحين اكلمه .. ساره روحي جيبي جوالي !
قامت ساره تجيب جوال امها ورجعت ومدته لها اخذت مرام الجوال وبدت تدور الاسم لين لقته
"حبيب امه 🌹 " ضغطت على الاسم وحطت الجوال باذنها تنتظر رده
هتان : هلا اميمتي ؟
مرام : هلا حبيبي
هتان : شخبارتس ؟
مرام : بخير الحمدالله
هتان : امري علامتس ؟
مرام : اسمع حبيبي جدك يقول رح العزبه وجب خاروفين منهم
هتان : ان شاءالله يمه
سكرت مرام وقالت : خلاص ياعم بيروح هتان العزبه
قام الجد عبدالله يمسك عصاته وقال : يلا تصبحون على خير
________________________________
اليوم الثاني |
تحديدا العصر جت نوف وكانت اخر وحده توصل من البنات دخلت الصاله وكانت فاضيه لان الكل مشغول مشت الى غرفة العنود وفتحت الباب وقالت : بموت حر !
كتمو البنات ضحكتهم من شكلها كان شعرها ملفوف باللفافات فصخت نوف عبايتها وقالت : مايضحك ترا !
ابتسمت لين وقالت : معليك منهم تعالي جلسي معي نحط ميكب
وقفت الجوهره وقالت بصوت عالي : بطلب ستاربكس مين يبي ؟
نوف : طلبي لي ماتشا
العنود بصراخ : نااايف اجلس بسرعه !
بوّز نايف وكتف يده وقال : ليش ما تلعبين معي
حطت يدها على راسها ونزلت لمستواه وقالت : حبيبي انا الحين مشغوله نرجع اذا رحنا البيت !
طنشها نايف وخذ ايباده وقال : اصلا انتي ماتحبيني !
طلع من الغرفه وهو معصب جلست العنود على التسريحة وقالت : ياربي من هـ الولد
ساره : جوجو ابي كراميل مكياتو
لفت العنود وقالت : ابي سبانش لاتيه حار
تخصرت الجوهره وقالت : لين وليان ولطيفه ماتبون شي ؟
هزت لطيفه راسها وقالت : لا مابي انا
جلست الجوهره وقالت : خلاص يعني v60 وماتشا وكراميل مكياتو وسبانش لاتيه حار
توسعت عيون العنود وقالت : ايوه صح اطلبي حليب تشوكلت حق نايف
الجوهره : تمام
تممت الجوهره الطلب وسكرت جوالها وجلست قدام ليان تظبط لها الايلاينر صرخت الجوهره من تحركت ليان وخرب الايلاينر : يا مطنوخه يا كلبه !!!
ليان بحده : ياخي عيني حكتني
الجوهره بحده : ولعنه انتي وعيونك هاذي اخر مره يا ليان !
ليان بحده : طيب طيب !!
دق الباب وقامت العنود تفتحه وقابلت هتان
كشّرت العنود وقالت : وع يا ريحتك يا ورع !
مسح هتان العرق الي على جبينه وقال : خلي نوف تجي بالله
دخلت العنود راسها وقالت : نوف قومي هتانوه يبيك
تاففت نوف وتوجهت للباب وسدت خشمها وقالت : وع وع شتبي ؟
ابتسم هتان بخبث وقال : الحقيني
لحقته نوف هي ساده خشمها من الريحه تراجع هتان للخلف وخلاها قدامه وسكر عيونها وقال : عندي مفاجأة لك
بدت نوف تمشي بخفيف لين قال لها هتان توقف
وخر يده عن عيونها وتوسعت عيونها وصرخت بقوه : ييييمهه !!
لفت ظهرها وارتطمت بجسم هتان وقالت : يع يع انقلع !!
ضحك هتان وقال : شدعوه عليتس كلها راس خروف ودمان
دفعته نوف من صدره وقالت : بعد عني يا مقرف يا هتان ! دخلت نوف وقلبها ببطنها دخلت على البنات وهي معصبه وقالت : يع ! كريهه
ضحكت لين وقالت : شفيك ؟
نوف بقرف : هتان حطني عند راس خروف ودمامين !
ضحكت العنود وقالت : تكفين عاد هههههههههه !!
