***بعد مرور 5 سنوات...
"رفعت سماعة التلفون الكان بتصل من غير توقف "_ياخ مالك ياخ
_ملا اب شوك قومي شوفي الساعة كم المحاضرة ضاعت علينا
_محاضرة شنو وانتي منو اصلا
_مريم قومي والا ح اتصرف معاك تصرف تاني لمن نتلاقى
_خلاص خلاص ما تنقي لي في راسي
"فتحت عيوني إتثائبت بكسل مررت نظري على الغرفة عيني جات على مرام الراقدة وما قامت عشان تمشي المدرسة قمت بخلعة عشان اصحيها لقيت راسها فيهو قطعة قماش مبلولة اتحسست حرارتها كانت محمومة شديد طلعت من الغرفة لقيت هندية في الباب شايلة كباية لبن
_مريم صحيتي متين كنت عايزة اصحيك اسألك من المحاضرة
_ مالها مرام ومحمومة من متين
_من امبارح بالليلة الجو برد بالليل وجيت عشان اشوفكم متغطين ولالا بس لقيتها محمومة شديد عملت ليها مكمدات واديتها خافض حرارة شوية ارتاحت بس قريب الصبح تاني الحمى جاتها واسي منتظرة ابوك يصحى عشان نسوقها العيادة
_ما عارفة من غيرك كنا ح نعمل شنو ي هندية بالجد شكرا ليك انتي شكلك ما نمتي انا ما ح امشي الجامعة انتي ارتاحي
_بتشكريني انا معقولة ي مريم وماف كلام زي دا ح تمشي جامعتك والا ح اكلم ليك يمة
_لالا خلاص الا يمة
"بقت بتضحك فيني "
_ يلا اسي امشي اجهزي وبعد نمشي الدكتور بتصل بطمنك تمام
_طيب تمام
"دخلت الحمام سريع سريع لانو اتأخرت شديد لبست و شلت شنطتي ونزلت لقيت يمة قاعدة تحت بتقطع في بطاطس "
_يمة صباح الخير
_صباح النور مالك الليلة متأخرة
_متأخرة شديد والله لاكن اسي طالعة
_طيب خلي بالك ي بتي
"طلعت لاقيت ابوي في الباب وشايل اكياس في يدو شكلو كان في الدكان "_اسعد صباحك ي ابوي
_وصباحك كمان
_الليلة ما شغال ؟؟
_لالا ما ح امشي عشان ح اسوق مرام الدكتور
_ااا صاح نسيت طيب انا ماشة
_يلا خلي بالك من نفسك وعايني كويس في الشارع
_حاضر مع السلامة ...
"ركبت المواصلات البتودي على الجامعة ركبت سماعاتي وسرحت في الشارع والفي الخمسة سنة المرت من عمرنا في لمح البصر مرت علينا ايام صعبة بس قدرنا نتجاوزها بوجود الحولينا معانا عمتو محاسن بقت لينا ام بعد فقدان امنا حتى يمة بكبر سنها ما حوجتنا لحاجة والحمد لله على وجودهم وصلت الحامعة نزلت من المواصلات واتصلت على رغد "_الو انتي وين انا في البوابة
