"مزمل طلع من الصالون وهو زعلان شديد وقف عاين لمرام وعاين لي وطلع الشارع بعديهو بشوية طلع ابوي وهو منفعل كان ح يضرب مرام لو ما علام وقف قدامها واتصدى ليهو وبقى مثبت ابوي وبحاول يهدي فيهو"
_انا عملت شنو في حياتي عشان تعاقبوني كدا مصايبكم بتجي ورا انا ما عرفت اربيكم ولا عرفت اعلمكم الصاح من الغلط كسرتو عيني وقصيتو ضهري بعمايلكم مسك المسند بيدو وجدعو بيها عمتو محاسن ويمة جو طالعين مخلوعين من جوة وبتسائلو في شنو والحاصل شنو وابوي مالو بكورك ابوي اتلفت عليهم وقال ليهم حضرة سيادتها عاملة لي دور حبكانيات ومع منو مع ود اختي ... اختي الانا وصلت معاها الحد بسببهم هم الكلام القالتو فيهم ما غلط اصلو ما غلطت عليكم لمن طردتكم من بيتها بس انا ح اربيكم من اول وجديد مرام كانت بتبكي وبتحاول تتكلم مع ابوي بس ما كان عايز يسمع كلام من زول خفت على ابوي شديد دي المرة التانية اشوفو مكسور الاولى كانت بعد وفاة امي كيف ما فكرت فيهو مشيت عليهو عشان اهدي شوية بس لزاني لحدي ما وقعت في الارض علام جا علي بلهفة بس صديتو وقلت ليهو بإنفعال ما ترفعني بقوم براي مهرة سندتني لحدي ما وقفت ابوي رفع اصبعو وبقى بمررو علينا انا ومرام وقال اسمعو هنا ي بنات يا اما تمسكو دربكم عديل وتفتحو عيونكم دي يا ام ح تكونو زي الحمير كل يوم تنضربو عشان تمشو عديل وما عايز اسمع حس ولا وحدة فيكم تاني اتلفت على عمتو محاسن وقال ليها ح تسوقي مهرة معاك قعدتها معاهم ح تضرها وح تبقيها زيهم عمتو محاسن قالت ليهو انا ح اقعد مع البنات وما ح اسوق مهرة ي عبدالرحمن
ابوي: محاسن ماف زول مقوي البنات ديل غيرك انتي كلمتي وحدة وما عايز ازيدها ح تسوقي مهرة وتمشي
محاسن: عبدالرحمن انا ما بخلي البنات وراي يا اما اسوقهم كلهم يا اما اقعد معاهم الخيار خيارك انا مستحيل اخليك تتعامل مع بناتي كدا انا واثقة فيهم ولو انت ثقتك بيهم اتعدمت انا بعرف بناتي اي مرام غلطت بس لازم تقعد مع مزمل وتسمع منو الاولاد ما ارتكبو جريمة
ابوي: مزمل وما ح ادي بتي مدام من البداية ما جاني عديل ما عندي بنات تاني انا اديهو وحدة منهم وما ح تسوقي البنات معاك عايزة تقعدي اقعدي برحتك
_ابوي ممكن تسمعني
ابوي: انتي بذات ما عايز اسمع صوتك فاهمة ولا لا
"مهرة بقت تكورك وهي ماسكة يمة الكانت واقعة في الكرسي عمتو محاسن بتحاول تصحي فيها علام قال لينا زحو خلينا نحاول نرفعها عشان نوديها المستشفى جريت غرفتها جبت ليها توب ولفيتو فيها مرام جابت لي عباية من فوق معاها لبستها ابوي وعلام رفعو يمة في العربية كانت راقدة في المقعد الورا ركبت جنب راسها وختيتو في رجليني وبقيت بمرر يدي علي وشها وبربت عليها براحة محاولة مني انو تصحى يمة ما فضل لينا غيرك يمة عليك الله اصحي ما تخلينا ريحة امي ح اشمها في منو تاني يمة عليك الله قومي اعفي لي ي يمة كلو بسببي انحنا عايزين رضاك علينا عليك الله ي امي اصحي علام نهرني وقال لي مريم خلاص اسكتي يمة ما ماتت عشان تعملي البتعملي فيهو دا اسكتي عمتو محاسن قال ليهو ما تكورك في البت وركز في الشارع قالت لي مريم ي بتي استهدي بالله ان شاء الله ما ح تحصل ليها حاجة ي بتي اول ما وصلنا المستشفى دخلوها الطوارئ وبدو يسعفو فيها ابوي ومرام ومهرة وصلو ورانا بقينا واقفين منتظرين واحد من الدكاترة يقول لينا حاجة بعد مدة جانا بتاع الامن وقال لينا انو ممنوع كلنا نكون هنا يكون معاها مرافق واحد او اتنين بالكتير عمتو محاسن قالت لي سوقي البنات برة ي مريم انا وعبدالرحمن بنقعد معاها
