ما كنت قادرة اشوف حاجة تلفوني فتشتو عشان اضوي بيهو بس ما لقيتو بقيت بنده ليهم بصوت عالي وخلاص الخوف اتملكني سمعت صوت مهرة وهي بتقول لي مريم قومي بسم الله بتبكي مالك ي بت قولي بسم الله ...فتحت عيوني وقعدت في السرير استغفرت ومسحت دموعي قلت ليها كنت حلمانة مهرة جابت لي موية شربت منها شوية و قالت لي : عشان تاني ما تنومي مع المغارب اسي قومي انحنا عايزين نجهز لانو طالعين قلت ليها طيب ح اقوم مسحت وشي بيدي وبقيت بستغفر مسافة حتى نزلت من السرير ودخلت الحمام طلعت صليت المغرب وبديت اجهز بعد جهزنا رفعنا الحاجات في العربية واتحركنا على المزرعة الفيها التخريج اول ما وصلنا مزمل كان مشغول بموضوع التذاكر عمتو محاسن ومعاها يمة وابوي وعمتو اميمة ومعاهم عمو بابكر وعمو نصر الدين كانو في مقاعد الVIP وانحنا في مقاعد الجمهور حجزنا مقاعدنا قدام عشان نقدر نشوف رتبنا الحاجات وبقينا قاعدين لحدي ما التخريج بدا الشركة المنظمة ابدعت في تخريجهم كان مرتب بطريقة حلوة شديد حتى الاغاني الاختاروها الخريجين كانت حلوة استمتعنا بكل لحظة فيهو لحدي ما شفنا عمتو محاسن وعمو بابكر في المسرح بعدها ندهو اسم علام اصحابو بقو يصفرو و يكوركو ليهو وانحنا وقفنا وبقينا نظغرط كنت مفتكرة علام زول هادي وما بتاع فارغة وامور زي دي بس صدمني صدمة عمري رقص رقيص مع اصحابو لحدي ما اتغيرت الغنية لغنية ((امي ي نبع الحنان ومحنة ما بتعرف حدود ... ي جنة من اعلا الجنان كتوف عيالك ليك عود )) بصوت احمد امين طلع المسرح قلع روب التخريج ولبسو لعمتو محاسن وسلم عليها في راسها اتأثرت بالغنية وموقف علام اتذكرت امي الله يرحمها هند لكزتني وقالت لي ما تبكي مسحت دموعي بعدها الغنية اتغيرت لغنية ((بحر عاديك يا الطوال ايديك ...نصيحة وحكمة العاقل ما بعاديك ي نمر )) بصوت محمد بشير كان مختارها لعمو بابكر سلم عليهو في راسو وعمو بابكر بقى بِعرض معاهو في المسرح كل الناس اتفاعلت برقيصهم سوا حتى اصحابو طلعو وبقو يعرضو معاهم لحدي الغنية انتهت ومشى استلم شهادتو نزل من المسرح مشى لناس يمة وعمتو اميمة سلم عليهم مهرة نادتو جا علينا كلهم باركو ليهو الا انا ماقدرت وهو رجع قعد جنب اصحابو الفرحة ما كانت سايعاهو ...التخريج انتهى علام قال عندهم برنامج هو واصحابو ساق معاهو مزمل ومشو وانحنا رجعنا البيت غيرنا ملابسنا واي زول شاف ليهو مكان ينوم فيهو انا النوم غلبني كلو كلو مسكت تلفوني زهجت منو قمت فتحت التلفزيون فتشتو كلو ما لقيت حاجة مفيدة وانا بقلب في القنوات سمعت صوت كركبة خفت شديد افتكرتو حرامي الصوت كان طالع من المطبخ قمت وبقيت بتسحب براحة براحة عشان ادخل جوة مع مهرة ومرام بس في زول مسكني من يدي كنت ح اصرخ
_ما تكوركي ي متخلفة دا انا
_علام ياخ الله يخلعة مالك بتتسحب زي الحرامية قطعت قلبي
"علام ضحك "_جيت اشيل موية ما كنت مفتكرك جبانة كدا واسي البتسحب زي الحرامي انا ولا انتي
