مايروس النجوم الا سهيل ولا يقود الظبا غير العنود

البارت التاسع عشر

<عند فلة سهيل>
سهيل تنهد ورسل ليوسف (لقيتها بخير لاتخاف عطها كم يوم وترجع ولو سمحت لاتقول لمحب لانه عصبي وانا ما اتحمله )و رسلها وقفل جواله وحطه بحضنه وغمض عيونه عشان يخف الصداع وفز على طق الدريشة وفتح سيارته وركبت العنود
العنود تنهدت:انا ماقلت ابي كم يوم ارتاح ماتسمع انت؟؟؟
سهيل ابتسم:طيب ماجيتك انا انا واقف بعيد عن البيت
العنود:قلت لاحد اني هنا؟
سهيل هز راسه بنفي ورجع راسه وغمض
العنود ناظرته:انزل ادخل غرفتك نام
سهيل هز راسه:لا هذاك مكان استراحتك مابي ادخله واخرب الهدوء الي فيه
العنود:ما انت خربته يوم دخلت وخوفتني احسبك حرامي
سهيل لف ببتسامة وناظرها:تخيلي انه حرامي صدق
العنود ضحكة:دخل البيت الخطأ اجل
سهيل ابتسم على ضحكتها:العنود مانب معتذر على الي سويته بس بعتذر على صراخي عليك
العنود اخذت نفس وابتسمت:اشوا بغيت انزل
سهيل ضحك:وانتي ماتبين تقولين شي؟؟
العنود سندت ظهرها:لا لاني ماسويت شي
سهيل رمقها
العنود ابتسمت:تعرف لو سويتها قدام محب طلع عيونك
سهيل هز راسه:والله ادري مايحبني ولا يطقني بعيشه الله مدري وش فيه
العنود ابتسمت:لانه يشوف انك ماتستاهلني وابوي باعني لك
سهيل عقد حواجبه:بس انا مالي ذنب مثلي مثلك
العنود هزت راسها:ايه بس محب ويوسف مايدرون انك مثلي مجبور
سهيل ابتسم:وش رايك نروح شهر عسل؟؟؟
العنود ضحكة تحسبه يمزح:يلا قدام
سهيل صدق:والله وين تبين؟
العنود ناظرته:صادق انت؟؟
سهيل هز راسه بجديه:ايه والله تحسبيني امزح؟
العنود:صدق احسبك تمزح لا مابي اروح شهر عسل
سهيل ابتسم وطلع جواله:مافيه كلمتك وحده وين نروح؟؟
العنود بصدمة:سهيل والله امزح مابي اروح مكان
سهيل:ما اقدر قلتي سهيل يعني لازم نروح بسرعة وين نروح؟
العنود:مقدر اروح مكان عندي جامعه
سهيل ناظرها:ياكذبك اعرف انك الغيتي ترم يلا العنود نروح نتمشى وناخذ بكريك من عايلتي وعايلتك ومن الرياض كلها تبين اليابان اتذكر قلتي انك تبين تروحيلها
العنود هزت راسها:لا دور مكان ثاني
سهيل اتسعت ابتسامته:يعني راضيه نروح شهر عسل؟؟
العنود تنهدت:يلا مدامنا بنروح بريك
سهيل فتح الحجوزات:وين تبين بلد اجنبي ولا عربي؟
العنود ابتسمت:مدري اسال سعود ما شاء لله عليه يعرف الاماكن الزينه
سهيل هز راسه:لا ابي نختاره احنا ونشوف بنفسنا نروح النمسا؟؟
العنود تفكر:حلوه بس مو برد؟؟
سهيل ابتسم:كل مكان برد الحين عشان الشتاء و ديسمبر
العنود:تمام اجل ناخذ معانا ملابس ثقيله لا تمرض هناك
سهيل ناظرها:انا رجل الباديه ما امرض
العنود ضحكة:طيب يارجل الباديه انزل ادخل خيمتك برد هنا وانت مو لابس
سهيل ضحك معاها وشغل السياره:بقرب للباب عشان مايحسبون الجيران اننا حراميه ويبلغون علينا
