_اتكلمي ي عمتو في شنو ما تقلقيني
_خالتي سمية اتصلت علي وكلمتني بالحصل معاكم وموضوع هند و ابوك ...ي مريم انتي...
"قاطعتها قبل ما تتم كلامها"_عمتو محاسن انا فكرت في الموضوع دا ولقيت انو ما صاح الانا عملتو وغلطتَ في ابوي وهند واتصلت على هند بس هي قال انو ما فكرت في حاجة زي دي وما ح تفكر
"عمتو سكتت مسافة وهي بتعاين لي قامت وسلمت علي في راسي"_الله يكملك بعقلك ي بتي ريحتيني بكلامك كنت شايلة هم لانو خالتو سمية قالت لي مريم ما متقبلة زول يفتح معاها الموضوع دا ...سكتت مسافة وواصلت كلام في النهاية ي بتي الحاجة دي قسمة ونصيب وابوك لو عندو قسمة معاها بلقاها
_ونعم بالله ي عمتو
"حسيت نفسي مرتاحة بالجد طلعتي مع علام ريحتني شديد قضيت مع ناس عمتو يومين ورجعت بيتنا اول ما وصلت مشيت ليمة سلمت عليها اشتقت ليها والله قعدت جنبها وحكيت ليها بالحصل يمة فرحت مني ومن تصرفي بس زعلت عشان هند رفضت ترجع ورفضت ابوي... الايام كانت سريعة وبتتشابه شديد مؤيد حركاتو معاي بقت زايدة برسل لي كل يوم في الواتس وانا بتجاهلو حتى في الجامعة بقيت بتجنب الكلام معاهو الوضع بقى مضايقني شديد كل ما احاول اتخذ موقف صارم واكلم الإدارة رغد توقفني وتقول لي ح تدخلي نفسك في متاهات اتجاهلي بس بقيت بتجاهلو في يوم عمتو اميمة اتصلت وقالت ليمة انحنا طولنا منها وعايزانا نجي كنت رافضة امشي بس اقتنعت عشان اصرار مرام ويمة علي وعمتو محاسن قالت برضو ح تمشي وقالت لينا بلاقيكم هناك ابوي قال لينا ما ح امشي معاكم عندي شغل وح يضطر يشتغل في البيت ما فتحنا موضوع هند تاني وبقيت بتعامل معاهو عادي صراحة خجلانة منو لانو تصرفي كان غلط وهو اتجاوز الموضوع وما سأل تاني..
الصباح صحينا بدري لانو كلمتهم لو ما رتبنا البيت ونضفنا ما ح نطلع مرام كانت متحمسة للمشية عكس مهرة الكانت مترددة في المشي بعد خلصنا من النضافة مهرة قالت لي مريم ممكن اقعد مع ابوي وما امشي معاكم
_لي حبيبتي ما عايزة تمشي ابوي ما ح يكون فاضي وح تزهجي براك وانا ما بقدر اخليك وراي سكتت مسافة وقالت لي خلاص طيب ح امشي ...
لبسنا واتجهزنا ابوي وصلنا سلم على ناس عمتو اميمة واعتذر منهم وطلع طوالي قعدنا في الصالة عمتو ويمة بقو بتونسو عاينت لمرام بإستغراب لانها بتتلفت
_ي بت مرام مالك بتتلفتي زي مروحة التربيزة
_عاينت لي وقالت لي وهي مرتبكة ولا حاجة بس فقدت رونق ما شايفاها
"عمتو اميمة قالت ليها رونق عندها كورس بس ما ح تتأخر "
"الجو كان فيهو احساس ما مريح ومكهرب رغد قالت ح تمشي تخت الفطور قمت معاها وقلت ليها ح اساعدك بقينا نخت في الفطور سمعنا برة صوت عمتو محاسن طلعنا من المطبخ عشان نسلم عليها كانت ياداب داخلة سلمنا عليها قالت لينا بابكر وعلام برة طلعنا عشان نسلم عليهم على غير العادة علام كان مبتسم وما صاري وشو سلمت عليهو وعلى عمو بابكر اتلفت على علام مناسك سلمت عليهو ابتسم زيادة وحتى مسك يدها مسافة وهو بتكلم معاها "بقيت ما فاهمة حاجة علام سلم على مناسك لا وكمان بضحك معاها تضحك بلا سنون ان شاء الله ي علام وانا شايلة همو لشنو مشيت من جنبهم ودخلت المطبخ وانا تفكيري كلو مع الاتنين ديل "
