شفنا مزمل قميصو كان ملان دم انا حسيت الدنيا دورت بي وبقيت ما قادرة اتحرك من شافنا اتحرك على اتجاهنا مرام جرت عليهو وبقت تسأل من ابوي وحالتو كيف مسكها من يدها وجا وقف قدامي كنت خايفة اسمع منو انو فقدت ابوي زي ما فقدت امي اتعاد على نفس الاحساس ونفس الخوف مهرة ماسكاني شديد من يدي عاينت لمزمل وقلت ليهو ابوي مات صاح ي مزمل مرام كوركت فيني وقالت لي انتي بتقولي في شنو انتي غبية قلت ليها ابوي مات انا عارفة مرام رفعت يدها وادتني كف رفعت عيوني وعاينت ليها وبقيت ببكي باعلى صوت مرام ضمتني عليها وبقت تبكي مزمل قال لينا ممكن تسمعوني وتسكتو وتبطلو البتعملو فيهو دا خالي عبدالرحمن كويس ما فيهو حاجة والحمد لله جات خفيفة من قال كدا سكت وقلت ليهو ابوي كويس ي مزمل يعني ما مات قال لي اي كويس الحمد لله واسي ح ادخلكم تشوفوهو علام كان ساكت وبعاين لينا اتلفت على يمة الكانت قاعدة في واحد من الكراسي نزلت على ركبي وقلت ليها ابوي كويس ي يمة ابوي ما مات ضمتني عليها وقالت لي الله يخلي ليكم ي بتي وما تشوفو عليهو شر
مهرة: مزمل انا ماشة اشوفو
مزمل: تعالو معاي عشان اوريكم غرفتو وين
"مسكت يمة وبقيت سانداها ومشيت ورا مزمل لحدي ما دخلنا الغرفة ابوي كان مجرح كم جرح في وشو ومركبين ليهو درب و صاحي الحمدلله اطمنا عليهو ...سألت مزمل الحادث حصل كيف وهو عرف قبلنا كيف قال لي خالي جانا في البيت وكان زعلان شديد ومن حقو يزعل اتكلم مع امي لمن طلع حاولت اقنعو انو انا اسوق ليهو وما اخلي يطلع بالحالة دي لانو منفعل شديد بس هو كان رافض انا ما قدرت اخلي يمشي براهو فركبت معاهو خالي كان سايق سريع ومنفعل اتلفت اتكلم معاي في عربية قدامنا وقفت فجأة ونسبة لانو نحن جارين دخلنا فيها بس الحمد لله ربنا لطف
مرام قالت ليهو بقلق :اسي انت كويس والدم الفي قميصك دا شنو
مزمل: اتلفت عليها ورسم بسمة على وجهو انا كويس والدم دا لانو خالي اتجرح بقزاز العربية وفي وحدة من جروحو عميقة ولمن كنت بحاول اطلع فيهو الدم جا في قميصي
"اتلفت على ابوي مسكت يديو وقلت ليهو : ابوي انت كويس في حاجة واجعاك
ابوي : انا كويس ما تخافو الدكتور قال ماف شي بخوف بس الجروح دي وشوية رضوخ الحمد لله جات سليمة
يمة: اعفي لي ي ولدي اريتني لو ما كلمتك
ابوي : العفو يمة دا المكتوب وماف منو مهرب
علام: حمدلله على سلامتك ي خالي
ابوي: الله يسلمك ان شاء الله
مهرة: انا خفت عليك شديد "ابوي مسكها من خدها وقال ليها ما تخافي هدا بابا كويس ابتسمت ليهو ورقدت في حضنو
"عمتو محاسن جات داخلة وجات معاها عمتو اميمة والبنات ومعاهم عمو نصر الدين اول ما شفت عمتو اميمة وقفت على حيلي وقلت ليها انتي الجابك شنو عايزة مننا شنو تاني
