فكرت فيها وفي نظراتها لي حسيت بتأنيب الضمير مشيت عشان اقول ليها تجي ترقد جنبنا بس لقيتها نايمة رجعت رقدت ونمت صحيت الصباح بدري والمرة دي نشيطة على غير العادة لقيت امي بتصلي وقاعدة في المصلاية بتدعي وفي اثر دموع في عيونها ما شافتني مشيت من جنبها سريع ما حبيت انها تشوفني دخلت الحمام استحميت واتوضيت طلعت من الحمام لقيت امي انتهت "_ صباح الخير ي ست الكل
_صباح النور حبيبتي
_مالك الليلة ي امي وشك شاحب كدا في شنو حاسة بحاجة في حاجة واجعاك
_ما فيني حاجة تعبانة شوية ح ادخل ارقد صلي واعملي الشاي وتعالي اشربي معاي
_سلامتك ان شاء الله طيب خشي وانا ح اعملو
"صليت وعملت الشاي وانا بفكر في امي وقلبي واجعني عليها دقيت باب غرفتها جاني صوتها جوة عشان ادخل دخلت وبقيت بفتش على ابوي _ امي ابوي وين طلع ولا شنو
_اي طلع اسي مستعجل عندو شغل ضروري قال
_كيف طلع وخلاك كدا ما شافك تعبانة كيف كان يقعد معانا الليلة عشان يكون معاك
_"امي ابتسمت وقالت لي "_ميمي تعالي اقعدي جنبي "قعدت جنبها وبقت تتكلم " ملاحظة ليك الفترة دي بتعاتبي ابوك كتير لي في شنو
"نزلت راسي "_ماف حاجة بس انا زعلانة منو عشان ما حاول يقنعك نسافر وتتعالجي برة
_طيب انا ح احكي ليك قصة تمام
"عاينت ليها بإسغراب " قصة ؟؟!قصة شنو
_قصتي انا "انتي عارفة انو انا وابوك زمان كنا اصحاب شديد دا قبل العرس طبعا كان وما زال ملجأ بالنسبة لي بفهمني قبل ما اتكلم الحب البحبني ليهو ابوك عمرو ماف زول حباني ليهو قبل كدا ولا في زول ح يحصل مكانو
_طيب ي امي لي اسي بقى ما بحبك
_منو القال ليك بقى ما بحبني جبتي الكلام دا من وين
_لانو زعلك امبارح والليلة خلاك وح يخليك تمو..."سكت وما قدرت اتم باقي الكلام"
_امي إبتسمت وختت يدها في شعري انتي متين كبرتي لمن بقيتي تحللي كدا وضحكت طيب خليني اواصل باقي حكايتي انتي عارفة اني يتيمة صاح لانو ما عندك لا جد لا جدة امي اتوفت في ولادتي وابوي بعدها بسنتين لحقها ربنا يرحمهم ويتقبلهم ماف زول رباني واعتنى بي غير خالتي سمية هي الكبرتني وعلمتني وخلتني اعتمد على نفسي وهي امي الانا فتحت عليها
_يعني ي امي يمة سمية ما امك "استغربت اكتر لمن سمعتها"
_لالا ما امي هي الربتني ومن قمت بقول ليها امي سمية المهم اسي كبي لينا الشاي نشرب واحكي ليك باقي حكايتي " كبيت الشاي شربت منو وواصلت كلام" بيتنا وبيت ناس ابوك كان فاتح في بعض كنت بلعب مع اخواتو اللهم عماتك كبرنا واتربينا سوا ابوك اكبر اخوانو زي ما عارفة