" بعد ساعتين "
خلصو البنات كشختهم اخيرا وكانت كشختهم كالاتي -
العنود كانت لابسه فستان احمر عاري الاكتاف من فوق وضيق من عند الخصر ومن تحت فيه نفشه خفيفه مثله مثل اي فستان وشعرها الطويل ويفي ونصه مرفوع ونصه مفتوح مع اكسسورات باللون الفضي ومكياج بارز ملامحها الاصيله
__
نوف لابسه فستان ازرق خيط او مزلط ومن عندها خصرها ضيق ومن تحت فيه فتحه من عند الركبه وشعرها كان ويفي مع اكسسورات نفس الشي باللون الفضي ومكياج مناسب لملامحها
__
ساره حلوتنا لابسه فستان اسود طويل الاكمام وفيه فتحه من عند الصدر ومنفوش من تحت وشعرها الطويل كان ويفي من الاطراف فقط مع اكسسوارت ذهب ومكياج هادي وانيق
__
شقرتنا الجوهره لابسه فستان ابيض عاري الاكتاف وقصير عند الركبه من زينه بالاطراف باللون الذهبي وشعرها ويفي كامل مع اكسسورارت ذهب ومكياج مناسب ملامحها الجميله
__
لطيفه لابسه فستان اصفر بارز بطنها وشعرها ويفي من الاطراف مع اكسسورات باللون الفضي ومكياج هادي جميل
__
لين لابسه فستان موف طويل الاكتاف وفيه فتحه من عند الصدر وقصير عند الركبه وشعرها ستريت ومنزله خصل من قدام ويفي من قدام واكسسورات باللون الفضي ومكياج هادي كالعاده لوجهها الطفولي
__
ليان وما ادراك ما ليان لابسه تيشرت ابيض عاري الاكتاف مع اكمام طويله وتنوره لونها بيج وحاطه حزام اسود وشعرها مرفوع ذيل حصان واطراف ويفي وخصل من قدام وإكسسوارات ذهب ومكياج جريئ كالعاده
__
حطت القلوس تنهي طلتها الانيقه الي باللون الابيض لفت على البنات وقالت : كيف شكلي بنوتات ؟
ابتسمت العنود وقالت : عسسسل
تنهدت العنود وقالت : ياربي نايف للحين مابعد البسه !
ليان بقرف : اموت ولا اتزوج واحد عنده ولد !
العنود بحده : عساس انا متزوجته ابيه ؟ غصبا عني ترا ! ربطت خيط الكعب وقالت : خلاص انا بروح اجيبه
ابتسمت العنود وقالت : عمري عمري نوفي
ابتسمت نوف ووضحت غمازاتها وطلعت من الغرفه تبحث عن نايف توجهت للدرج ولمحته متكتف ومنزل راسه والواضح انه زعلان ابتسمت نوف وتقدمت له وانحنت لمستواه وقالت : نايف حبيبي رفع راسه وهو مبوّز وقال : نعم ؟
تنهدت نوف وقالت : العنود تبي تلبسك الثوب يلا
نايف بحده : لا مابي عنودي ماتحبني !
توسعت عيون نوف وقالت : ليه ماتحبك !
اعتلى صوته وقال : ماتحبنننننيييي !
سكرت نوف اذنها وقالت : طيب طيب خلاص ! انا بلبسك
ابتسم برضى ورفع يدينه وقال : شيليني طيب
ابتسمت نوف وقالت : بس قول ابغى وانا اقول حاااضر يا نيوفي
ابتسم نايف وحملته نوف وحاوطت خصرها رجوله الصغيره وتوجهت للغرفه رفعت العنود راسها وقالت : يلا تعال نلبس
شمق لها نايف وتوسعت عيونها وقالت : احه !
ابتسمت نوف وقالت : لا معليك انا بلبسه
نزلته على الارض واخذت الفنيله والسروال تلبسه وعقبها لبسته الثوب ومسكت يده تحطه على التسريحه وبدت تمشط شعره وحطت كريم بيبي جونسن على وجهه كـ ترطيب وحطت له مسك وطبعت بوسه على خده وقال : خلاص انا بروح للرجال !
ابتسمت نوف وقالت : تمام يلا
نزل من الكرسي وراح ركض للباب يفتحه وتوجهه لمجلس العيال لمحه فارس وفتح له يده وقال : نايف تعال عندي ! ابتسم نايف وركض لفارس واخذه فارس لحضنه وقال : حبيبيييي
بعده عن حضنه لاجل يبوسه لكن توسعت عيونه من شاف الروج الي بخده وقال : اخو العيال ! راكان تعال شف ولدك ! تقدم لهم راكان وقال : علامه وش مسوي ؟ مسك فارس فك نايف ولف وجهه للجهه الثانيه وقال : شف ! توسعت عيون راكان وقال : اخو العيال يا نايف ! ابك هاذا ويش !
تكتف نايف وقال بحده : بوسه بوسه !
عقد فارس حواجبه وقال : ومنهي الي عطتك بوسه ذي ؟ ابتسم نايف وقال : دقيقه نسيت اسمها
راكان : تذكر حبيبي تذكر !
نايف بانفعال : ايوه صح ! نوف !
ضحك راكان وقال : والله وراحت عليك يا فارس هههههههههه ناس تتمنى وناس تتنهى
فارس بحده : هين هين
اخذ المنديل ومسك فك نايف وبدا يمسح البوسه وقال : تعقب تخلي الرياجيل يشوفون بوسة زوجتي !
دخل عبدالرحمن بيده البخور وقال : الحمدالله والشكر ياربي مسوي غيور
سكر فارس اذن نايف وقال : عبدالرحمن زرقها بس
هز عبدالرحمن راسه وقال : شنو الالفاظ ذي ؟ تراك صرت متزوج خلاص !
