جيت مارة بالصالة لقيتهم ماف وعلام راقد في الكنبة اتحركت عايزة امشي علام قال لي انا طالع ح اشيل التلفون عشان اصلحو واول ما يتصلح ح اعرف منو الورا الصور دي
_قلت ليهو ح تقدر كيف تعرف
_قال لي عندي طريقتي "تلفونو اتصل شفت الاسم وكانت مناسك حسيت نفسي اتضايقت كنت ح امشي بس وقفني وقال : مريم ما تمشي
_ما امشي لي
_اي تصرف انا بتصرفو لسبب معين ي مريم زي ما انا واثق فيك خلي عندك ثقة فيني
_ما بقدر ي علام فكرة انك متواصل مع البت دي ح تخليني اجن
"ابتسم وقال لي بخباثة "_تجني لي بتأثر فيك بشنو
"اتوترت من بسمتو السخيفة دي ونظراتو"_ما بأثر فيني بحاجة كل مافي الموضوع انو هي سبب سوء الفهم البينك وبين مزمل
_يعني انتي زعلانة عشان في خلاف بيني وبين مزمل
_اي وح ازعل على شنو تاني
"صرة وشو واتلفت مني" قلت ليهو اسي انت صريت مالك ورد على بت الناس دي لانو اتصلت مليون مرة اتبسطت عشان قدرت اقلب الطاولة عليهو ...
طلعت فوق دخلت الغرفة سألت مرام من عمتو ويمة وين قالت لي دخلو غرفة يمة وانحنا طلعنا فوق عاينت لمهرة كانت سرحانة وبتفكر في حاجة ندهت عليها اتخلعت من سمعت اسمها واتلفتت علي
_اي ي مريم
_سرحانة وين انتي
_ساي بس
_طيب تعالي اقعدي جنبي انا عايزاك
"جات قعدت جنبي" قلت ليها : مهرة حبيبتي مش انحنا واعدين بعض انو كل حاجة بتحصل ح نحكيها لبعض وانو نكون صريحين وما نخبي حاجة قالت لي اي قلت ليها طيب ي مهرة انتي لي ما عايزة تحكي لينا الحاصل معاك شنو لي ما عايزة تريحي قلبي وتقول لي الحصل شنو في اليوم داك
_سكتت مسافة بعدها قالت لي بس انا خايفة ي مريم
_خايفة من شنو ي مهرة قولي لي ما تخافي انا معاك لو خايفة من عمو نصرالدين انا معاك وح نتصرف
"رفعت عيونها وعاينت لي "_لالا ما من عمو نصر الدين اصلا ما عمل حاجة تخوفني
"صلحت قعدتي وبقيت بسمع فيها بإنتباه مرام قالت ليها طيب خايفة من منو ي مهرة "ظهر عليها انو اتوترت شديد خفتها تتراجع وما تحكي لينا "_مهرة حبيبتي اياً كان الانتي خايفة منو ما ح يحصل خليك واثقة فيني
"عيونها دمعت وقالت لي :خايفة من مناسك وعمتو اميمة ي مريم
"قلت ليها بخلعت"_مناسك ؟؟! مناسك عملت ليك شنو عشان تخافي منها
مرام: اصلا انا البت دي ما كنت مطمنة ليها
مهرة: مناسك قالت لي لو كلمتي مريم بالسمعتيهو او عرفت بالغلط انك اتكلمتي انا ح اكتلتك وماف زول ح يعرف مكانك وين وعمتو اميمة جات علي وخنقتني وقالت لي والله نكتلك ونشرب من دمك