العنود ابتسمت وقرب سهيل للباب ونزلو يدخلون البيت
سهيل ناظرها:تبين شاهي معاي؟؟
العنود هزت راسها:لا بسوي لي ماتشا
سهيل عقد حواجبه:وش ذي الماتشا الي الكل يعرفها الا انا
العنود ابتسمت وهي تمشي للمطبخ معاه:هذا مشروب نفس القهوه بس الكافيين اقل وصحيه اكثر
سهيل ناظرها:صحيه ليش محب مايخليك تاخذين الا مره وحده؟
العنود ضحكة وهي تتذكر موقف وطلع اغراض الماتشا:اقولك هذا مره كنت توني طايحه فيها ويمكن شربت حوالي خمس مرات كذا المهم اني جلست يومين مواصله وما علمتهم وكل من سالني اقول توني صاحيه المهم ونمت هذا اليوم واصحى من المستشفى طلعت نايمه ٣ ايام ويحسبون دخلت غيبوبة اتذكر وجه ليلي يوم صحيت للحين اضحك
سهيل عقد حواجبه:ليلي كانت معاك؟؟
العنود هزت راسها:ايه كانت توها جايه يمكن من اسبوع كذا
سهيل ناظرها:يعني كنتي متزوجتني؟
العنود:هو اكيد ليلي ماجت الا لما تزوجنا نسيت؟
سهيل مسك كتفها:العنود ليش محد قالي؟
العنود ناظرته:اتوقع انهم دقو عليك وانت مارديت او كنت مسافر والله ما اتذكر
سهيل ناظرها وكان بيتكلم وحس ببرودت كفها على خده وتمسح برقه على خده
العنود تناظر خده:اصابعي علمت تعورك؟؟
سهيل هز راسه بنفي وهو ذايب بحركتها
العنود حطت كوب على خده:ماعندنا ثلج خلها شوي
سهيل نزل الكوب ورجع يدها لخده:الكوب يعورني عشانه قاسي خلي يدك
العنود ضحكة:توك تقول انك رجل الباديه الحين يعورك كوب
سهيل ابتسم وهز راسه
العنود حطت يدها على خدها تشوف بارده ولا لا ورجعتها على خد سهيل وصارت تمسحها بخفيف وعينها على خده مو منتبهه له انه يناظرها وجالس يغرق فيها
العنود ابتسمت لما ميل راسه لكفها وحست بحساس غريب وفزت وبعدت عنه وصدت تكمل تسوي الماتشا
سهيل عقد حواجبه:وش فيك؟
العنود وهي صاده:اذا طولت تخرب سو شاهيك انا خلصت ترا
سهيل هز راسه:تمام استنيني بصاله عشان نشوف متى نروح
العنود هزت راسها وطلعت وجلست وتنهدت براحة انها طلعت بسرعة:العنود لاتحبينه انتي اعقل من انك تطيحين بشباكه
سهيل جاء وجلس وطلع جواله:متى تبين نروح
العنود توترت انه جلس قريب منها عشان يوريها الحجوزات:مادري شف انت انا بكلم محب ويوسف ووقفت ومسك يدها سهيل يجلسها
سهيل:رسلت ليوسف مايحتاج تكلمينهم
العنود تبي تقوم:بس
سهيل ناظرها ببتسامة:لا بس ولا شي اجلسي نشوف حجوزات
العنود بعدت يده:احس معد ودي اسافر خلنا هنا احسن يمكن يحتاجونك بشغل
سهيل تنهد:العنود خلينا نروح نغير جو والشغل مو طاير فيه ماجد وفيه موظفين ثقه واذا صار شي اكيد بيرسلون لي
العنود هزت راسها:لا لا خلنا هنا احسن انا يمكن الجامعه يحتاجوني
سهيل ناظرها:مراح يحتاجونك انتي لغيتي ترم ليش يحتاجونك
العنود مصره:يمكن
سهيل قاطعها:العنود انتي تبين تسافرين معاي ولا لا؟؟
العنود ناظرته:لا ماودي
