"سكت لانو مضطرة المرة دي وفعلا مرام ما ح تشتغل بكلامي حاولت معاها كتير بس هي عنيدة عمتو محاسن ندهت لهندية وطلبت منها تعمل لينا شاي وتجي تقعد معانا بدل قاعدة براها إبتسمت ليها وقبل ما تمشي طلبت منها انو تعملو بالنعناع "
عمتو محاسن: مريم مش كنتي ما بتحبي الشاي
_امي بتحبو كدا فإتعودت عليهو
"ابتسمت ابتسامة باهت وقالت"_ربنا يرحمها ي بتي
"هندية جابت الشاي وبقينا نتونس اما مهرة فنامت وعمتو رقدتها جنبها في الكنبة عمتو محاسن رجعت بيتهم وخلت البيت فاضي شديد علينا كل يوم بتتصل تطمن علينا اما يمة ف ح تقعد معانا وقفلت بيتها لانو اصلا قاعدة براها كانت مأجرة نصو لإسرة فإقترحت عليهم يأجرو كلو وهم رحبو بالفكرة بدينا المدرسة وكنت بصحى بدري قبل مرام ومهرة عشان اجهز حاجاتنا بصحي مرام تخش الحمام اول حتى بعدها مهرة لانو ترحيلها بتأخر شوية انا ومرام بنمشي سوا اما هندية فقالت ليمة ما تشيل هم السندوتشات هي الح تجهزهم وتطلِع مهرة للترحيل يمة دعت ليها كتير وفرحت منها بالجد كنا بنحس بيها اختنا الكبيرة كانت حنينة شديد علينا عمتو وفت بوعدها وكل نهاية اسبوع بتجي تسوقنا ونمشي ليهم علام كان بتبسط شديد لمن يشوفنا بالاخص مهرة لانو صحبتو شديد وطول اليوم متعلقة في رقبتو الدكان بمشو عشرمية مرة في اليوم لحدي ما عمتو هرشتو عشان يذاكر والا هي الح تجينا تاني لحدي ما يخلص تالت... بقينا بنقرا سوا بتخلي مرام ومهرة يلعبو وتذاكر لينا مرة تراجع لي مرة لعلام ما شاء الله كان ذكي شديد استمرينا كدا بين بيتنا وبيت عمتو محاسن لحدي ما قرب شهر لإمتحاناتي مرام بدت تمتحن امتحانات نهاية الفصل الدراسي كنت بحاول اساعدها بس هي بترفض في النهاية طلبت مساعدة هندية فبقت بتراجع معاها لحدي ما خلصت امتحانات والحمد لله نجحت ...
"بكرة اول امتحان لي عمتو محاسن جات تقعد معانا هي وعلام مدة الامتحانات اما عمتو اميمة فكانت بتتصل من فترة والتانية ورِجلها انقطعت مننا كلما اسأل منها يمة تقول لي مسؤوليتها كبيرة عشان كدا اولادها في يدها عمتو اميمة "عندها 5 ما شاء الله " اربعة بنات وولد ولدها البكر واسمو مزمل هو وعلام في نفس العمر بعدو مناسك اصغر منو بسنة لمن يكونو سوا بتحسهم كانو تؤام بتشابهو شديد بعدهم رغد ودي في نفس عمري وصحبتي شديد رونق ورناد اصغر اتنين رونق اصغر مننا بسنتين ورناد في نفس عمر مهرة ما بنشوفهم كتير كانو معانا ايام العذاء الاولى ورجعو...
كنت خايفة ومتوترة شديد بس بتذكر انو لازم اتوفق واحقق وعدي لأمي البيت كلو كان مهتمي بي بقيت ما بمشي بالترحيل بوصلني ابوي وبنتظر معاي لحدي الجلسة ما تبداء كان براجع معاي وبدعي لي وبذكرني اتحصن وادخل واتوكل على ربنا فقدت حنية ابوي علينا من وفاة امي بس فترة الامتحانات رجعتها بعد اخلص ود جيرانا عندو ركشة ابوي متفق معاهو بجي معاهو علام يسوقوني الحمد لله خلصت وانا حاسة اني اشتغلت كويس عمتو محاسن بعد كم يوم رجعت عشان علام يستعد لإمتحاناتو المرة دي مرام اصرت تمشي معاهم وعمتو ساقتها ...
