" المحاضرة بدت وكنت مركزة فيها شديد سجلت المعلومات المهمة بعد خلصت بقيت بدخل في حاجاتي خلصت واتلفت على المكان القاعدة فيهو رغد عشان نطلع سوا بس لقيتها ماف طلعت تلفوني اتصلت عليها ردت علي
_رغد مشيتي وين
_معليش كتت مستعجلة عشان كدا طلعت طوالي وقلت احتمال عايزة تقعدي شوية
_اقعد اعمل شنو من متين بقعد في الجامعة بعد اخلص... لاكن خير ي زولة ما مشكلة
"قفلت الخط اتضايقت من حركتها قفلت شنطتي وطلعت على البيت وصلت فتحت الباب دخلت وانا سامعة اصوات ضحك وجوطة مشيت على اتجاه الصوت لقيت مرام ومهرة ومعاهم هندية وابوي !!!"استغربت لمن شفت ابوي لانو الليلة رجع بدري " كانو بلعبو في ليدو ويمة بتتفرج عليهم ...بلعبو وهم مبسوطين بقيت بمرر نظري على واحد واحد رغم المرينا بيهو لسى في ضحك ركزت على مهرة وهي بتضحك اتبسطت لانو رجعت تضحك من تاني هندية كانت جنبها وبتعمل ليهم في حركات درامية لمن تموت مهرة كانت ميتة من الضحك ثبت نظري على ابوي الكان بعاين لهندية وفي بسمة مرسومة في وجهو ما كان بضحك كان بعاين ليها كأنو سرحان فيها هنا انا ابتسامتي اختفت يمة لاحظت لي واقفة جنب الباب وبعاين ليهم قالت لي :مريم ي بتي جيتي متين ما شفناك
"كلهم اتلفتو على بما فيهم ابوي اللاحظ لنظراتي ليهو عاينت ليهو جوة عيونو ومشيت منهم دخلت الغرفة جدعت الشنطة وقعدت في السرير وبقيت بتكلم مع نفسي ما هند الغلطانة وما هند البتقرب لابوي ابوي هو العايز هند متين قدر ينسى امي وحبو لأمي طيب الكلام القالتو لي والحكاية الكلمتني بيها دي كلها كذب لو بالجد بحبها ما كان ح يعاين لهند كدا باب الغرفة فتح جات مرام قعدت جنبي"
_مريم انا عارفة انك زعلانة مني وعارفة انو انا غلطت في حقك بس انا كنت خايفة عشان كدا اتكلمت معاك بالاسلوب دا
"ما اتكلمت معاها كنت فاقدة القدرة على الكلام حسيت روحي خلاص وصلت اخري من البحصل كفاية الضغط الانا حاسة بيهو "
_مريم عليك الله اتكلمي معاي انا ما بستحمل تسكتي مني انا غلطانة والله غلطانة بس عليك الله ما تعاقبيني بإنك تسكتي مني
"عاينت ليها في عيونها الكانو مدمعات "_ما مشكلة ي مرام انا ما زعلانة منك وكلامك القلتي ما غلط انا ما امكم وما بحق لي اتصرف معاكم كدا انتي كبرتي وبقيتي تفرقي بين الصاح والغلط وانا المفترض اديكم حريتكم
_مريم ما تقولي كدا والله انا ما قاصدة بعد امنا اتوفت ماف غيرك كان شايل همنا انا اسفة ي مريم اسفة ضمتني عليها وهي بتبكي ... "بس انا تعبت حسيت نفسي مضغوطة شديد فكيتها مني وقمت من جنبها دخلت الحمام استحميت وغيرت ملابسي طلعت لقيت الغرفة فاضية رقدت في السرير وغفيت صحيت على صوت حركة في الغرفة فتحت عيوني لقيت الغرفة مضلمة شديد قعدت في السرير وبقيت بقول في منو في الغرفة مع كلامي سمعت صوت كركبة بعدها الباب فتح نزلت من السرير فتحت النور وطلعت برة بقيت بكورك حرامي حرامي لحدي ما ناس البيت صحو فتحو الانوار ما كان في زول ابوي طلع الشارع بس ما لقى حاجة مهرة بقت تكورك من الغرفة جرينا ليها لقيت الغرفة مقلوبة فوق تحت الدواليب في الارض دفاتري حقت الرسم مجدعة في الارض ورسوماتي كلها مشرطة حتى رسمة امي ...قعدت في الارض وبقيت بلملم فيهم شلتها وبقيت ببكي ابوي جا وضماني قال لي ما تزعلي ي مريم ح ترسمي غيرها واحسن منها وانا ح اجيب ليك ادوات جديدة كوركت فيهو وقلت ليهو زح مني ما عايزة منك حاجة كلو بسببك انت