سهيل هز راسه :قولي كذا من اول مو يمكن و مايمكن خلاص مراح نسافر ووقف بروح انام مصدع ومشى
العنود سندت راسها على الكنب وزفرت براحه
<قصر ساهر >
اشجان ولين كانو خايفين على العنود
سيل نظرهم:يوسف يقول لقوها بس ماقالي وين
اشجان تنهدت براحه:اخ الحمدالله الحين اقدر انام براحة
سيل ابتسم ووقف ناظر ودق:بتجلسين مع البنات ولا بترقين معاي؟
ودق ناظرت لتين الي جالسه على جوالها وهزت راسها:بروح معاك ارتاح شوي
سيل هز راسه ومشى
ودق مشت ووقفت عند لتين وهمست:لاتحسبين انك بتعيشين مع يوسف مرتاحه وهذي عيشتك الي عند اهلك مراح تشوفينها عند يوسف تعرفين اول شرط قالي لازم البس عبايه على الراس ولاني احبه وافقت وقالي اطلع من شغلي بعد انا انصحك لاني زوجة عمك واعرف يوسف ومشت يوم حست انها لعبة براس لتين
لتين جتها افكار انه يوسف معقد وانه كلامها صح لانه العنود تجلس معاهم بحجاب وعبايه يعني اكيد انه عائلتها كذا قالو لها ومتربين كذا صارت كل شوي تجيها فكره عن يوسف وتعقده
لين هزتها:لتين وش فيك؟؟
لتين فزت:مافيني شي شكلي بروح انام وقامت وقامو البنات كل وحده تروح غرفتها تريح
جناح سيل وودق
ودق دخلت الجناح وهي داخلها ميت فرح انها قدرت تشوش افكار لتين
سيل ناظرها:وش الحركه الي سويتيها تحت؟
ودق خافت انه سمع وش قالت للتين:وش سويت؟؟
سيل وقف:حبيبي ومسكت اليد ويوم دخلنا الصاله تركتيني ورحتي الحمام القريب وطلعتي ومعد كلمتيني ثاني مره انفصام فيك؟
ودق ارتاحت شوي:كان عمي ساهر يناظرنا كيف تبيني اتصرف يعني؟؟
سيل هز راسه:بس هل مره تسوين هل حركة وبمشيها بس تذكري المره الجايه مراح امشيها
ودق:لا تخاف مافيها مره جايه لانه حتى انا كرهت نفسي يوم قلت حبيبي ومشت للغرفه
سيل بصوت عالي:ايام الفندق انك ماخذه الغرفة كلها انسيها الحين لي نص الغرفة
ودق طلعت مصدومة:وين بنام يعني؟؟
سيل رفع اكتافه:والله ذا الشي يخصك مالي دخل فيك لي نص الغرفه ومعاها السرير تبين تنامين جنبي حياك الله ماتبين شوفي الكنب
ودق عصبت:سلامات بتخليني على الكنب
سيل:انتي الي تقررين تبين الكنب ولا جنبي انتي حره
ودق دخلت الغرفة معصبة وطلعت لها ملابس مريحه ودخلت الحمام تغير
سيل دخل الغرفة يغير ثوبه ونسدح على السرير وجلس على جواله
ودق طلعت وتاففت يوم شوفته على السرير:رح من هناك شوي
سيل بعد شوي عن السرير:ارتحتي الحين؟؟؟
ودق جلست وحطت المخدة بينهم:من بكره نجيب سرير اكبر ولا واحد ثاني
سيل رفع حاجبه و مايناظرها :ايه من فلوس ابوك
ودق تحط كريم بيدها:لا من فلوسي لا احتاج فلوسك ولا فلوس ابوي وابوك
سيل هز راسه وطفى جواله وغمض عيونه وعطاها ظهره:طفي النور معاك
ودق:ما اعرف انام ونور مطفي بخليه
سيل لف عليها:وش تخافين انتي تخوفين طفي طفي بس
ودق ناظرته:ياسخفك مانب مطفيته تبي تطفي النور رح نام بصالة وطف كل الانوار بس نور الغرفة مراح يتطفى وعطته ظهرها وانسدحت
