مايروس النجوم الا سهيل ولا يقود الظبا غير العنود

البارت الثالث والعشرين

~ داخل القصر ~
ام ماجد راحت للتين تقولها انه يوسف يبيها:امي لتين
لتين ناظرتها ببسمه:سمي ماما
ام ماجد ابتسمت ومسحت على شعرها:يوسف يبيك بالمجلس يمه ادخلي
لتين توترت:بس ماما
ام ماجد شدت على يد لتين:لا تخافين ولا تتوترين يا ماما صار زوجك الحين روحي اجلسي معاه شوي وارجعي لاتخافين مراح يسويلك شي
لتين وقفت وجسمها يرجف من الخوف وتوتر وراحت لجهة المجلس مع امها وعدلت الميك آب وشعرها ودخلت وجلست ام ماجد شدت على يدها:لا تتوترين يا ماما انا بستناك برا اذا تبين شي ناديني تمام
لتين هزت راسك وتركت يد امها
ام ماجد دقت على ماجد عشان يدخل يوسف
وخمس دقايق وانفتح باب المجلس من جهة الرجال ودخل يوسف وابتسم على جنب يوم شاف لتين تفرك باطن يدها ومنزله راسها
لتين حست عليه ورفعت راسها بثقه وكانه تلاشى كل الخوف والتوتر
يوسف بدت تختفي ابتسامته تدريجياً وسهى بعيونها المبطنه وشعرها القصير الي ماقد انتبه انه قصير وجميل هو دايم يحب الشعر الطويل بس شعرها لفت انتباهه
لتين ابتسمت يوم عرفت انه بدا يذوب فيها وتنحنحت:وعليكم السلام
يوسف تذكر ورجع لارض الواقع:اعتذر السلام عليكم
لتين هزت راسها وبخفوت:وعليكم السلام واشرت على الكنب تفضل
يوسف تقدم لها ومد يده بيصافحها وصافحته ببتسامة وشدها له وباس راسها:مبروك
لتين ما توقعت بيسوي كذا ووجها قلب احمر:الله يبارك فيك ومبروك لك بعد
يوسف ابتسم يوم عرف انها بدت تطيح بين يدينه بحركته وترك يدها وراح يجلس على الكنب وجلست هي بعيد شوي عنه وهو قرب منها
يوسف ابتسم على جنب ورفع حاجبه بطريقه جذابه:لا تبعدين عني انتي حلالي الحين وشبك يدها بيده ولف على فتحت الباب
~ صالة القصر ~
العنود شافت سهيل يتصل عليها وطلعت ترد:هلا
سهيل بهمس:قلتي لاخوانك؟؟
العنود تنهدت:لا للحين
سهيل بنفس الهمس:بسرعه قولي لهم لانه بعد ساعه لازم نمشي وما ابيهم يقولون اني خاطفك ويكلمون الشرطة مانب ناقص بكره يكلبشوني بالنمسا
العنود:خلاص بقولهم شوي ولفت على صوت من وراها وش بتقولين؟
العنود لفت وتنهدت براحة:اشجان خوفتيني احسبك يوسف ولا محب
اشجان ابتسمت:ليش خفتي وش مسويه؟؟
العنود قالت لسهيل شوي واكلمك ورد عليها تمام لا تنسين باقي ساعه لازم نكون بالمطار وقفلت
العنود لفت على اشجان:اسمعي بنسافر وما قالت ليوسف ومحب للحين
أشجان هزت راسها:لا لاتسافرين
العنود عقدت حواجبها:ليش؟؟
اشجان حست انها مالها دخل:قصدي لاتسافرين لين تقولين لهم
العنود:ايه هذا الي ابي اسويه شوي واكلمهم
اشجان هزت راسها:تمام بروح انا اجيب لي مويه ومشت للمطبخ ورسلت لمحب قابلني بالمطبخ بسرعة
محب عقد حواجبه من رسالة اشجان وقام يتسحب يطلع من المجلس للمطبخ
