مهرة: والله عذبتينا عذاب ياخ ابوي انتو متأكدين انو واحد بطنها دي ما بطن طفل واحد
"كلنا بقينا نضحك على كلام مهرة هندية قالت لينا اسي تعالو ساعدوني مشيت ليها مسكتها من يدها لحدي ما قعدت ...مرام كانت متوترة شديد حضرنا المؤتمر كلو بس ما ذكرو اسمها بقت تبكي وقالت لأبوي انا ما نجحت اكيد ما نجحت ابوي قال ليها انا رسلت الرسالة لناس سوداني اسي بنعرف جبتي كم شيلي الصبر بقينا منتظرين الرسالة هندية قالت لينا انا ما قادرة اقعد في التوتر دا حسيت نَفَسي كتم مرام قالت ليها ارح نطلع برة انا زاتي حاسة نفسي مخنوقة طلعو الاتنين وانحنا بقينا منتظرين النتيجة تطلع جات رسالة في تلفون ابوي فتحها من ابتسامتو عرفت انو نسبتها حلوة
يمة: اها بشر ي عبدالرحمن
ابوي: جابت 85.7 "بقيت بظغرط من الفرح مرام جات جارية من برة ابوي كلمها بنسبتها طوالي فتحتو لينا بيت بكى وما كانت راضية تسكت لحدي ما ابوي اتكلم معاها وقال ليها احمدي ربنا ي مرام الحمد لله على نجاحك نسبتك دي ناس كتيرة بتتمناها ما تعترضي على حكمة ربنا وانا فخور بيك رفعتي راسنا
مرام: بس ي ابوي انا كنت عايزة اجيب اكتر من كدا وكان نفسي اتذاع ونفسي افرحكم
يمة: مرام تعالي لي ي بتي مرام جات وبقت قاعدة على رجلينها يمة ضمتها عليها وقالت ليها مبروك الف مبروك ما تبكي وامسحي دموعك ديل اسي انتي شايفة واحد فينا زعلان انحنا مبسوطين لنجاحك وربنا ما ضيع تعبك قولي الحمد لله
"مشيت ضميتها وقلت ليها سيد جرسة مبرووك ليك قالت لي الله يبارك فيك فجأة ضربت راسها بيدها وقالت لينا نسيت هندية برة كانت طالعة وهندية جات داخلة قالت ليها الليلة انتي معذورة ما بسألك وابتسمت ليها مرام مشت ليها وقالت ليها انا اسفة
هندية: ما تعتذري اها نقول مبروك مهرة قالت ليها نجحت وجابت 85 هندية ضمت مرام وقالت ليها مبروك ي احلا مرام وربنا يوفقك ي رب ودايما نفرح بيك كنا مبسوطين بنجاح مرام ابوي جاب حلاوة وبقى يوزعها في الشارع والعلبة المقفولة جابها لينا جوة ضيفنا بيها الجيران قلت لهندية تمشي ترقد لانو الحركة الكتيرة بتتعبها... هي ياداب داخلة الشهر التاسع الحمل كان تاعبها شديد من بدايتو لحدي ما الدكتور منعها من الحركة الكتيرة مهرة ومرام كانو بتناوبو في القعاد معاها عشان لو احتاجت حاجة يكونو جنبها اما انا فكنت مع يمة بس كنا فاقدين عمتو محاسن ...علام بعد خطوبة مزمل ومرام بإسبوع سافر هو وعمو بابكر وعمتو لحقتهم بعد شهرين كانو احلا شهرين عشان قاعدة معانا في البيت وخلال الشهرين ديل عملنا عرس ابوي وهندية كان بسيط شديد عملناهو في البيت بطلب من هندية بعد العقد عملو حفلة بسيطة مقصورة على الاهل القريبين وللان ما عارفة هندية غيرت رايها كيف ومنو القدر يقنعها ...