يمة اتلفتت على مرام وقالت ليها امكم ما غلطت في حاجة غلطها الوحيد كان طيبة قلبها وانو ما وقفت اميمة عند حدها من زمان وخلتها تتمادى كانت بتقول لي ربنا يهديها ي يمة اعمل ليها شنو حسيبها رب العالمين
_طيب ي يمة الحصل شنو انحنا لازم نعرف لي عمتو اميمة بتتصرف كدا
يمة: زمان حبوبتك كانت جارتي ورفيقتي وعشرة عمري وياهو البنات كانو بلعبو مع بعض وداخلين مارقين مع بعض في يوم ابوكم ضرب اميمة عشان اتشاكلت مع نسيبة وحذرها انو ما تعمل كدا تاني واميمة كانت هي الغلطانة بس من وقتها اميمة حاقدة على امكم انتو عارفين انو عمتكم ما كانت راضية ابوكم يتزوج نسيبة بتي كل يوم شكلة وجوطة حتى بقت تملا لإمها في راسها وتقول كلام عن نسيبة وهو ما فيها
مرام: ولي امي ما حكت لينا الحاجات دي
يمة: كانت خايفة تحقدو على عمتكم وتجافوها امك طول عمرها بتفتش على المحنة
_يعني بسبب الحاجة البسيطة دي اسي عمتو بتعمل كدا
يمة : لالا ي بتي امك كانت صحبة محاسن شديد بالرغم من تعامل اميمة معاها برضو كانت بتمشي ليهم وقالت لي ما بنقطع عن صحبتي سبحان الله البيت الجمبنا اجروهو اسرة جات من السعودية عايزين يقعدو فيهو فترة اجازتهم وراجعين كانو طيبين شديد مراة وراجلها وعندهم ولدين الكبير اسمو حازم والتاني نصر الدين
"قلت ليها بإستغراب "_نصر الدين ؟؟!
يمة: اي ياهو نصر الدين راجل عمتك كانو بسيطين وطيبين شديد عاشرناهم وعشرونا اها لمن قربو يرجعو جات ام نصر دين وطلبت مني يد نسيبة بتي
"قاطعت يمة "_كيف الكلام دا يعني الكان عايز يخطب امي زمان ياهو عمو نصر الدين
يمة: اي ياهو بس انتي عرفتي كيف قلت ليها انو كلمتني امي ...يمة واصلت كلام وقالت بعد كلام امو معاي كلمت نسيبة بس رفضت طوالي انا اتكلمت معاها كتير وفي النهاية قالت لي عايزة استخير بعد استخارت كان كلامها نفسو وقالت ما موافقة كلمتهم واعتذرت ليهم وقلت ليهم ماف نصيب يلا ابوك سمع بالكلام دا فحبوبتكم طوالي جاتني وطلبت نسيبة وهي وافقت
مرام: طيب لحدي اسي عمتو اميمة مالها مع امي
يمة: عمتك كانت خاتة عينها على نصر الدين كانت بتحوم حولو كتير وهو ما كان شايف غير امكم لمن طلب امكم هنا عمتكم كانت عايزة تجن كيف يطلب نسيبة وهي ناقصها شنو عشان يشوف نسيبة وهي ما يعاين ليها زعلت شديد واتهمت نسيبة بتي انو هي كانت عارفة انو هي عايزاهو كيف تخلي يعاين ليها وقالت ليها لو انتي ما اديتيهو ضو اخضر ما كان اتصرف كدا وقال عايزك انتي ... نسيبة الله يرحمها حاولت كتير تفهما بس هي كانت رافضة وفي راسها في راسها حتى قالت انو اتزوجت ابوكم عشان بس تغيظها
