قريب العصر فقدت مهرة ماف بقيت بسأل منها بس ما لقيتها في البيت حسيت الدم اتجمد في عروقي ما خليت زول ما سألتو منها كلهم ما عارفنها وين ندهت لعلام ...
_علام انا ما لاقية مهرة ...مهرة ماف ي علام
_كدي انتي اهدي وقولي بسم الله احتمال طلعت مشت الدكان انا ح امشي اشوفها تمام
"علام طلع من البيت وانا بقيت واقفة جنب باب الشارع مرام جات وققت جنبي "_ما لقيتها ي مريم ماف جوة فتشت كل ركن في البيت
_كلمت علام مشى يشوفها في الشارع الله يستر عليك ي اختي مشيتي وين "ما قدرت اتحكم في دموعي البتنزل ورا بعض "_مرام ما تكلمي يمة تمام
_ما كلمتها ماف زول لاحظ ما تخافي
"شفت علام ومعاهو مهرة كانت ماسكة فيهو وبتبكي انا ومرام جرينا ليها مسكتها وبقيت بتفقد فيها لو مجروحة ولا مضروبة بس ماف اثر حاجة "_مهرة مشيتي وين خوفتينا مالك بتبكي
علام: مريم اسي خليها خلينا ندخل جوة وبعدين بهداوة ح نسألها باين عليها الخوف حاولت اسألها كتير بس ما إتجاوبت معاي
_مسكتها من يدها مسحت دموعها ودخلنا البيت دخلتها الحمام غسلت ليها وشها
"وانحنا طالعين من الحمام عمتو محاسن شافتنا جات علي " مريم ي بتي مالكم مالها مهرة
_ما عارفاها بس قالت لي تعبت ...اسي ح ادخلها جوة ترتاح
_كر علي ي بتي باين عليها في وشها خلاص دخليها ترتاح عشان ما تمرض
"دخلتها الغرفة وقفلتها علينا من جوة قعدنا في السرير وبيقت بسأل فيها "_مهرة حبيبتي مشيتي وين ومالك ساكتة كدا وسرحانة في شنو حبيبتي ما تخوفيني عليك "مهرة ضمتني وبقت تبكي وما عايزة تتكلم "_انا قلبي وقف اتأكدت انو حصلت ليها حاجة ما قدرت اتمالك نفسي بقيت ببكي معاها
_مالك ي مهرة ما تخوفيني في زول عمل ليك حاجة اتكلمي ما تخافي انا معاك "حسيت بيها ما ح تقدر تتكلم لانو كانت بتبكي شديد فسكت خليتها تبكي عشان ترتاح بكاها بالنسبة لي سكاكين بتطعن في قلبي بدت تهدا وشوية شوية شهقاتها قلت لحدي ما نامت مسحت ليها دموعها ورقدتها كويس غطيتها وبقيت بتأمل فيها وهي نايمة طلعت من الغرفة وقفلتها عليها راسي بقى بودي ويجيب ما حبيت احسس زول بحاجة ونبهت مرام برضو خلصنا اليوم بقدرة قادر وانا بالي كلو مع مهرة الضيوف طلعو نضفنا البيت وضايرناهو عمتو اميمة رجعت فضلنا نحنا بس المساء ابوي جا عشان يسوق يمة ومهرة عشان المدرسة اصلا ماخدين اذن لمرام عشان عيانة بس طلبت منو ياخد اذن ليها بكرة عشان تعبانة حتى عمتو محاسن وافقتني في طلبي ساق يمة ومشو بعد البيت فضى قعدنا في الحوش وعمو بابكر بقى بتونس وبحكي لينا وقال لينا اتفاجأت لمن شفتكم ما شاء الله كبرتو انسان طيب شديد وبشوش اتونس معانا شوية بعدها استأذن مننا لانو تعبان من السفر عايز يرتاح مشت معاهو عمتو محاسن فضلنا انا ومرام ومهرة مهرة سرحانة بس وما بتجاوب على اي سؤال ...في محاولتنا انو نخلي مهرة تتكلم جا علام وقف قصاد مهرة ونزل على ركبو عشان يكون مقاصدها بقت تعاين ليهو مسك ليها يدينها وقال مهرة انا اخوك الكبير صاح هزت ليهو راسها بمعنى اي واصل كلام مدام انتي عندك اخ ومعترفة بيهو لي ما واثقة فيهو مهرة سكتت مسافة ونزلت راسها وقالت انا واثقة فيك بس... علام واصل كلام طيب مدام واثقة فيني لازم تكوني عارفة انو بوجودي ماف زول ح يإذيك والبمسك بسوء انا ح ادفنو تحت الارض بس انتي قولي لي الغلط في حقك وانا بعرف اتصرف ما تخافي من حاجة طول ما انا عايش ما تخافي واعرفي انو اخوك في ظهرك " مهرة بقت تبكي "_اسي امسحي دموعك واحكي لي فجأة وقفت على حيلها وبصوت عالي قالت ماف زول عمل لي حاجة ما عايزة اتكلم كلكم بتغصبوني على حاجات ما عايزاها خلوني في حالي علام وقف على حيلو وقال الغصبك على حاجة ما عايزاها غيرنا منو ي مهرة اتكلمي مهرة من علام قال كدا سكتت وبقت تعاين ليهو قالت ليهو ولا زول وجرت دخلت جوة مرام لحقتها انا اتصنمت في مكاني اكيد في حاجة حاصلة ليها وخايفة تتكلم اكيد في زول عمل ليها حاجة ي رب ما يكون زول مساها بضر بتكلم بسري وانا في خوف جواي وان شاء الله ما يكون دا الحصل معاها علام كان قاعد وبرضو شكلو سرحان وبفكر في الانا بفكر فيهو اتلفت عليهو وقلت ليهو علام منو الممكن يعمل كدا في طفلة علام عاين لي بخلعة مريم بتقولي في شنو امسحي الافكار دي من بالك مستحيل يكون دا الحصل معاها هي بس خايفة ح ترق وتحكي لينا