سيل قام يطفي النور بس وقفه صوتها
ودق وهي مغمضة:سيل لو طفيت النور بصوت باعلى صوتي واخلي الكل يتجمع عندنا هذاني قلت لك
سيل زفر بعصبيه ورجع للسرير وسحب البطانية لجهته وحط يده على عيونه عشان يحجب الاضواء عنه بس مافيه فايده
ودق فتحت جوالها وحطت صوره يوسف وصارت تمسح عليها وعيونها تمتلي دموع
سيل اخذ جواله وفتح صورة لصبا وسبل وهو كان معاهم كانت اخر صوره اخذوها قبل السفره المشؤومه
~فلاش باك قبل خمس سنوات~
سيل دخل جناحه بعد يوم متعب ومرهق له عشانه اخر يوم بدوام بعدها بياخذ اجازة لانه وعد صبا يروحون الكويت لاهلها من زمان ماشافتهم
سيل ابتسم لانه شاف بنته صاحبة الثلاثه اعوام تتوجه له وفتح يده وارتطمت فيه وهو اتسعت ابتسامته اكثر يوم سمع ضحكاتها تتعالى وهو يدور فيها
سبل تضحك اكثر:بس بابا بس
سيل وقف وناظرها:تعبتي خلاص لا تضحكين يا بابا
سبل بطفولية:بابا ماما بنروح الكويت عد جدو وجده صح؟؟
سيل هز راسه ببتسامة:صح يا بابا بنروح عند جدو وجده ونجلس عندهم بعدين نرجع
سبل هزت راسها تقلده:وعمو يوسف يجي معانا؟؟
سيل ابتسم:لا عمو يوسف عنده شغل مو جاي يقول المره الجايه
سبل بزعل طفولي:مابي اصلا نروح معاي انا و بابا وماما بس
صبا جت:هلا حبيبي متى جيت ماسمعت صوتك؟
سيل قرب منها وحب راسها:توني دخلت ياعمري
صبا ناظرته بتعب:معليش حبيبي ماسويت غداء جلست ارتب الاغراض وانظف البيت قبل مانمشي بكره وراح الوقت
سيل ابتسم ورفع الكيس الي جايبه:جبت لنا احلى بخاري ناكل ونعين من الله خير ونحط الاغراض بسياره ونتوكل
صبا باسة خده:عمري انت مدري وش كنت بسوي بدونك والله
سيل ابتسم:انا الي والله مدري وش بسوي بدونك يلا ببدل وناكل اجلسو
صبا اخذت الاكياس منه وحطتها بالمطبخ عشان تجيب صحون وترتب الاغراض مر الوقت ودخل سيل وتوه متروش
صبا ناظرته ولفت:نشف شعرك حبيبي بتتعب
سيل ابتسم ومد لها الفوطة:نشفيه نفس ماتسوين لسبل سويلي
صبا ضحكة واخذت الفوطه وحطتها على شعر سيل:وش تغار من سبل ماتوقعتك الاب الي يغار من بنته
سبل جت:بابا محب الشين يدق عليك وقفلت مو حلو محب
سيل ابتسم وهمس:والله انك صادقه
صبا ضربته على خفيف وناظرت سبل:لا يا ماما عيب تقولين لعمو محب كذا
سبل هزت راسها:لا هو مو عمو بس عمو يوسف وعمو عنود محب يع
سيل ضحك:عمو عنود
صبا ضربته ثاني مره:سيل لا تضحك تحسبه شي زين الحين
سيل رفع سبل بحضنه:يا بابا عيب تقولين كذا بعدين يزعل عليك عمو يوسف ومايوديك البقاله بعدين
سبل هزت راسها:لا عمو محب حلو
صبا وسيل ضحكو انها غيرت رايها عشان البقالة بس
صبا نزلت سبل من حضن سيل:يلا نتغدا يا ماما
سبل جلست على الارض وتقلد سيل بطفولة:ناكل الارض ونعين خير ونمشي
سيل باس خذها بقوه:وووه وهه الحين ناكل الارض لعيونك
