_علام كيف يعني عندك مشروع وح تسافر تمشي وين ي ولد ابوك جاي بكرة كيف تعمل كدا ما عايزة معاك كلام كتير ولا تبرير ح تجي اسي ي علام كلمتك سكتت مسافة وقالت بصوت عالي علام جيت جيت ما جيت انا ما عافية ولا رضيانة عليك وقفلت الخط في وشو
"عمتو كانت زعلانة شديد مهرة جابت ليها موية انا قعدت جنبها بقيت بحاول أهدي فيها ي مريم ي بتي علام الناس جاين في بيتو يقول مسافر من متين بقى بتصرف كدا من غير ما يفكر
_معليش ي خالتي اعذري وعايني لنفسك ضغطك ح يرتفع اسي هو ح يجي ما تزعلي نفسك "مشيت المطبخ عملت ليها عصير ليمون واديتو ليها عشان يهدي اعصابها شوية... شلت التلفون اتصلت عليهو المكالمة الاولى ما رد علي تاني حاولت بعد مسافة رد على التلفون
_علام في شنو
_مريم انتي عارفة كويس انا ما عايز اقعد في البيت لشنو خالتي ح تجي وح اشوف زفت مناسك دي في بيتنا انتي ما عارفة انا لو علي اخنقها اكتلها وارتاح منها كان بتكلم وهو هايج شديد مريم ح اضطر اسلم عليها دايريني اجي البيت كيف
_اسي انت اهدا شوية ما عشان مناسك ولا غيرها عشان امك وعشان ابوك الماشفتو من قبل كم سنة دا كلو ح يتبخر عشان مناسك جاية علام اسمعني انت تعال راجع البيت وانا بوعدك ما ح تقيف قصادك خليها علي بس انا ح أأدبها ليك اصلا عايزة معاها سبب ولقيتو
"علام قعد يضحك من غير ما يحس"_انتي مجنونة والله سكت مسافة وقال خلاص تمام ح اجي راجع
"عمتو اميمة وبناتها جونا العصر كدا جابهم عمو نصر الدين دخل سلم علينا سأل من مهرة وين اتلفت عاينت ليهو مسافة مستغربة من سألو بالله مهرة جات زي القدر جارية من جوة وقفت سلمت على عمتو لاحظت لعمو نصر الدين ما نزل عينو منها نظراتو ليها ما مريحاني نهائي سلم عليها وبقى ماسك يدها مسافة جيت وقفت جنبها وجريت يدها منو "عمو نصر الدين اتفضل اقعد قلت كدا وانا بعاين ليهو جوة عيونو "
_انتبه على نفسو وقال لينا لالا انا طالع طوالي وشال رجلينو وطلع
"قبلت على مهرة "_مهرة انا قلت ليك انتي كبرتي ماف داعي للجري وحركات الشفع دي والله تاني تتجاري ما اخليك
_خلاص ما تجوطي فيني ما ح اعمل كدا تاني
_اسي امشي جيبي موية لعمتك وبناتها
"مشت وانا بفكر في راجل عمتي دا كمان جانا من وين مهرة ما شاء الله عليها كل ما تكبر بتقى احلا بس الحمد لله الجات ضعيفة هي ومرام زي ما بقولو عود فرنسي انا عشان اسمن منهم بشوية مزمل بقول لي دبدوبة لازم اوعي مهرة واكلمها تخلي بالها من تصرفاتها قريب المغرب علام جا داخل البيت مَسكل لي في تلفوني عرفتو وصل مشيت لعمتو وقلت ليها تمشي الصالون لانو موصيني اخليها تجيهو عشان يراضيها عمتو مشت ليهو وانا قلت ليهم رايكم شنو نعمل قهوة كلهم رحبو بالفكرة "
