قالت لي يلا قومي نادي لي ابوك قمت قبل ما اطلع نادت بإسمي اتلفت عليها قالت لي عافية ورضاينة عليكم ي بناتي ابتسمت ليها وطلعت كلمت ابوي انو يمة عايزاهو دخل ليها بقيت قاعدة مع عمتو محاسن علام جانا جوة قال لي ارح عشان ارجعكم البيت ابوك قال ماف داعي لقعادكم في المستشفى والصباح ح اجيبكم
_انا ح اقعد مع يمة هنا ارجعو انتو ما بقدر اخليها
عمتو محاسن: علام وشك دا مالو والجرحك شنو ي ولدي
علام: ماف حاجة ي امي ضربة بسيطة ما تأخدي بالك "اتلفت علي وقال لي قولي كلامك دا لخالي... اسي انا ح اجيب اخواتك عشان ادخلهم يشوفو يمة وح نطلع "
اتجه على البوابة اتكلم شوية معاهم وطلع بعد شوية جا راجع ومعاهو مهرة ومرام ابوي طلع من يمة علام كلمو قال ليهو ح نشوف يمة ونطمن عليها وح نطلع عاين لي ورجع نظرو لأبوي وقال ليهو مريم قالت عايزة تقول ليك حاجة مهرة ومرام سبقوهو جوة وهو دخل بعديهم
ابوي: مالك عايزة شنو
_عايزة اقعد مع يمة ي ابوي
"قال لي بنبرة حادة "_انتي بقيتي ما بتفهمي من الكلمة الوحدة يعني الا اكرر كلامي وامد يدي حتى تمشي عديل ح تمشي البيت وترجعو الصباح والا ح احرمك تجي المستشفى لمن خالتي سمية ترجع البيت بالسلامة
_خلاص خلاص ي ابوي ح امشي
ودعت عمتو محاسن وقلت ليها عايزة اشوف يمة تاني قالت لي ي مريم بكرة ح تجي اسي خليها ترتاح واخواتك جوة عشان ما تتعب
_طيب ما ح ادخل
"انتظرتهم لحدي ما طلعو علام وقف مع عمتو شوية وانحنا طلعنا قال لينا العربية فاتحة فتحت الباب وركبت ورا مهرة قعدت جنبي مرام قعدت قدام علام طلع وجانا اول ما وصل العربية وقف مسافة قدام الباب وبعاين لي فتح الباب وقفلو بزهج وهو متنرفز كان سايق بسرعة مهرة كوركت وقالت ليهو علام سوق براحة عايز تموتنا اعتذر منها وقلل السرعة شوية وصلنا البيت طلعت فوق غرفتنا دخلت الحمام استحميت اتوضيت طلعت شلت المصلاية وعباية الصلاة والمصحف بتاعي نزلت تحت ومشيت غرفة يمة فتحت الباب فرشت المصلاية صليت بعد خلصت بقيت بقرا في قرأن قعدت مدة طويلة في مكاني لدرجة لمن جيت اقوم حسيت رجليني نملو من القعدة وما كنت حاسة بيهم رقدت في سريرها بقيت ضامة مخدتها علي وببكي سمعت صوت الباب بدق صلحت قعدتي مسحت دموعي وقلت اتفضل علام فتح الباب وقال لي انا جبت اكل قومي اكلي ليك حاجة
_ما عايزة ما عندي نفس خليني انوم بس
_مريم قومي اكلي ما ح اخليك تنومي بدون اكل
_ياخ انت عايز مني شنو لي متلصق فيني كدا ولازم اعمل اي حاجة انت بتقولها ارحمني ياخ وخليني في حالي كلكم خلوني في حالي انا تعبت والله تعبت كفاية علي الانتو بتعملو دا
