"خلاص اسبوع ومنها العرس اتصل على علام صمت التلفون وختيتو جنبي تاني اتصل " بس الما انتبهت ليهو انو دا رقمو حق السودان " كنت عايزة اصمتو تاني بس اتخلعت لمن شفت الرقم رديت قبل ما اتكلم قال لي "
_اسمعيني ما وقت سلام وكلام كتير انا ح اجي بيتكم اسي وجايب امي ح ادخل اسلم واطلع القاك راجياني في العربية تمام
_علام جيت متين
_مع السلامة ي مريم واعملي زي ما قلت ليك "وقفل الخط "
"مشاعري كانت متلخبطة شديد بين مبسوطة وزعلانة كان عندي احاسيس كتيرة وما عارفة انا حاسة بشنو من الاساس ....مشيت كلمت هندية اني طالعة مشوار بسيط بقيت عايزة اعرف البس شنو قررت انو البس عباية بس عشان ابوي ما يشك انا ماشة وين طلعت احلا عباية عندي وعملت ميكب بسيط ختيت تلفوني وحاجاتي في شنطة صغيرة ونزلت تحت نسيبة ونسيم مقعدنهم في الارض بلعبو عايزة امشي من جنبهم نسيبة مسكتني من العباية بقيت بنده لمهرة لانو لو لحقت تتشبك فيني ما ح تسكت تاني مهرة جات شالتها دخلتها جوة وجات طالعة عشان تشيل نسيم علام وعمتو محاسن جو داخلين "
_عمتو محاسن: باب شارعكم فاتح مالو عرفناهو دا بيت عرس
"ضحكت ومشيت ضميتها وبقيت ببوس فيها مهرة قالت لي زحي انا زاتي مشتاقة ليها لزتني وضمتها هي وعمتو بتضحك ...علام وقف قدامي ومدا لي يدو وكان بعاين لي جوة عيوني مديت يدي سلمت عليهو وانا متفادية انو عيني تقع في عينو...حنى راسو شوية وقال لي دي شنو الحلوة دي ولا عشان انا مطول منك بقيتي حلوة كدا "كنت واقفة وح اموت من الخجل ابتسم وقال لي :يلا انتظريني في العربية خليتها فاتحة وانا ما ح اتأخر ومشى دخل جوة وانا طلعت ركبت في العربية زي ما قال لي ما عارفة انا بقيت مطيعة مالي واصلا بنفذ كلامو كيف دا زاتو نفس علام الكنا ما عايزين معاهو كلام تاني اسي زي الهبلة بتسمعي كلامو وكمان قاعدة في عربيتو كنت عايزة انزل بس جاني صوتو"
_على وين ي قمري
"عقدت حواجبي وعاينت ليهو "_علام انت شارب حاجة ولا شي
"بقى بضحك "_كل شي في وقتو حلو اسي اقفلي الباب وح افهمك كل حاجة وبعد داك القرار قرراك بس لازم تسمعيني في الاول
"قفلت باب العربية من غير ما ارد عليهو... اتحركنا وصل تلفونو ببلوتث العربية وشغل اغنية الراحل محمد وردي خوفي منك بصوت حسين الصادق كان مندمح معاها شديد ومع كل مقطع بتلفت على وبغني بصوت عالي
((كل كلمة من شفايفك احلى غنوة....كل نظرة من عيونك فيها سلوى))
(كل نسمة من ديارك فيها نجوى..كل همسة ي حبيبي يا حبيبي عندي حلوة))
((يا حبيبي عمري كلو عمري كلو كلو اهديتو لحبك ...))
كنت بعقد حواجبي وبعاين ليهو بطرف عيني ما عايزة اديهو اي ردة فعل هو عايزها لحدي ما اعرف فهمو شنو كان مندمح شديد لحدي ما جا مقطع بقول فيهو
