_صحيت على صوت مهرة وهي بتربت على كتفي براحة وبتدعك في عيونها باين عليها انها صحت ياداب
_ميمي انا ما لقيت ماما تعالي خشي معاي الحمام
"عيوني دمعت كيف ح اقدر افهم مهرة انو امي ما ح تكون موجودة تاني مسكتها من يدها البيت كان ملان شديد ومعظمهم بدا يصحى كل الحمامات ملانة ماعدا حمام غرفة امي وابوي وقفت جنب باب الغرفة جات مارة في ذاكرتي منظر امي راقدة وكيف انا اتصنمت في مكاني مهرة فتحت الباب وجرتني معاها دخلت اول ما دخلت جاتني ريحة امي الغرفة كانت ملانة بريحتها قعدت في سريرها شلت مخدتها وبقيت ببكي فيها مهرة لمن شافتني ببكي بقت تبكي معاي _ميمي مالك بتبكي ما تبكي انا ببكي
"ضميتها علي مسافة بعدها مسحت دموعي ومسحت ليها دموعها وبقيت بتكلم معاها" _مهرة انتي عارفة امنا وين اسي
"عاينت لي بإنتباه"_وين ي ميمي
_امنا في الجنة في مكان حلو شديد
_وح تجي متين انا عايزاها
_ما ح تجي تاني ي مهرة "عيونها بدو يرقرقو "_ما تبكي حبيبتي ماما ح تزعل لو شافتك بتبكي امنا قاعدة هنا"ختيت يدي في محل قلبها" ودايما ح تكون موجودة ما ح ننساها ح تفضل عايشة جوانا زي ما قالت لينا
"ختت يدها في قلبها وقالت "_ماما قاعدة هنا وبعدها ابتسمت
_ابتسمت ليها وسقتها الحمام قلت ليها انتظري هنا لحدي ما اجيب فُرشنا من برا طلعت برا الغرفة شلت الفرش بقيت بفتش على مرام ما لقيتها فتشت البيت كلو خفت تكون طلعت من غير ما ننتبه جيت مارة جنب بير السلم سمعت صوت شهقات عاينت وراي لقيتها مرام ضامة رجولها عليها ومنزلة راسها وبتبكي جريت عليها خفت تكون حصلت ليها حاجة
"مرام مالك في حاجة عايني لي مرام اتكلمي معاي رفعت راسها وبقت تعاين لي من غير ما تتكلم مرام اتكلمي عليك الله مالك بتبكي بمسح ليها في دموعها وبتكلم معاها "_ كلكم بتمشو تخلوني ماف زول بحبني
_كيف ماف زول بحبك
_ماما مشت وما ح تجي وحتى انتي خليتني براي فتشتك ما لقيتك سقتي معاك مهرة بس
_ما مشيت محل انا قاعدة انا جيتك ما ح اخليك براك انا معاك
_زحي مني انا ما عايزاك انتي بتحبي مهرة بس
_مرام انا بحبك انا بحبكم انتو الاتنين انتو الاتنين اخواتي
_لالا بس قلت ليك امشي
"عمتو اميمة سمعتنا بنتكلم جات مخلوعة "_مالكم ي بنات قاعدين هنا بسم الله
"مرام قامت وحضنت عمتو "_عمتو اميمة سوقيني معاك
_مرام تعالي معاي مهرة هي الصحتني مرا..."قاطعت كلامي وقالت"_اسكتي انا ما عايزاكم ما عايزة اتكلم معاك