اشجان عدلت شعرها وفستانها والشال على كتفها
محب دخل المطبخ:اشجان سلامات العنود فيها شي؟؟
اشجان هزت راسها بنفي:لا مافيها شي الحمدلله بس لازم تمنعها بالي بتقوله
محب بدا يخاف:اشجان قولي الي عندك بدون تشفير
اشجان حطت شعرها ورا اذنها:العنود وسهيل بيسافرون ولسى ما قالت لكم بس بيمشون بعد شوي امنعها الله يخليك
محب مسح وجهه بعصبية:روحي ناديها بسرعة
اشجان مسكت يده:محب الله يخليك لاتعلمها اني قلت لك
محب تنهد وشد على يدها:مانب قايل يا اشجان ناديها استناها هنا بسرعة
اشجان ابتسمت وشدت على يدها وطلعت من المطبخ تنادي العنود
محب اخذ كاس مويه ولف على الي وقفت جنبه عند الثلاجه وعقد حواجبه
اسيا كانت مسويه شعرها بونتيل مرفوع ومسكته حطته على جنب وناظرته:فيك شي؟؟
محب ناظر عنقها الواضح وحبة الخال الي على رقبتها من ورا وتنح بريحة عطرها الي يدخل جوفه مع كل نفس ياخذه يحاول يتماسك عشان يقول اي شي بس قاعده تسحبه بجمالها وغمض وصد عنها:اسيا اطلعي
اسيا خافت انه فيه شي عشان كذا هو بالمطبخ:محب وش فيك تعبان تبي اناديلك احد؟؟
محب يهز راسه بنفي:لا لا بس اطلعي
اسيا مسكت معصمه عشان يلف عليها:مح ماقدرت تكمل اسمه الا حست بيده حول عنقها وتحاول تتنفس وتضرب يده وتمخشها بدون ماتحس تبيه يفكها
محب بدا يستوعب يوم شاف وجها يقلب احمر ونفض يده بسرعه واسيا طاحت على الارض تحاول تلقط انفاسها
محب نزل لها على الارض:اسف اسف والله ماكنت بوعيي
اسيا بعدت عنه ودموع بعيونها:بعد بعد عني وقامت بالقوة تطلع من المطبخ ويدها على رقبتها وشافتها العنود واشجان
العنود عقدت حواجبها:اسيا وش فيها؟
اشجان رفعت اكتافها:مدري
العنود صارت تشوفها وهي تبعد:طالعه من المطبخ
اشجان تذكرت محب وصارت تسحب العنود معاها بسرعه
العنود تمشي معاها:شوي شوي ياختي وش فيك مستعجله؟؟
اشجان بكذب:ابي قهوه بسرعة
العنود ضحكة وتمشي معاها ودخلو المطبخ واستغربت من وجود محب كان يطالع يده ومو حولهم ابد
العنود تقدمت بخوف:محب وش تسوي هنا؟؟
محب خبى يده بجيبه وهز راسه:جيت ابي بندول اتصلت عليك كان جوالك مشغول وقلت لماجد بس انشغل مع يوسف
العنود حطت يدها على ذراعه وفز ورجع:بسم الله وش فيك يدك تعورك؟؟
محب ابتسم:شوي بس لا تخافين مافيه شي
العنود راحت لدولاب وطلعت بندول ومدته لمحب:خذ يا حبيبي
محب اخذه وابتسم لها وهو ناسي ليش جاي اصلا:شكراً وكان بيمشي بس اشجان نحنحة عشان تذكره بالموضوع
العنود لفت عليها وطيرت عيونها عشان تسكت
اشجان ابتسمت:العنود اتذكر قلتي بتقولين شي لمحب ولا؟؟
العنود هزت راسها بوهقت:ايه صح
محب ناظرها ورفع حاجبه:وش؟
العنود بلعت ريقها:انا وسهيل بنسافر نغير جو
محب ابتسم والعنود ارتاحت شوي:لا
العنود عقدت حواجبها:لا!!!