_____________________________
بدأت المناسبة وبدت السوالف تروح وتجي وكانت العزيمه خاصه بالعائله محد غريب تقريبا والحين وقت ان البنات يروحون مجلس الحريم عشان يسولفون براحتهم كـ جلسة بنوتات جلسو بالارض وتشكلو على شكل دائره ضربت ليان فخذها وقالت : الهنوف حامل وقسم بالله !
نوف بحده : ااييي بطنها اكبر من راسي فوق ذا مو راضيه تقول عساس مو قافطينها !
ضحكت الجوهره وقالت : والله مدري وش حادها ماتقول انها حامل اصلا ! دخل نايف عليهم وقال بصوت عالي : ساره امك تبيك ! قامت ساره وعدلت فستانها وتوجهت للمطبخ وتوجهت لامها وطبعت بوسه على فخذ امها وقالت : سمي !
ابتسمت مرام وقالت : افتحي الباب خذي المشروبات من عبدالرحمن ! ارتبكت ساره ومشت للباب تفتحه رجعت على ورا تعطيه مساحه يدخل لكن المفاجاه مو هنا المفاجاه كان يحسبها الجوهره اخته بدون مايلف عليها قال : ساره موجوده ؟ عقدت ساره حواجبها وقالت : انا ساره طيب ! تجمد بمكانه وماكان متوقع واحد بالميه ان ذي ساره لف عليها وتشابكت عينه بعينها لمدة ثواني معدوده صدت عنه واخذت كيس المشروبات الي حطه بالارض جاهله انظاره لها توجهت للطاولة وحطت الكيس وكانت عارفه انه للحين يناظرها لكن الشي الوحيد الي بتسويه انها ماتلف عليه ماهي دقايق الا ودخلو صحون العشاء للحريم ورتبو السفره واخيرا جلسو ياكلون وانتهت الامسيه الجميله لهادا اليوم والكل توجهه بيته بعد يوم طويل جدا ومليئ بالسعاده والاجواء العائليه كانت العنود اخر وحده تروح كانت ترتب شنطة نايف عشان يرجعون البيت سكرت الشنطه وحملتها على كتفها وسكرت نور الغرفه بعدها سكرت الباب وتوجهت للصاله تودع امها وخذت نايف وطلعو برا بسيارة راكان جلست نايف بكرسيه وربطت له الحزام وحطت شنطتها وشنطته بالخلف ومشت تركب قدام وكان الصمت سيد الموقف الين وصلو البيت وماقدرت العنود تنزل بسبب الالم رجلينها من الكعب فصخت الكعب ونزلت من السياره ماسكه الكعب برجلينها سكر راكان السياره بعد مانزل نايف والشنط وكتم ضحكته اول ماطاحت عينه عليها وقال : صاحيه انتي ؟
شمقت العنود ومدت رجولها وتوسعت عيونه من شافها حمرّه ومجرحه من الخلف اكتفى بالسكوت فقط ودخلو البيت وصعدو للدور الثاني ودخل غرفة نايف عشان يبدل له وينام اما العنود دخلت غرفتها ورمت الشنطه على السرير وفصخت عبايتها تعلقها على الشماعه وجلست على التسريحه تفصخ اكسسواراتها لين لفت من انفتح الباب وكان الكلام موجود على شفته لكن نسى كل شي كان بقوله واكتفى بالسكوت ونظراتها لها هي وفستانها الاحمر همس لنفسه : ماتدري اني ثور بنت عبدالله !
ارتكبت العنود من نضراته لها وقالت : شفيك ؟
حس على نفسه شوي وقال : لا بس كنت بقول اني بدلت حق نايف ونام خلاص هزت راسها بمعنى طيب وطلع وسكر الباب وتوجهه لغرفته يحاول ينسى الي شافه دخل يتروش وبعد الشاور طلع من الحمام والفوطه على خصره وشعره مبلل تجمدت بمكانها من حست فيه طلع من الحمام عقد حواجبها من شافها متواجده بغرفته واخذ الفوطه الثانيه ينشف شعره وقال : تبين شي ؟
استجمعت نفسها ولفت عليه وحمرّت خدودها من شافت جسمه لاول مره وجذبتها عضلات بطنه رمى راكان المنشفه بعد مانشف شعره وقال : مو وقت تأمل ايش تبغين ؟
حست على نفسها وقالت : مين قال اتامل ! كنت ادور شاحن لان شاحني نسيته ببيتنا تنهد وفتح الدرج الي بجانب سريره وطلع الشاحن ومده لها ابتسمت وخذت الشاحن منه وقالت : شكرا
مارد عليها وطلعت من الغرفه متوجهه لغرفتها عشان تنام
______________________
نكمل بعدين حبايبي ❤️
شرايكم بس فيني مدلعتكم ببارت طوووويل !!

حياكم انستا!