مايروس النجوم الا سهيل ولا يقود الظبا غير العنود

الحادي عشر

~الخبر~
العنود ومحب نزلو يتنشطون من السواقه
وابتسمت العنود من المنظر كان البحر هادي ونعكاس القمر عليه والنجوم كان شي يفتن النظر والقلب
يوسف نزل من السياره واستنشق رائحة البحر ونسيم يضرب على وجهه بهدوء كان الجو بارد بس ليوسف كان الشي الي يطفي النار الي داخله والالم
محب راح لسيارة يجيب شال للعنود ورجع حطه على كتفها وحضنها على جنب ووقف معاهم كان كل همه يفكر كيف يرجع العنود عندهم بعد السفره
كان كل واحد غارق بافكاره وهمومه وحياتهم كيف كانت وكيف صارت بعد موت اهلهم
~قصر ساهر ~
نزل سعود يدندن على خفيف وضحك بخفيف بسخريه يوم طاحت عينه بعين اسيا الي كانت كلها خوف
ام سعود ابتسمت:يمه مروق جعله دايم يايمه
سعود تقدم لها وحب راسها:ايه يمه الحمدالله اليوم رجعت ناس لعقولهم وان شاء الله مايرجعون يسونها لانهم لسى مايعرفون من هو سعود بن محمد
ام سعود مسحت على شعره:احسن يمه الي يغلط لازم يتادب ويرجع له عقله وناظرت سيل يمه سيل كلمت يوسف وصلو ولا لسى
سيل ابتسم:ايه توه رسل سنابه يوسف لي على البحر
سعود ابتسم:شفتها اغراني والله افكر
سكرت ام سعود فمه:لا تفكر اجلس منتب رايح مكان وراك شغل
ضحكو الموجودين كلهم
سعود حب يدها:ابشري معد مفكر ارتحتي؟؟
ام سعود هزت راسها:ايه وناظرته يمه وين اختك ماشفتها مع البنات؟؟
سعود ابتسم وناظر اسيا وصد:فوق ياحبيبتي توني كنت عندها كانت تكلم صديقتها
ام سعود ابتسمت:زين
الجد ساهر ناظر سيل:ياولد
سيل فز:سم يبه؟؟
الجد ساهر:بزوجك
كلهم لفو على الجد ساهر بصدمة ماسواها مع عياله الكبار انه يجبر احد على الزواج وعارفين كلهم انه سيل رافض فكره الزواج من الاساس
سيل:بس يبه
قاطعة الجد ساهر:مافيه بس ولا شي بكره بنروح لناس وبتملكون
زادت صدمة الكل انه بكره الملكه
سيل وقف وطلع من البيت بعصبيه ولحقه سعود
ابو سهيل:يبه وش الملكة بكره كلنا عارفين انه سيل مايبي يتزوج
الجد ساهر بهدوء:بيتزوج وبكره لاحد يناقشني
ابو سعود:يبه مايبي ليش تجبره وانت عارف انه سيل مايبي يعرس وكلنا عارفين السبب
الجد ساهر ناظره بحده:بيعرس ومحد معارضني وتجهزو بكره كلكم بنروح
سهيل نزل:وين بنروح؟؟
الجد ساهر ناظره:ملكة سيل
سهيل طاح كوبه وناظرهم يدور سيل وطلع يركض
عند سيل وسعود
سعود ركب جنب سيل
سيل بعصبيه:انزل ياسعود
سعود ربط حزام الامان:وين بتروح رجلي على رجلك
سيل ضرب الدركسون اكثر من مره بعصبية وحرك السيارة بس وقف قدام السياره سهيل
سيل نزل بعصبيه:صاحي انت بغيت اصدمك
سهيل:وين رايح؟؟
سيل بصراخ عليه:جهنم الحمراء
سهيل مشى يركب:مشينا
سيل ركب معاهم وحرك السياره وعم السكوت بسياره لانه عصبية سيل كانت شاعله المكان وخايفين ينطقون بشي ويزيدونه ويحرقهم
سعود يناظر الطريق:جهنم الحمراء فيها يوسف؟؟
سيل ساكت
سهيل ابتسم:لا فيها العنود
