وانا في المطبخ سمعت صوت جوطة طلعت من المطبخ وبقيت بحاول اركز في الاصوات عشان اقدر افرزهم لحدي ما جاني صوت عمتو محاسن جريت ليها جري كانت بتبكي وتوصف يحليل كبيرتنا ي مريم "ضمتني عليها بقيت ببكي معاها وما كنت راضية افكها الا مرام فكتني منها بالعافية"
عمتو محاسن: الدوام لله ي بناتي ربنا يرحمها ويتقبلها
_اللهم امين ي رب
"دخلنا معاها جوة ومشينا الغرفة الفيها هند ...عمتو اتحمدلت ليها السلامة وقعدت جنبها...مهرة طلعت من الغرفة جابت ليها موية وقدمتها ليها عمتو بقت تتكلم مع هند وسألتها عن صحة نسيم ونسيبة هندية طمنتها وقالت ليها كويسين الحمد لله الدكتور طمني على صحتهم والله ي هند انتي بت اصول ما بتصدقي انا فرحت كيف لمن عرفت انو سميتي وحدة من بناتك نسيبة ماف مرا بتقبل حاجة زي دي
هندية: اقل حاجة ممكن اعملها عشانهم والله ي محاسن وياريت لو في يدي اكتر من كدا ما كنت ح اتردد ولا ثانية اني اعملها في النهاية هم برضو بناتي ومن الكلام الاتحكى عن نسيبة بتمنى بتي ما تكون شايلة اسمها بس ويكون طبعها زيها
_ما عارفين انحنا ح نقدر نجازيك كيف ي هندية شكرا ليك على كل حاجة انتي عملتيها عشانا
هندية: العفو ي مريم ما تقولي كدا بزعل والله
"سكتنا مسافة بسيطة بعدها عمتو قالت لي من يوم العزاء ي مريم قدر ما حاولت اتكلم معاك ما قدرت.. اتصلت كم مرة في تلفون عبدالرحمن واتكلمنا كلنا مع مهرة ومرام الا انتي ما قدرنا نصل ليك علام اتصل في تلفونك بس بكون مقفول"
_والله ي عمتو تلفوني من البكاء تاني ما عارفة ختيتو وين ولا اتذكرتو تاني
عمتو محاسن: ما مشكلة معزورة ي بتي وعمك بابكر وعلام بوصلو تعازيهم ليك وبسلمو عليكم كلكم
مهرة: يعني هم ما جو معاك ي عمتو
عمتو محاسن: ما قدرو يجو معاي عندهم شغل ونزلتهم صعبة اسي علام عشان يقدر يلقى لي طريقة اجي بيها بعد تعب لانو إقامتي كانت خلاص قربت وعايزة تجديد بابكر قال لي تقعدي لمن نجددها والله ي بناتي كنت قاعدة في جمر وانا بعيدة منكم
مرام: ما مشكلة ي عمتو اسي وجودك معانا كفاية
"لمن شفت عمتو اتوقعت انو ح اشوف علام من تاني بس ظني خاب كنت متخيلة انو ح يكون عايز ينزل عشانا بس ولا هاميهو ...مع كلام عمتو اتذكرت تلفوني قعدت معاها شوية وقمت طلعت منهم بقيت بفتش فيهو في النهاية لقيتو في ضلفة يمة ...اول ما فتحتها جاتني ريحت المسك الزي ريحتها دايما بتقول لينا نكوي ليها ملابسها بالمسك ودي الريحة الكانت بتميزها وقفت مسافة فاتحة الضلفة سرحت في ذكريات يمة لحدي ما انتبهت على نفسي طردت الافكار من راسي و مسحت الدمعة النزلت من عيني شلت تلفوني ومشيت ختيتو في الشاحن انتظرتو شحن بسيط فتحتو ونزلت خليتو في الشاحن مشيت لهندية لقيت نسيم صاحية وبتتثائب شكلها كان حلو شديد بستها في يدها هندية قالت لي مريم انا ما قادرة افتح عيوني عايني ليهم عايزة انوم شوية
