_مهرة في الحمام من قبيل بخبط في الباب ما بترد
"عمتو محاسن وقفت جنب الباب خبطت وبقت تتكلم مهرة حبيبتي انتي سامعاني مهرة ي بتي ردي علينا ...شوية والباب فتح مهرة كانت مبلولة بالموية شديد حتى ملابسها وبترجف كلنا اتخلعنا لمن شفنا حالتها مسكتها زحيتها من الباب عشان اقدر ادخل الحمام شلت بشكير وبقيت بنشف فيها مرام مشت تجيب ليها غيار نضيف من جوة عمتو بتحاول تتكلم معاها بس ما كانت بتتجاوب ضمتها عليها وبقت تتكلم معاها مالك ي بتي بسم الله الحصل عليك شنو مهرة ي بتي اتكلمي معاي مرام جات راجعة شلت منها الملابس دخلتها الحمام غيرت ليها ملابسها وطلعت معاها برة كانت بترجف شديد ونهائي ما اتكلمت دخلتها الغرفة رقدت وغطيتها عمتو محاسن بقت بتقرا ليها في راسها ما اخدت زمن ورجعت نامت بعد نامت عمتو ساقتني برة الغرفة وخلينا مرام معاها قالت لي مريم اختكم مالها انتو من امبارح ملاحظة ليكم ما طبيعين في شنو ي بتي انتو داسين مني حاجة كلموني قلت ليها عمتو ما تخافي ماف حاجة بس مهرة كانت محمومة واحتمال عشان عيانة عملت كدا بعدين ح اوديها العيادة اطمني ماف حاجة داسنها منك "ما عارفة كذبي على عمتو صاح ولا غلط بس العارفاهو انو هي ما مفترض تعرف لحدي ما مهرة تتكلم "طول اليوم مهرة لا اتكلمت لا اكلت لا شربت العصر تعبت شديد وهبطت علام ساقنا مشينا بيها المستشفى طلع عندها هبوط حاد ركبو ليها دربات اتصلت على ابوي كلمتو عشان يجينا في المستشفى... وصلنا وجات معاهو هندية ابوي كان مقلق شديد لحدي ما شافها وطمنتو حتى هدأ الدربات خلصت علام اصر الا نرجع معاهم البيت بس ابوي رفض وقال انو احسن نرجع بيتنا ودعنا علام ورجعنا البيت كنت ساندة مهرة ودخلت بيها جوة يمة اول ما شافتها جات ضمتها وبقت تبكي واخيرا بعد الصمت الطويل مهرة اتكلمت مع يمة وقالت ليها ما تخافي يمة انا كويسة سندتها لحدي ما طلعنا غيرت ليها ملابسها ورقدت في سريرها قعدت في طرف السرير وانا بعاين ليها دموعي بدت تنزل مهرة فتحت عيونها وعاينت لي
_مريم انا كويسة ما تبكي
_طيب ما عايزة تتكلمي معاي لي
_هدي اسي بتكلم معاك
_طيب احكي لي ي اختي وريحي بالي وطمنيني
_مريم ما تخافي ماف حاجة احكيها ليك
_طيب مالك يوم الكرامة مشيتي وين ولي جيتي بتبكي
"سكتت مسافة وقالت لي "_مشيت الدكان وانا في الشارع في كلب سكاني وما لقيت زول معاي وقعت في الارض بس الحمد لله الكلب مشى مني وما عضاني بقيت قاعدة في مصطبة واحد من البيوت علام لمن جا لقاني هناك "
_مهرة ما تكذبي علي قولي الحقيقة
_دي الحقيقة ي مريم
"ما حبيت اضغط عليها "_طيب ي مهرة الحمد لله انك كويس اسي ارتاحي وح اكلم ابوي يتصل على المدرسة عشان بكرة ما تمشي