سيل رفع عينه للمرايه وشرار يطلع من عيونه
سهيل رجع ظهره بخوف:اسف
سعود نتهد بعد مده من الصمت:سيل تعرف اذا رحنا لهم لازم نرجع جدي كلنا عارفين كلمته وبكره ملكتك
سيل مارد عليهم ويكمل الطريق
سهيل خاف لانه هذي اول مره يشوف سيل كذا معصب بحياته كلها حتى وهم صغار ماقد عصب سيل بهذا الشكل
سعود يفرك عيونه من التعب والضيق ويفكر وش الي خلى جده ساهر يجيب ذا الطاري وكلهم عارفين انه سيل مسكر موضوع العرس من زمان
مرت الساعات لين ماوصلو تفتيش الخبر
سيل رفع جواله وحطه على اذنه:اي فندق؟ طيب وقفل حوالي نص ساعة ووقف سيل السياره بجنب سيارة يوسف الي لازالت واقفة عند البحر لانهم جاين اساساً للبحر
يوسف وقف وناظر سيل وهو نازل من السيارة
محب ابتسم:وش اشتقت لنا لذي الدرجة جيت على طول
يوسف تقدم لسيل:محب خذ العنود للفندق وارتاحو انا بجي مع سيل
محب هز راسه:تمام
سيل تنهد:سعود وسهيل معاي روحو بسيارتي
محب عقد حواجبه بس سكت لانه واضح التعب على وجهه العنود ومشى معاها بعد ما اعطاهم مفتاح سيارة يوسف
العنود ركبت ورا جنب سهيل وسعود يسوق ومحب جنبه
محب ناظر سعود:وش فيه سيل؟؟
سعود:بكره ملكته
العنود شهقت:سيل؟؟؟
محب :بسم لله عليك لا تشهقين وش ملكته اشرح زين
سعود رفع اكتافه:مافيه شرح كنا جالسين وقال جدي لسيل بزوجك وسيل كان بيتكلم وجدي قال بكره ملكتك وطلع سيل وهذانا هنا
العنود رفعت ظهرها:بس سيل
سهيل هز راسه:هذي كلمة جدي وكلنا عارفين وش يعني
عند يوسف وسيل
سيل طاح على الرمل كان ماسك نفسه عن الكل بس مايقدر يمسك نفسه عند يوسف اخوه وصديقه و عضيده وطلعت منه تنهيدة كانت حارقه جوفه من كثر ما مسكها:حرقني ياخوي
يوسف جلس جنبه:بسم الله عليك جعل الحرق بالي يكرهونك وش فيك وش صار تونا طلعنا من عندك
سيل:بيزوجني يا يوسف بيزوجني
يوسف هز راسه:يدور مصلحتك ياخوي ابوك اكيد مو ضارك بعدين لين متى بتجلس كذا مسكر على نفسك وعلى حياتك ماينفع لازم تفكر بالمستقبل بكره بتكبر لازم يكون لك عيال يشيلونك اذا كبرت
سيل بالالم:يوسف مقدر هنا واشر على قلبه هنا هي ومراح تطلع ولا احد يقدر يستبدلها ليش محد قدر يفهمني هنا صبا
يوسف حط يده على كتف سيل:الله يرحمها ياخوي محد قال اذا تزوجت راح تبدل صبا كانت ولازالت بقلبك وقلوبنا كلنا كانت لك زوجه ولنا اخت وعزيزه وغاليه صبا وسبل مستحيل ننساهم بنتك كانت بنتي وللحين يعورني الموضوع انهم راحو بغمضة عين بس لازم يا سيل ماتوقف حياتك على الماضي وعمي ساهر مافتح الموضوع الا عارف انك تخطيت وانه الحين انت لازم تعيش ثاني مره
سيل هز راسه:ماتخطيت ولا راح اتخطى هم راحو بسببي
يوسف هز راسه:لا هذا يومهم سيل لاتقول كذا
سيل بالالم من الذكريات وعصبية من نفسه:بس لو ما وقفت بنص الطريق اريح وكملنا كان وصلنا كلنا
يوسف:لا تقول كذا لو ماريحت يمكن لاقدر الله صار لكم حادث وانت رحت معاهم
سيل بحزن:ياليتني رحت معاهم
