جدعت المقشاشة من يدي ياخ دا شنو انا تعبت نفس الموال كل يوم نضافة غسيل ما عارفة انا انسان ولا مكنة
_ي بت بتنقنقي مالك من الصباح بت الكسلانة دي ارفعي المقشاشة دي قبل ما اجيك "جاني صوت امي وهي بتكورك "
رفعت مقشاشتي براحة لانو لو جات ح تطين عيشتي تميت باقي النضافة دخلت غسلت العدة ونضفت المطبخ حالتي كانت بالبلاء قعدت في الكرسي قلت ارتاح شوية
_مريم انتهيتي متين شغل الكلفتة دا ما عايزة تخلي صاح
_ي امي في شنو تاني ما شغل كلفتة هدي عايني البيت نضيف
_يعني انتهيتي قلتي لي صاح طيب تعالي رفعت تحت السرير عايني دا شنو فتحت ورا الباب مسكتني من اضاني ح تخلي عادتك دي متين تكومي لي الوسخ ورا البيبان وتحت السراير
_اي يا امي ياخ خلاص والله ح انضفو تاني فكيني حارة ياخ
"فكتني ومشت مسكت اضاني وبقيت ببكي امي لي بقت تعاملني كدا لي ما بترحمني شوية بس ما شايفة غيري كل حاجة في راسي اي انا كبيرة البيت بس دا معناها كل حاجة اعملها انا تلاتة بنات وهي شايفاني انا بس قشيت دموعي ونضفت محل الوسخ دخلت الحمام استحميت وطلعت كانت بتحضر في التلفزيون مريم جيبي حاجات التسريح اعمل ليك شعرك وقولي لاخواتك يستحمو سريع ويخلو اللعب
_طيب ي امي ح اكلمهم
"جبتهم وجبت المفرش قعدت جنب رجلينها وهي بدت تسرح لي قالت لي عارفاك زعلانة انتي عارفة ي مريم انا بحمل عليك لي ودايما بعتمد عليك عشان اخليك تتعلمي المسؤلية واكون مطمنة انو ح تخلي بالك من اخواتك انا ما دايمة ليكم العمر كلو ي بتي انتي في عمر بديتي تفهمي ومتأكدة انك ح تفهمي كلامي عيوني دمعت قبلت عاينت ليها مسحت دموعي عارفاك لسى صغيرة بس قدرك تكوني كبيرتي وانتي الح تكوني مكاني لمن ربنا يأخد امانتو _امي ما تقولي كدا ربنا يخليك لينا ويطول في عمرك انا محتاجة ليك مكانتك ماف زول بقدر يسدها ولا حتى انا رقدت في رجلينها وبقيت ببكي
_ميمي ارفعي راسك حبيبتي ح اقول ليك كلام بس توعديني ح تختي حلقة في اضانك وتمشي بيهو عاينت ليها وبدت تتكلم انحنا مؤمنين بنؤمن بالقدر خيره وشره ي بتي رحمة ربنا واسعة وما بخت زول في اختبار مالم يكون عارف انو قدر الاختبار دا خلي ثقتك بربنا كبيرة وانا متأكدة انك قدر كل اختبار يتختى قدامك خليك قوية وما تضعفي ما تخلي قوتك مرتبطة بزول او اي حاجة او اي انسان لا انا لا ابوك اربطي قوتك بنفسك اعتمدي على نفسك في كل حاجة الحياة لسى طويلة قدامك ودا اول مطب ح يلاقيك اوعديني انك ح تعملي بكلامي كل ما تحسي نفسك ضعفتي قولي لنفسك انا قوية انا قدرها دي وصيتي ليك ي مريم
"بسمع في كلامها ووصيتها لي وكانت زي السكاكين البتطعن في قلبي كيف ح اتحمل واتقبل فكرة انو امي ح تموت ح اصحى في اي يوم والقاها ماف جنبي امي عندها كانسر وفي مراحلو الاخيرة وحصل ليهو انتشار لانو اكتشناهو متأخر الدكاترة بدوها مسكنات بس لانو ماف علاج ابوي حاول يقنعا نسافر برة وما نفقد الامل بس امي اتقبلت مرضها وقالت ما عايزة تموت وهي في مستشفى وتتعذب عايزة تموت جنبنا وبيناتنا ودا كان طلبها وابوي ما قدر يرفضو طلبت منو يقنعها كتير ويتكلم معاها تاني بس هو استسلم ببساطة وح يخلي امي تموت بكيت بهستيرية امي مسحت دموعها وحضنتي عليها بتي الحلوة اعرفي انو امك بتحبك شديد اسي قومي غسلي وشك وتعالي اتم ليك باقي شعرك كفاية بكى غسلت وشي تمت لي التسريح وانا سرحانة وبفكر وبالي بعيد مرام ومهرة جو جارين
