طلعت غرفتي بعد ما شفت الحزن الفي وجوه ناس بيتنا دخلت الغرفة الكانت مقلبة فوق تحت بقيت برتب فيها لحدي ما حسيت نفسي تعبت دخلت الحمام اتوضيت وطلعت صليت ركعتين قعدت في المصلاية وبقيت بدعي لأمي بالرحمة دعيت ليها كتير ودعيت ربنا يقويني ويصبرني على البحصل لينا رقدت في المصلاية غفيت في مكاني صحيت بصوت حركة جنبي فتحت عيوني كانو مرام ومهرة بتجهزو للمدرسة قمت بخلعة وقلت ليهم مالكم ما صحيتوني الاتنين عاينو لي بس وحدة فتحت خشمها معاي ماف قبلو مني وكل واحدة رجعت للبتعمل فيهو قلت ليهم بتكلم معاكم مالكم ما بتردو علي شالو شنطهم وطلعو من الغرفة وخلوني انا بتكلم براي نزلت وراهم تحت يمة كانت في المطبخ وجهزت ليهم فطورهم بقو منتظرين تراحيلهم ...
_يمة صباح الخير
_صباح النور ي بتي "ردت لي من غير نفس وظاهر في ملامحها الزعل "
_يمة حتى انتي زعلانة مني ممكن اعرف انا عملت شنو عشان كلكم خاتين الحق علي مع انو انتي اكتر وحدة مفترض تفهميني وتكوني حاسة بي وحاسة بالانا حاسة بيهو
_مريم ما ح اتناقش معاك اسي بس انا عندي معاك كلام كتير خلي اخواتك يطلعو وبعد داك انا بكلمك انتي غلطتي وين
"ما رديت عليها ابوي كان طالع جا وسلم على يمة والبنات قبل ما يتكلم معاي انا طلعت الغرفة دخلت الحمام استحميت طلعت صليت بعد انتهيت شلت تلفوني اتصلت على رغد عشان اكلمها اني الليلة ما ح اجي الجامعة بس ما ردت على اتصلت عليها مكالمة تانية نفس الشي ما ردت عليها بعد فصل كتبت رقم علام وانا بين اتصل ولا ما اتصل وحتى لو اتصلت ح اقول ليهو شنو ح احكي ليهو بأبوي وهل ح يفهمني ويفهم تبريري ولي انا اتصرفت كدا ولا ح يخت الذنب علي زي ناس بيتنا غيرت رأي طفيت التلفون وجدعتو في السرير تميت باقي ترتيب الغرفة فرشت الملايات ونزلت تحت لقيت يمة لسى في المطبخ طلبت منها تطلع وانا ح اواصل في البتعمل فيهو بس هي رفضت طلعت نضفت البيت ورجعت ليها في المطبخ...
_يمة انتي الليلة تعبتي خلاص كفاك
_ح تاكلو شنو لو انا رقدت
_انا ح اطبخ ي يمة ما تشيلي هم
_حا تتابعي شغل البيت وتخلي جامعتك زي ما خليتيها الليلة
_الليلة اوف ما خليتها
_مريم ما تكذبي لاني انا عارفة انك الليلة عندك دوام بعدها سكتت مسافة وقالت دي ح امررها ليك بس تاني اوعك تكذبي علي "قفلت النار من الحلة "_تعالي معاي برة عايزاك
"طلعنا برة قعدت وقعدتني جنبها وقالت لي : مريم انتي لسى صغيرة وقدامك كتير عشان تتعلمي والدنيا دي ياما ح تعلمك دروس ح تستفيدي منها وتكون ليك عبرة والدروس دي ح تعلميها لاولادك واحفادك بعدين زي ما انا اسي بعمل الدنيا دي ما بتقيف على زول ي مريم ي بتي وكلنا نهايتنا كوم تراب وانتو ي بناتي ضيوف في بيت ابوكم ح يجي نصيبكم وح تمشو بيوتكم وح تخلو ابوكم براهو في اللحظة ديك ح تندمي لانك وقفتي في طريق ابوك وفي وشو ...ابوكم لسى صغير ومن حقو يفكر يتزوج تاني وما عشان هو قرر يواصل حياتو معناها نسى امك ...امكم الله يرحمها ما بتتنسي بس الدنيا محتاجة الشريك البمشي معاك لحدي نهاية الطريق انتي ي بتي كبيرة وواعية وانا ياني بقول انتي اعقل وحدة في اخواتك بس ي بتي ما تخلي حبك لامك يعميك ويخليك ما تشوفي سعادة ابوك وراحتو وين براك شفتي لمن هند كانت قاعدة معانا هنا البيت كان كيف واسي شوفي يوم واحد طلعت من البيت وشالت روح البيت معاها