محب هز راسه:لا مافيه سفر
العنود تكتفت:لا انا بسافر بس احط عندكم خبر مو استشيرك ركز
محب ابتسم وهز راسه ببرود:تمام ومشى يطلع من المطبخ
اشجان ضربتها على خفيف:غبيه انتي زعل منك الحين
العنود تمسح الضربه:احح يدك تعور وش اسوي فيهم هم ما استشاروني يوم بياخذ لتين وهذاني قدامك لابسه وكاشخه عشانه اخذ لتين يعني انا اوقف حياتي وهم يعيشون لا حبيبتي
:طلع كلام اسيا صح ماتبين لتين ليوسف
العنود لفت عليها وبأبتسامه:صح ومايحتاج تسمعين من احد بعدين تجين تقوليلي صح كلام فلان وعلان يا لين انا ما ابي لتين ليوسف بس هو اخذها
لين ضحكة بسخرية:ياليت زوجك يكون صريح مثلك ويقولك انه يخونك مع
اشجان طارت عيونها بصدمه:لين!!!
العنود ببرود:اعتذر اني خيبت ظنك وادري انه كان يخونني وقالي بنفسه ولين هذا بيننا ماله دخل سهيل ولا علاقاته
لين بصدمه:تدرين وساكته تاكلين وتشربين معاها وانتي عارفه انه زوجك كان معاها مع الاسف انه لتين كانت صادقه انه الفلوس تعمي العيون حتى لو يخونك قدامك راح تسكتين واشرت عليها من فوق لتحت لانه هذا الفستان والمجوهرات الغاليه ماتقدرين عليها وهذا القصر بعمرك كله مراح تسكنينه لو ما ابوك باعك على جدي وجدي اشفق عليك وعطاك لسهيل يتسلى فيك لانه بهذاك الوقت كان سهيل يحس بالملل اووه معليش قلت شي كان جدي يقولنا لا نعلمك فيه بس هذي الحقيقة ومدامك صريحة ليش نكذب عليك خلينا كلنا صريحين وعلى كلمة كان لا حبيبتي ولازال اسيا وسهيل للحين مع بعض واشجان شافتهم بعيونها يدخلون غرفتك قبل كم يوم والله اعلم وش كانو يسوون بس ما اتوقع انهم يسون شي بادب لانه الوضع الي شرحته اشجان اتوقع سويتيه مع (زوجك) وشددت على الكلمه وتكتفت
العنود كانت كل كلمة تقولها لين كانت تطعن قلبها مو عشان سهيل لا لانه صديقة الطفولة واختها كانت شايلة كل ذا بقلبها لين ماوصلت عند اسم اسيا وحست انها كانت غبيه طول السنين الي فاتت كانت تكذب قدامهم انهم الثنائي المثالي واسيا كانت عارفه كل حقيقتهم كانت تمثل طول السنين الماضيه واسيا عارفه انه تمثيل السر والاتفاق كان مكشوف عندها مشت من بينهم وطلعت لمجلس الرجال بدون وعي وصوت اشجان يلحقها بس ماتسمعه ودخلت عليهم
أبو سهيل انتبه عليها وصرخ:العنود
العنود وقفت قدام سهيل:طلقني
سهيل عقد حواجبه وبعصبيه:العنود داخله على رجال اطلعي
خالد شال بشته وحطه عليها:العنود
العنود طيحت بشت خالد:طلقني
الجد ساهر شال البشت وحطه عليها وسحب يدها بعصبية:العنود اطلعي برا
العنود نفضت يد الجد ساهر وناظرته:كذا تسوي بوصيت عبدالله يا ساهر طول السنين الي فاتت متحملة هذا الذكر عشان ابوي واليوم دريت اني تسليه له لحفيدك العزيز انا لعبة وتسليه يوم حسيت انه طفش وحس بالملل سحبت ورقة الادوية وسلمتها لصديقك واخوك عبدالله يا ساهر
سهيل سحب يدها وصرخ فيها:العنود
