مرام: على راحتك بس ابوي ما ح يخليك تمشي
_ح اكلم يمة تكلمو ... بكرة ان شاء الله من الجامعة ح امشي ليهم في البيت بس ح اتصل عليها اكلمها اول
"اتصلت على عمتو وكلمتها اني ح اجي اقعد معاهم كم يوم فرحت شديد وقالت لي ح اخلي علام يجيك في الجامعة يجيبك بعد تخلصي ما تجي بالمواصلات قلت ليها طيب تمام وقفلت منها نزلت ليمة كلمتها اني ماشة لعمتو محاسن كانت زعلانة مني بس بتمنى يتفهمو موقفي طلعت جهزت حاجاتي ورتبتها ابوي جا من الشغل مرام مشت عملت الغداء انا ما اكلت معاهم وقلت ليهم شبعانة انتهيت من ترتيب حاجاتي صليت المغرب حسيت نفسي جعتَ كان نفسي في اندومي عاينت لجذلاني لقيت مافيهو قروش سألت مهرة قالت لي خلصتهم مرام فتحت شنطتها وطلعت لي قروش وقالت لي ح تتجنبي ابوي وما تتكلمي معاهو لمتين
_لحدي ما احس نفسي قادرة اتكلم معاهو ولو عشان شلت منك القروش ح تديني محاضرة فما عايزاها
_مريم ما دايرة معاك عوارة ...الله يهديك ي اختي
_عايزين معاي ولا اعمل لنفسي براي
"مرام قالت ما عايزة ومهرة قالت لي ح اكل معاك لبست عبايتي وطلعت الدكان اشتريت تلاتة اندومي لانو متأكدة اول ما اختها مرام ح تاكل معانا رجعت البيت دخلت المطبخ وعملتهم عملت فيها شوية ليمون وجبنة طلعت شلت التربيزة وختيتها وندهت ليهم عشان ياكلو مهرة جات ومرام قعدت في السرير وبقت تعاين لينا قلت ليها تعالي تعالي حاسبة حسابك معانا ابتسمت وجات اكلت معانا ...
مهرة: انا فاقدة هندية اسي كانت ح تاكل معانا
مرام: حتى انا والله...بكرة نتصل عليها نشوف الحصل معاها شنو اسي الزمن إتاخر
_ممكن ما تجيبو سيرة هندية وانا قاعدة لانو بحس انتو قاصدين تستفزوني
مرام : طيب سكتنا ...
"الصباح بدري صحيت بالمنبه دخلت الحمام استحميت وطلعت صليت الصبح حاضر ماف حاجة بتخليني احس اني مرتاحة وخفيفة اكتر من صلاة الصبح صحيت مهرة ومرام عشان الصلاة ما تفوتهم لبست وجهزت حاجاتي قعدت وبقيت بقرا الورد بتاعي مرام جات عاينت لي بإستغراب وقالت لي لابسة من بدري كدا مالك
_منتظرة الشمس تطلع عشان امشي الجامعة
_مريم انتي جنيتي من بدري كدا
_اي عندي محاضرة بدري وما عايزة افوتها
_محاضرة ولا عايزة تطلعي قبل ابوي
_ماف سبب يخليني اكذب واعمل كدا عشان شنو
"مرام مشت من جنبي ورقدت لسى في وقت لترحيلهم اول ما الشمس بدت تطلع نزلت تحت عايزة افتح الباب سمعت صوت ابوي وراي "
_ماشة وين بدري كدا
"اتلفت عليهو بقيت بمرر نظري عليهو حسيت كانو ابوي كبر فجأة خمسين سنة كان شاحب وملامحو جدية شديد "_ماشة الجامعة
