في يوم انا قاعدة في البيت بتصفح في التلفون جاتني رسايل كتيرة من رقم غريب فتحت الرسايل وكانت عبارة عن صور وفديوهات بذيئة اتخلعت من الشفتو في تلفوني حاولت اعرف الرقم حق منو بس ما قدرت مسحت الرسايل وحظرت الرقم في نفس اللحظة بعديها بشوية اتكررت نفس الحاجة من رقم تاني كنت خايفة اسأل اصلا صاحب الرقم منو اتمكلني خوف شديد وبقيت ما فاهمة البحصل والارقام دي بتجي من وين مسحت الرسايل وحظرتو ...بقت الحركة تتكرر كل مرة من رقم جديد وبنفس الاسلوب كنت بمسح وبحظر من كترة صوت الرسايل صمت التلفون جدعتو في السرير وقمت وانا متوترة شديد دخلت الحمام منو الممكن يرسل لي حاجات زي دي المشكلة هو ما شخص واحد والارقام الكتيرة دي جابها من وين ومنو الممكن يستفيد من حركة زي دي طلعت من الحمام مهرة قالت لي عمتو محاسن جات تحت نزلت سلمت عليها وبقيت بتونس معاها قعدنا في الصالة ومرام مشت المطبخ تعمل عصير لعمتو يمة قالت ليها اعملي كتير عشان تدي ابوك زاتو يشرب... في قعدتنا مهرة جات نازلة وشايلة تلفوني في يدها حسيت الدنيا ضلمت ونفسي كتم بقيت بدعي ان شاء الله ما تكون فتحتو مدتو لي وكان فاتح وقالت لي مريم دا شنو الفي تلفونك دا خطفتو منها سريع وقلت ليها بنهرة انتي بتهبشي مالك ما تشيلي تلفوني تاتي عمتو محاسن شكلها لمحت حاجة لمن مهرة مدت لي التلفون خطفت مني التلفون وبقيت تعاين في الجواهو وهي مصدومة عاينت لي بنظرة عمري ما ح انساها كأنو بتقول لي دي انتي ي مريم نظرة خيبة امل قالت لي مريم دا شنو الفي تلفونك دا وجبتي الحاجات دي من وين ابوي قال ليها في شنو ي محاسن التلفون فيهو شنو عمتو محاسن قالت ليهو مافيهو حاجة ي عبدالرحمن ابوي بنبرة حادة محاسن جيبي التلفون دا عمتو حاولت تقفلو وما تدي ليهو بس هو جا وقف قدامها وشالو منها بالقوة مداهو لي وقال لي افتحي الزفت دا انا جسمي كان برجف ابوي والله دي ما انا قاطعني وقال لي بنهرة قلت ليك افتحي التلفون دا ي مريم مديت يدي الكانت بترجف شديد وفتحتو ليهو ابوي بقى ما شايف قدامو اول حاجة عملها جدع التلفون بالحيطة لحدي ما اتفكفك حتة حتة مسكني من شعري وقال لي دي نهاية ثقتي فيك تعملي كدا ي مريم دا جزاء ابوكم كدا فكاني ودخل جوة جاب الحزام وجا طالع يمة حاولت تمسكو وتهدي قالت ليهو ي ولدي ما تضربها عليك الله ...انا حاولت كتير اقول ليهو والله دي ما انا والله ما عارفة دي شنو بس ابوي كان معمي كان بضربني بكل قوتو يمة وعمتو محاسن الاتنين حولو يمسكو بس ما قدرو انا استسلمت وما حاولت ادافع عن نفسي تاني مرام جات جارية وضمتني عليها عشان تدافع عني كم ضربة جات فيها كانت بتقول لابوي كفاية ي ابوي حرام عليك ما تدقها عليك الله خليها وقف ضرب مسكني من يدي وبقى جاريني لحدي ما دخلني الغرفة دخل وقفل الباب قال لي انا غلطت في شنو كلميني قصرت منكم في شنو لي تعملي كدا لي دايرة تنزلي راسي وتكسري عيني كان بتكلم وبضرب فيني صوتو كان مخنوق وهو بتكلم قلت ليهو والله ي ابوي انا ما عملت حاجة والله دي ما انا قال لي اسكتي ما عايز اسمع صوتك اسكتي مسك يدو الكان بضربني بيها بيدو التانية دليل على انو وجعتو طلع وقفل الباب على ما حاولت اقوم من مكاني وفضلت راقدة لحدي ما مرام جاتني جارية جوة وهي بتبكي ضمتني عليها وانا بصرخ وببكي بأعلى صوت" ماف اصعب من احساس انك تتعاقب على حاجة انت اصلا ما عملتها وعلى غلط ما إرتكبتو "مهرة جابت لي موية حاولت تشربني بس انا ما كنت قادرة جسمي كلو واجعني قلت ليها ما عايزة مسحت وشي بشوية موية وقالت لي مريم معليش ما تزعلي مني ما كنت عارفة ابوي ح يعمل كدا والله ما قصدي مسحت ليها دموعها وقلت ليها ما مشكلة الذنب ما ذنبك حاولت اقوم سندتني مرام ومهرة لحدي ما رقدوني في السرير ضميت رجليني علي مرام قعدت جنبي ومهرة طلعت برة