فجأة في يوم انحنا كلنا مجتمعين حتى عمتو اميمة ابوي قال لينا مريم ومرام ومهرة انا عايز استشيركم في حاجة كلنا انتبهنا ليهو وبقينا عايزين نسمع الح يقولو قال لينا انا عايز اطلب هند من عمها رأيكم شنو ولو عندكم اي مانع انا ما ح امشي قلنا ليهو بصوت واحد موافقين ي ابوي ومهرة جرت عليهو ضمتو كنت شايفة الفرح في عيون ابوي ودا سبب كافي يخليني اعمل المستحيل بس عشان يفضل مبسوط ومرتاح وهندية تستاهل انو تكون فرد مننا من دخلت حياتنا وكانت بتملي الفراغ الجوانا بتحس بكل وحدة فينا انحنا ح نفضل ممتنين ليها طول عمرنا فضايلها علينا ما بتتعدا ...بعد العرس بشهرين كلمونا بخبر حملها فكرة انو ح يكون عندنا اخو او اخت تاني براها بتخلينا طايرين من الفرح البيت ح يكون فيهو طفل صغير وح يملا علينا البيت ...بالرغم من الاحداث الحصلت لينا بس كل يوم بالليل بقعد وبتذكر علام حاولت كم مرة انو اتواصل معاهو بس بتراجع وبمسح البكتبو قلت مدام هو قفل السيرة دي ماف داعي افتحها ...اما بالنسبة لي انا ورغد ما بقدر اقول رجعنا زي زمان بس علاقتنا اتحسنت في مواقف كتيرة حصلت اثبتت لي انو هي اتغيرت اما مناسك ف اتقدم ليها واحد قرايبهم من اهل ابوها وح يكون عرسها في نفس يوم عرس مزمل ومرام الحمد لله دي نعمة من ربنا وفضل من افضالو علينا بقينا مترابطين وبعدنا عن النزاعات والمشاكل حياتنا اتغيرت كتير بقينا ما بنعرف غير الفرح من كترت المشاكل المرينا بيها بقيت بخاف من كترة السعادة الحولينا وفي كل مرة بدعي انو ربنا يديم علينا السعادة وما نعرف الحزن من جديد لحدي ما في يوم يمة تعبت واصلا من الصباح انا حسيت بيها ما كويسة كانت بتعاين لي بطريقة غريبة لمن اسألها بتعاين لي مسافة حتى ترد قالت لي نادي اخواتك وتعالو اتونسو معاي كلكم عملت زي ما قالت اتجمعنا كلنا حولها وعملنا شاي وبقينا نتونس ونضحك البسمة الفي وشها نهائي ما اختفت كل تركيزي كان عليها مشيت عملت ليها عصير قالت لي ما عايزاهو حاسة الليلة بطني دي ما تمام قلت ليها طيب عايزة اجيب ليك حاجة تاني قالت لي لالا بس اقعدي معاي لحدي المغرب كدا بدت تتعب زيادة كلمت ابوي وقلت ليهو يمة دي ما كويسة خلينا نوديها المستشفى يكشفو عليها قال لي خلاص لبسيها طوالي مشيت لبستها ولبست لي عباية وكلمت مرام انو تقعد هي ومهرة مع هندية وما يخلوها براها بس هي اصرت تمشي معانا لاكن ما خليتها وقلت ليها مهرة ما مسؤولة خليك معاهم كدا بكون مطمنة حتى وافقت تقعد ...وانحنا في الشارع حسيت بيمة زي البتفقد الوعي وبتصحى بقيت بحاول اتكلم معاها بس ما كانت بتتجاوب معاي لحدي ما قربنا نصل المستشفى كانت فقدت الوعي حاولت اصحيها بس ماف رد منها ... اول ما وصلنا المستشفى طوالي دخلوها الطوارئ الدكتور بقى بكشف عليها ما طول شديد وجانا طالع وقال لينا الدوام لله المريضة اتوفت قلت ليهو كيف يعني انت بتقول في شنو اسي كانت كويسة ي دكتور شوفها تاني لالا انت بتكذب ابوي اتكلم معاهو ماتت كيف يعني
