_ابوي مفكر يعرس تاني ي علام قادر تتخيل انو ابوي فكر في حاجة زي دي ومن منو عايز يتزوج هند البت العاشت معانا في بيتنا وعديناها وحدة مننا ابوي فكر يتزوجها "علام سكت وظهر انو اتفاجأة من كلامي" واصلت كلام وقلت ليهو اكتر حاجة واجعاني انو يمة واقفة معاهو حتى مرام ومهرة واسي انا في نظرهم ما عايزة مصلحة وسعادة ابوي مسحت دموعي ما عارفة اتصرف كيف ي علام ما عارفة انا صاح ولا غلط" اتلفت عليهو " حتى انت ح تفكر عني كدا صاح ماف زول قادر يفهمني
"الويتر رجع وجاب معاهو طلبنا انا قبلت بوشي منو عشان ما يشوف وشي علام اعتذر منو وقال ليهو عايزين موية الولد قال ليهو العفو ومشى علام مدا لي كاس ما فهمت منو حاجة غير الشكلاتة المغرقاهو قلت ليهو دا شنو قال لي دا اسمو كأس السعادة امسكي من يدي وبعد تأكلي اديني رايك فيهو كنت ح اقول ما عايزة بس صراحة شكلو مغري شلتو منو وبديت اكل "انا ما كنت قادرة اعبر اساسا من جمال الباكل فيهو صدق القال الشكلاتة سر السعادة كنت باكل وعلام بضحك فيني عاينت ليهو بطرف عيني وواصلت اكل ما كنت عايزاهو يخلص قلت ليهو علام عايزة تاني
_ضحك فيني ماف تاني المرة الجاية
_عليك الله ياخ
_مريم انا ما رافض عشان ما عايز اجيب ليك لاكن عشان صحتك اي هو حلو واي حاجة لاكن دسم شديد ما انفع تكتري منو
_طيب عايزة موية
_مداها لي من جنبو قلت ليهو متين جاب الموية
_ضحك وقال لي لمن كنتي غايصة في الشكلاتة
"بقينا بنضحك الاتنين "_عاين لي مسافة خليك بتضحكي ي مريم البكاء ما شبهك وانا ما اتعودت اشوفك بتبكي "انا ارتبكت من نظراتو لي شكلو حسى علي وطوالي غير الموضوع وقال "_احكي ليك قصتي مع كأس السعادة كنت ياداب برلوم في الجامعة وانا بطبعي ما اجتماعي شديد وما بخش في الناس بسرعة كان عندي صحبي اسمو محمد ...محمد دا فرض نفسو علي محل ما اكون قاعد بجي بقعد معاي مع انو اصحابو كتار بس كان بجيني انا وهو عكسي تماماً زول اجتماعي لدرجة كل الجامعة بتعرفو شوية شوية اتعودت عليهو وعلى وجودو بدل ما كنت انسان منعزل بقيت شخصية اجتماعية اصحابو بقو اصحابي وبقينا شلة بس محمد كان اقرب واحد لي عارف كل صغيرة وكبيرة عني كان عندنا امتحانات انا كنت مستاء شديد وحسيت اني ما اديت المادة حقها دخلت الامتحان لمن طلعنا ما كنت اشتغلت فيها كويس محمد اول ما شافني عرفني ما اشتغلت فيها قال لي ي زول ارح قلت ليهو. ح نمشي وين قال لي ارح بس ركبنا المواصلات وطلعنا جينا الكافي دا وقعدنا في نفس المكان الاسي قاعدين فيهو لمن الويتر جانا قال لينا عايزين شنو محمد قال ليهم عايزين حاجة تجيب لينا السعادة طلعنا من امتحان اسي وامورنا جايطة الشاب ضحك علينا ومشى بعدها جاب لينا كأس السعادة زي ما سميناهو انا ومحمد
_طيب محمد وين اسي ي علام لانو ما بشوفو معاك
"علام نزل راسو سكت مسافة وهو في نفس الوضعية قال لي اتوفى قبل سنتين غرق في النيل القاعدين فيهو اسي دا ... محمد مع انو انسان بشوش البشوفو بقول انو ما عندو هم في الدنيا بس كان بخفي همومو بضحكو وهظارو مع الحوليهو كان بحسس اي زول انو هو جنبو وسندو وهو الكان فاقد السند وفاة محمد هزتني شديد لدرجة كنت ما قادر امشي الجامعة بطلع من البيت وبجي بقعد هنا قضيت فترة انا طول اليوم بكون قاعد في مكاني دا لحدي ما يقفلو المحل حتى اطلع كنت بسأل نفسي سؤال واحد كيف انا كنت بعتبرو اقرب انسان لي وانا ما قدرت افهمو وما قدرت احس بألمو بين يوم والليلة اختفى من حياتي في كل لحظة بتمنى لو كنت صديق افضل بالنسبة ليهو زي ما هو كان مسح دمعتو واتلفت علي ح اقول ليك حاجة وحدة ي مريم انا اتعلمتها ما كل انسان بضحك معناها كويس كلنا جوانا ألم ما بنقدر نحكي لاي انسان ما تندمي زي ي مريم انتي ما عارفة ابوك جواهو شنو وهو ماري بشنو اكيد ما نسى امك بالعكس هو اكتر انسان اتدمر بعدها مريم انتو كنتو صغار بس ابوك عشان معاها سنين بينهم عشرة عمر بينهم قصص كتيرة انت ما عارفاها الانسان ما بالساهل ينسى شخص كان عزيز عليهو بس الحياة ماشة وانحنا لازم نتجاوز المُر الفيها بالحولينا وبوقوفهم معانا محمد كان صحبي وح يفضل ومكانتو ماف انسان ح يحصلها بس ما معناها انا ما ح اصاحب تاني ودا الح يحصل مع ابوك امك مكانتها ما ح تتأثر وكونو قرر يكمل حياتو انتي اكتر شخص مفترض تفهمي وتفرحي لقرارو انا حكيت ليك قصتي والحصل معاي عشان تتعلمي منها وفي النهاية انتي الح تقرري سكت عاين على اتجاه الموية مسافة ابتسم وقال ولا ما كدا ي صحبي "كنت براقب في علام كلامو هزاني وخلاني افكر واشوف حاجات انا ما كنت شايفاها وواخدة بالي منها فتحت قارورة الموية شربت منها وغسلت وشي فتحت الشنطة طلعت التلفون واتصلت على هند الجرس الاول التاني حتى ردت علي ...