يوسف بتعب:يلا نروح الفندق وبكره نرجع لرياض لازم
سيل ويوسف ركبو السيارة وتوجهو للفندق الي ارسله لهم محب
~قصر ساهر ~
الكبار كلهم راحو غرفهم بعد الصدمة وباقي البنات بالمجلس حقهم الخاص
عشق:يعني جدي مصر مره مالقى الا يزوج سيل
لتين هزت راسها:مره صدمه ما اتوقع بيوافق
لين:لا جدي حطه تحت الامر الواقع يقول بكره الملكة يعني مافيه لف ودوران
توق بحزن:مره يحزن الموضوع يعني غير الي صار له جدي بيزوجه غصب
اسيا:يمكن قرار جدي صح عطاه فتره طويله عشان يرجع سيل الي كلنا نعرفه قبل صبا ويوم شافه رجع قال اخليه يشوف حياته ويبدل صبا بالجديده
اشجان رفعت حواجبها:مافيه شي اسمه تبديل وحده بوحده من جيت على الدنيا و سيل كانت دنيته صبا ماعرفت سيل الا مع صبا سيل الي داخله حياة كان بسبب صبا وزاده حياته حياة يوم دخلت سبل يعني لاتقولين انه بيبدل وحده بوحده ثانيه بالاجبار وتتوقعين انه يعطيها الحب الي كان لصبا لانه صبا الاساس عند سيل نفس ما العنود اساس عند سهيل لو تجي مليون وحده تبي مكان صبا ماتقدر لانه هي الاولى وماخذه اكبر مكان بقلب سيل حتى لو مشت الحياة وحبها سيل مراح تكون بمستوى حبه لصبا
كان الجو متوتر من الموضوع واسيا حست انه اشجان ترمي عليها نغزات يوم قالت انه العنود الاساس عند سهيل
لتين:ماعلينا بروح ادور لي فستان بدولاب مابي اطلع السوق
توق وعشق مشو معاها
وباقي اسيا ولين واشجان
لين سندت راسها على الكنب:اوف العنود مو موجوده طفش
اسيا بحقد:عيب عليك الحين كلنا جالسين ونسولف وتقولين العنود مو موجوده طفش الشرهه علي جالسه معاك وانتي تدورين الي مالفت لك طارت مع اخوانها
اشجان:وش فيك اخذتيها بهواش هدي ماقالت شي لين العنود اختنا وطفشنا بدونها وناظرت لين ببتسامة معليه اليوم بترجع سعود يقول راحو الخبر لانه سيل يحتاج يوسف وسهيل وناظرت اسيا بكره مايقدر على مفارق زوجته العنود
اسيا قامت من عندهم بتروح غرفتها
لين ناظرت اشجان:وش فيك عليها وش سوت اعرفك ماتسوين ذي الحركات الا انها سوت شي ومو شي عادي؟؟
اشجان تفكر تقول للين الي شافته ولا تسكت:اوف لين لازم اقول لك عشان بموت اذا ماقلت لاحد ما اقدر اقول ذا الشي للعنود فبقولك
لين بنصات:وش تكلمي؟؟
اشجان تنهدت:شفت اسيا و سهيل
لين مافهمت وهزت راسها:طيب وش فيهم دايم نشوفهم مافهمت
اشجان هزت راسها:مو بطريقه الي نشوفهم دايم فيها لا تذكرين يوم اقول بروح اجيب سماعة وتذكرت انها بغرفه اسيا وانا رايحه لها شفتها طالعه من غرفتها وكنت بكلمها بس كانت لابسه فستان قصير احسبها بتطلع بس اشوفها تتوجه لجناح سهيل تخيلي يوم فتح لها حطت يدها على رقبته وهو حط يده على خصرها وحاوطها
لين بحالة صدمه:يمكن وهزت راسها هذي مافيها يمكن وش بنسوي لازم نعلم العنود بس وش بنقول زوجك و صديقتك يخونونك مره كبيره
اشجان هزت راسها:هذا الي قلته لسعود
لين طارت عيونها:سعود يدري؟؟؟