سبل ضحكة
صبا ابتسمت وحطت السفره على الارض وصحون والاكل:يلا بسم الله مر الوقت وخلصو اكل وصبا دخلت تسوي الشاهي والقهوه لطريق ولهم الحين وجلست جنب سيل الي طفى جواله يوم شافها وشال الصينيه عنها
صبا سحبت سيل وصار راسه على رجلها:خلنا نمشي بكره ولا نروح طياره ليش تبي السيارة انت؟
سيل ابتسم:عشان اجلس معاك كل الوقت لانه من نشوف مرحبا بكم في دولة الكويت تنسيني عشان كذا خلينا نروح بسيارة
صبا ضحكة:ما انساك ياظالم بس شوقي لامي وابوي يعميني وباست راسه ومسحت على شعره
سيل غمض:خليني شوي بغفي ونمشي
صبا:طيب ادخل غرفتنا
سيل ابتسم وناظرها:انا منسدح على حياتي كلها وش ابي بالغرفه
صبا استحت لانها ماتعرف وش تقول اذا تغزل فيها سيل ياكلها الخجل عكس سيل:نام نام
سيل ضحك ونام بحضنها مر الوقت وصحى لقى نفسه نايم على الكنب وتحت راسه وساده وفز
صبا شافته:بسم لله عليك وش فيك؟
سيل مسح وجهه وهز راسه:لا احس اني نمت كثير وخفت اتاخر عليك
صبا ابتسمت:لا حبيبي لسى مانمت الا ساعه كمل ريح
سيل وقف:لا بروح اغير ونمشي مانبي نتاخر بطريق
صبا هزت راسها:ابشر بلبس سبل ونستناك تخلص وراحت لغرفة سبل وسيل راح لغرفتهم يلبس للخط حوالي النص ساعة وكلهم جاهزين وراكبين السيارة
سيل ناظر سبل الي نايمه بكرسي الاطفال:نامت قبل حتى نتحرك
صبا ابتسمت وحطت يدها على يده:احسن عشان يكون بداية الطريق كله معاي ونهايته مع سبل
سيل باس يدها:يلا توكلنا على الله بسم لله وحط دعاء السفر ومشى مرت خمس ساعات وهم بطريق كانت عيون سيل تغمض من التعب وطريق وماريحو بولا استراحه كانت تقوله صبا نجلس بالفندق شوي وبعدها نمشي كان رافض بشدة يبي يخلص الطريق ويرتاح بالكويت بس
صبا لفت عليه:حبيبي تعبت وقف شوي على جنب وتنشط ونرجع نكمل
سيل بدا يخاف انه ينام بطريق ويقلبهم:بس ساعه ونمشي الطريق خطر
صبا هزت راسها:تمام ساعه بس
سيل وقف السيارة وقفل البيبان وسند راسه على المرتبة ونام على طول من التعب
صبا غفت معاه وفرت يوم سمعت صوت سبل:عيون ماما وش تبين؟
سبل بنعاس:ماما ابي الحمام
صبا ناظرت المكان كان قطاعه وظلام وناظرت سيل كان التعب واضح على وجهه وتنهدت ولفت على بنتها:طيب ياماما اصبري شوي
سبل هزت راسها بنفي:ماما ابي الحمام الحين بطني توجعني
صبا هزت راسها:طيب طيب وهزت سيل بس ما صحى ونزلت من السياره وفتحت الباب الي عند سبل تنزلها ونزلتها
صبا بخوف وهي نتاظر المكان وتقرا الاذكار:يلا ماما بسرعة
سبل ناظرتها:ماما بيشوفني بابا امشي شوي وسحبتها
صبا لفت ومشت معاها:بس بس يلا بسرعة
سبل خلصت وناظرت ورا صبا:بابا لا تشوفني
صبا لفت وماكان احد وراها وزاد خوفها اكثر وشالت سبل:سبل ماما غمضي عيونك ونامي شوي
سبل صارت تتحرك بحضن صبا:ماما بابا من هناك وين رايحه انتي وصارت تبكي اكثر