اشجان هزت راسها:لا قلت صديقتي كلمتني وتقولي انه زوجة اخوها تخونه مع ولد عمهم وش تسوي تعلم اخوها ولا تسكت وقالي تعلمه بس بالهداوه وتدريج
لين صارت تفرك اصابعها بتوتر:طيب وش بنسوي الحين؟؟
اشجان رفعت اكتافها:مدري والله بس لازم تدري
لين هزت راسها وصارو يفكرون كيف يعلمون العنود
~ الخبر بالفندق ~
اخذو معاهم اكل وراحو الفندق وحجزو اكبر جناح عشان يكنون كلهم مع بعض
محب كان يطلع البرقر ويعطيه العنود ويفك المشروب ويحطه قدامها
العنود كانت تاكل عادي
سهيل ناظرهم:انتو كذا دايم؟؟
العنود عقدت حواجبها:وشلون؟
سهيل اشر على المشروب والبرقر:هذا قصدي
محب ابتسم:كذا تتعامل العنود لايكون ما تعاملها كذا؟؟
سهيل ابتسم:ماكنت ادري انها تتعامل كذا عندكم
محب رفع حاجبه:ليش كيف تعاملها؟؟
العنود ابتسمت:يعاملني مثلكم واحسن لا تخاف
محب ناظر العنود الي صدت تاخذ المشروب وهز راسه:زين
سهيل ناظر العنود الي تاكل بهدوء
العنود ناظرتهم:كلمتو يوسف وسيل؟؟
محب تنهد:بيجون للحين محد كلم اكيد انه لسى سيل معصب
العنود تنهدت:ياربيه طيب رسلتو لهم موقع الفندق؟؟
سعود ابتسم لها:ايه وفتحه يوسف يعني جاين
العنود ردت الابتسامة
سهيل كان فيه احساس غريب ومو عارف يوصفه بس مو عاجبه ابتسامة العنود لسعود ووقف:العنود وين غرفتنا؟
العنود شرقت توها تستوعب انهم بينامون بغرفة وحده
محب يمسح على ظهرها:بسم لله بسم الله وش فيك
العنود هزت راسها واخذت منديل:لا مافيني شي وابتسمت لسهيل مدري اي غرفه لسى محد اختار
سهيل ابتسم:طيب بروح لاي وحده لاني مصدع
العنود هزت راسها:طيب
محب كان يشوف تصرفاتهم الغريبة وناظر سعود الي يحك حاجبه باستياء وسند ظهره على الكنب
محب ابتسم للعنود:سهيل يصدع دايم تعرفين ليش؟؟
العنود باهمال:اتوقع الشغل واليوم الطريق كلنا بنصدع
سعود غمض عيونه لانه محب كشفهم
محب اتسعت ابتسامته:فيه غرفه زياده اذا بتنامين فيها
العنود ناظرته وصدت:لا بنام مع زوجي
محب هز راسه:كيفك
العنود وقفت وراحت للغرفة الي فيها سهيل
محب ناظر سعود وتكتف:انت صديقه واخوه اكيد قالك تكلم
سعود ابتسم:ماعندي شي اقوله هذا بينكم وانا ما احب اتدخل بشي مالي خص فيه
محب هز راسه:زين ورفع ظهره ونظرات تهديد بس لو شميت او حتى حسيت انه الموضوع يضر العنود فانا بحفر قبره بيدي ووقف يروح يفتح الباب بعد ماطق
سيل ويوسف ادخلو وملامح التعب والارهاق باينه بوجيهم
محب:فيه اكل لو تبون
سيل هز راسه بنفي:بالعافية بنام ومشى يدخل اي غرفة
محب ناظر يوسف:العنود دخلت تنام ادخل نام بعد انت
يوسف هز راسه ودخل الغرفة ونسدح وغفت عيونه من التعب على طول
سيل الي جفاه مرقده وطلع صوره بجواله وصار يتاملها بحزن والالم وحنين وشوق يكلم الصوره:ليش رحتو وخليتوني وحيد حياتي من غيركم ولا شي ليش ما اخذتوني معاكم و ما تركتوني اتعذب من فرقاكم اخخ يا صبا اخخ وقفل جواله عيونه مليانه دموع من ثقل قلبه وذكريات الي اجتاحت تفكيره
غرفة العنود وسهيل
العنود دخلت وهي كارهه نفسها والخبر والفندق وكل شي لانها بتنام مع سهيل بغرفه وحده
سهيل كان منسدح وحاط يده على عيونه ومغمض من الصداع
العنود فسخت عبايتها وطرحتها ودخلتها بدولاب وصارت تناظر الغرفة كانت عاديه كرسي صغير وسرير وتسريحة بس وراحت للكرسي وجلست فيه
سهيل وهو مغمض:تعالي انسدحي بسرير ماني جايك
العنود هزت راسها:لا مرتاحه هنا
سهيل تنهد وفتح عيونه:العنود تعالي بيعورك ظهرك من الكرسي
العنود غمضت بدون رد وصرخت بخوف انها ارتفعت عن الارض
سهيل شايلها وحطها على السرير:نامي هنا و لا تطنشيني ثاني مره
العنود بعصبيه:صاحي انت لو طيحتني الحين ونكسرت ولا صار لي شي موب انت الي بتهتم فيني
سهيل مسح وجهه:العنود قصري صوتك اخوانك برا وانا مصدع
العنود هزت راسها:لا مانب مقصره صوتي بغيت تطيحني
سهيل قاطعها:شفتيني طيحتك؟؟؟ وهز راسه لا خلاص اهدي شوي
العنود كانت بتتكلم بس لفتها شي بعينه:عينك
سهيل عقد حواجبه:وش فيها؟؟
العنود قربت وعيونهم تلاقت وحطت يدها على حاجبه بدون ماتحس:فيها دم!!!
سهيل هايم يعيونها ولا يسمع الي تقوله:
إِنَّ العُيونَ الَّتي في طَرفِها حَوَرٌ
قَتَلنَنا ثُمَّ لَم يُحيِينَ قَتلانا
يَصرَعنَ ذا اللُبَّ حَتّى لا حِراكَ بِهِ
وَهُنَّ أَضعَفُ خَلقِ اللَهِ أَركانا
العنود عيونها بعيونه:جرير
سهيل ابتسم:جرير
العنود لفت على طقت الباب واخذت طرحتها وراحت تفتح:محب وش فيه؟؟
محب ابتسم:مافيه شي حبيبتي بس جيت اقولك يوسف وسيل وصلو ونامو
العنود تنهدت براحه:الحمدالله اشوا خلاص اشوفهم الصباح
محب باس خدها:يلا نامي بنمشي بدري ترا
العنود ابتسمت:ان شاء الله حبيبي تصبح على خير
محب:وانتي من اهله وراح غرفته
العنود رجعت للغرفة:اشوا رجعو
سهيل يناظرها بهدوء
العنود تذكرت عين سهيل:يوه صح ماقلت لمحب يشوف عينك ليش صارت كذا
سهيل عقد حواجبه:وش فيها عيني؟؟
العنود:ماسمعت وش قلت اقول عينك فيها دم رح شوف
سهيل توجه للمرايه يشوف عينه وتنهد:اخخ عندي اجتماع بكره وعرس
العنود عقدت حواجبها:ليش منتب خايف دايم تطلعلك؟؟
سهيل هز راسه:ايه تطلعلي مع الصداع وتعب
العنود هزت راسها:اهاا معاي بندول اذا تبي
سهيل ابتسم:مايفيد معاي شقيقه
العنود ناظرته بصدمة:من متى؟؟
سهيل عقد حواجبه:من زمان ماتدرين؟؟
العنود:لا وجلست ياربيه عشان كذا سالني غبية انا
سهيل جلس قدامها:وش فيك من سالك ووش سالك؟؟
العنود:محب سالني ليش انت دايم مصدع وانا قلت اكيد من الدوام والطريق عشان كذا قالي فيه غرفة زيادة اذا بنام هناك ومسحت وجها ياربيه ياربيه
سهيل:عادي طيب يمكن نسيتي مو لازم تتذكرين كل شي
العنود هزت راسها:محب يعرف اذا حبيت احد اعرف اقل الاشياء عنه اكيد اكتشف اني اكذب يوم قلت اني احبك
سهيل هز راسه:اوك عشان كذا تعرفين سعود وش حلمه
العنود عقدت حواجبها:وش قصدك؟؟

تفاعلو حبايبي🥺🤍🤍