صبا تسمي وتقوا قران بسرها من الخوف وماحست الا تطيح من الحجره الي ما انتبهت لها:اخخ سبل وناظرتها الا شافت سبل تركض للاتجاه الثاني بعيد عن السياره ولحقتها وهي تناديها ومسكتها بعد مسافه
صبا بعصبيه:ليش تركضين ليش
سبل تبكي:بابا راح راح وخلاني اناديه مايرد على بابا مايحبني
صبا تذكرت سيل والسيارة وصارت تناظر المكان الي اجتاحه الظلام معد تدري السياره من اي جهه وصارت تدور شنطتها بس تذكرت انها ما اخذتها
سبل زاد بكاها وحضنت امها الي بدت تلف بالمكان تدور من اي اتجاه يروحون صبا تحاول تهديها:بس بس الحين نروح لسيارة
سبل ترجف:بردت ماما برد
صبا تهزها وتحضنها اكثر:الحين بابا يجي
عند سيل بدا يفتح يوم حس باشعة الشمس تضرب على وجهه ولف راسه يغطيها:صبا حبيبي سكري الستاره شوي
سيل بدا يتذكر انهم بطريق سفر وفز وناظر مقعد صبا ولف لسبل ماكانو موجودين يحس انه بحلم يحاول يستوعب:صبا سبل ونزل من السياره وصار يصوت صبا سبل
اخذ جواله ودق على الشرطة على طول حوالي العشر دقائق الا جايه الشرطة
الشرطي صافحه:السلام عليكم
سيل مشوش:وعليكم السلام زوجتي وبنتي كانو بسياره مدري وش صار اختفو
الشرطي حط يده على كتف سيل يهديه:عادي اشوف السياره؟
سيل هز راسه:ايه ايه
الشرطي ١ توجه لسياره وصار يفتشها ويناظر كرسي سبل وشنطة صبا
الشرطي ٢ واقف مع سيل:ممكن تقولي اسمك
سيل هز راسه:سيل ساهر ال نافل وزوجتي اسمها صبا خالد الخالد وبنتي اسمها سبل سيل ال نوفل
الشرطي يكتب:اثباتك لو سمحت
سيل يدوره بجيبه بس مالقاه:بسياره على الباب اقدر اجيبه
الشرطي هز راسه بنفي:لا وناظر خويه الي عند السياره ياشرطي جب اثباته من السياره
الشرطي ١ هز راسه
سيل يناظرهم:وش انا متهم؟
الشرطي ٢ رفع حاجبه:هل انت متهم؟؟
سيل هز راسه:لا اقولك زوجتي وبنتي ما ادري وينهم وتعاملني كاني متهم لاقوهم
الشرطي ٢:هد اعصابك بنلاقيهم ان شاء الله
سيل بدا يعصب:وين بتلاقيهم وانت تحقق معاي
الشرطي ٢ ناظره بحزم:ما حققت معاك انا اسال اسأله روتين
سيل تنهد وهز راسه:طيب
الشرطي ٢:كم عمر بنت وزوجتك؟؟
سيل يناظر السياره حقته
الشرطي ٢:لو سمحت انتبه لي هنا كم عمر بنتك وزوجتك؟
سيل يحاول يركز معاه:سبل الاسبوع الجاي تدخل ثلاث سنين وصبا وسكت يتذكر صبا ٢٧
الشرطي ٢ هز راسه
سيل يستناهم يسون شي:يعني ندورهم ولا بيجي احد يدورهم ولا وش ؟
الشرطي ٢:متى اخر مره شفتهم اخ سيل؟؟
سيل :قبل ما نوقف وانام انا متاكد انهم كانو فيه
الشرطي ٢:ممكن تذكرني ليش انهم بطريق؟؟
سيل :كنا بنروح الكويت اهل زوجتي ساكنين هناك تعبت بطريق وقالت لي نريح على جنب بعدها ما ادري؟
الشرطي ١ وقف جنبهم:هل تتوقع انها هربت يمكن ماتبي تعيش معاك؟
سيل عقد حواجبه:لو سمحت انتبه لكلامك
الشرطي ٢ حط يده على كتف سيل:هد
سيل نفذ يد الشرطي:وش اهدي وانتو ماتدورون ولا خلتوني ادور عليهم اقولكم مو موجودين صحيت من النوم محد موجود لا زوجتي ولا بنتي
الشرطي كان بيتكلم الا وقفت خمس سيارات وراهم ونزل يوسف يركض
يوسف وقف عند سيل:وش فيه وش صاير؟؟
سيل :صبا وسبل صحيت مالقيتهم ودقيت على الشرطة
الشرطي ناظرهم:من انتم ووش دراكم انه هنا؟؟
يوسف ناظره:انا المحامي يوسف عبدالله ال ملهم واتصلت عليه كثير ودقيت على اهل زوجته يقولون ماوصلو للحين وحركنا نشوف وينه
الشرطي ١ ابتسم وناظر سيل:كنت مخطط تقتلها عشان كذا دقيت على المحامي
سيل عصب وكان بيضربه بس وقفه يوسف
يوسف ناظر الشرطي:بدال ماتحط فرضيات وتضيع الوقت كان دورتهم ولقيتهم من زمان واشر للعيال يدورن معاك وناظر سيل امش ندورهم
سيل ويوسف صار يدورهم بالارض الخاليه الي كان كلها وحده وكلهم انتشرو صارو يدورون مع الشرطه مر اكثر من ساعتين ولا لهم اثر لين ماسمعو واحد يصرخ ينادينم
:يوسف يوسف
يوسف توجه له ورجعت خطوته لورا يوم شافهم ورفع راسه لسيل الي توجه له يركض:سيل ارجع ارجع
سيل يركض لجهته ولا يسمعه بس يبي يشوف بنته وحبيبة قلبه
يوسف اشر لشباب يمسكون سيل
الشرطي توجه لجهة يوسف وشافهم وصد:لا حول ولا قوة الا بالله
سيل زادت سرعته وصار يحاول يفكهم عشان يبي يشوفهم:يوسف لا تقولها لا تقولها طلبتك وقدر يهرب منهم ووقفت خطاه يوم بانو له
كانت صبا حاضنه سبل كانها ببطنها متمسكة فيها وكانت عيونها مفتحه وشعرها ابيض كله ومتجمدة على جهتها اليمين وسبل وجها بحضن امها ومتكوره داخلها وكانت يدها الي باينه منها بيضاء كانه مسحوب منها الدم
سيل طاح من هول الصدمة ويهز راسه بنفي:لا لا ذول موب هم هذي شعرها ابيض انا صبا شعرها سواده يخطف الناظرين لا لا لا وصار يهز جسمه بطريقه هستيريا ويوسف حضنه عشان يثبته
الشرطي دق على الاسعاف عشان ياخذونهم
الشرطي ١ حط يده على كتف سيل:اخوي ادع لهم
سيل بعصبية ناظره:لو ماجلستو تحققون معاي كان هم حيين ومعاي مانب مسامحكم طول عمري ذنب هذا الصغيرة واشر على سبل وهو يرجف والدموع بدت تخونه وعبرت صوته كل شوي تخنقه وناظر يوسف راحو راحت بنتي يا يوسف ياكسرت ظهري راحت حاملة اسراري ونصفي الثاني راحت وحضنه يوسف لانه بدا ينهار يعني بدا يستوعب
جت الاسعاف وشالو صبا وسبل وسيل الي اخذته الاسعاف الثاني لانه اغمى عليه مر الوقت من سنه لسنه بدا سيل يرجع سيل الاولي بس مو سيل المسؤول لا رجع سيل المراهق الي ماهمه الا نفسه وسعادته مما خلى ابوه يشغله بشركة غصب عنه عشان يرجع حس المسؤليه فيه لين بدا يستوعب انه لازم يتحمل المسؤولية اكثر ورجع سيل الي تعرفه نصفه الثاني وابو سبل الي الكل يعرفه
~الواقع~
سيل طفى جواله ولف الا شاف ودق نايمه وتنهد وانسدح على ظهره وعيونه صارت على السقف يتامله ونام بدون مايحس

تفاعلو 💔💔💔