العنود ناظرته بحده:يدك القذره ما تلمسني فاهم وطلقني
سهيل العصبية والشرار يطلع من عيونه:انقلعي داخل يالعنود مدام يجيك بس الكلام
:وش قصدك هزلت صدق تبي تضربها يا ولد فيصل؟؟
سهيل :محب لم اختك ودخلها عندنا ناس
محب فصخ شماغ وحطه على راس العنود:طلقها مدام هذا الي تبيه وبنروح على الرحب وسعه ورجولنا مو طابه بيتكم ثاني مره
سعود يهدي الوضع:خالد قول لهم شي انت العاقل خل العنود تدخل وبيجيها سهيل يتفاهم معاها هنا فيه رجال وعيب
العنود ضحكة:سعود محشوم بس ما اشوف رجال هنا
سهيل صفقها بظهر يده:بنت
العنود وقفت خالد ومحب يوم تقدمو وحطتهم وراها ومسحت الدم الي على شفتها:قلتها بنت ياذكر وناظرت الجميع ثلاث سنين عايشه معاه ثلاث تحت سقف واحد والشيطان ثالثنا لازلت بنت ليومكم هذا
خالد مسك يدها تسكت:العنود
العنود لفت عليه وناظرته:تعبت اخبي ضعفه وعجزه ضيعت ورفعت اصابعها الثلاثه ثلاث سنين ثلاث سكت عشاني احبه واليوم ادري اني تسليه له
المجلس بحالة صمت وصدمة من كلام العنود
سهيل:انتي طالق وورقتك بكره عندك
العنود زغرطة باعلى صوتها
خالد زين البشت عليها وناظر محب وهمس:يوسف!!
محب هز راسه بنفي
~عند يوسف ولتين~
يوسف ابتسم على جنب ورفع حاجبه بطريقه جذابه:لا تبعدين عني انتي حلالي الحين وشبك يدها بيده ولف على فتحت الباب اشجان دخلت بسرعة
اشجان تناظر يوسف بدموع:سهيل طلق العنود
يوسف ولتين وقفو بصدمه
يوسف قرب منها:ايشش!!!
اشجان هزت راسها:تهاوشت العنود ولين عشان العنود قالت ماتبي لتين ليوسف ولين قالت كلام كثير وطلعت العنود لمجلس الرجال وقبل شوي سمعتها تزغرط طلقها سهيل طلقها
يوسف يحاول يستوعب:ما فهمت
لتين تنهدت:اشجان ولين والعنود تواعدو شي الي يسبب لهم حزن اذا تركوه يزغرطون عليه والعنود تركت الي يسبب لها الحزن اليوم وزغرطت
يوسف طلع من المجلس بسرعه وقابل العنود وحضنها:العنود
العنود ابتسمت وطبطبت على صدره:اليله ليلتك ياعريس لاتشغل بالك فيني معاي محب وخالد بروح اجيب ملابسي وعبايتي وارح بيتنا بيت ابوي وامي
يوسف بعد عنها ودخلت البيت تجيب اغراضها
يوسف طلع لمحب وخالد:وش صار وش فيها؟؟؟
خالد ناظر محب يقوله
محب رفع اكتافه:والله ما ادري انا دخلت على النهاية خالد كان موجود طول الوقت
خالد تنهد:نروح البيت واشرح الحين تطلع العنود
~داخل القصر ~
العنود نزلت شنطها وراحت لام ماجد وحضنتها:مبروك خالتي الله يتمم لهم مره ثانية
ام ماجد شدتها بفرح:حبيبتي عقبال محب ان شاء الله عن قريب
العنود ابتسمت:ان شاءالله وراحت لام سعود وحضنتها عقبال سعود واشجان تفرحين فيهم
ام سعود قلبها مقروص:امين ونشوف عيالكم انتي وسهيل وتشوفينهم معاريس ان شاءالله
العنود ابتسمت بدون رد وحضنت اشجان الي كانت تبكي بصمت لانها تعرف انه العنود بتروح من القصر العنود مسحت على ظهرها وبعدت ووقفت عند لتين وابتسمت مبروك صرتي بيننا ومرت اخوي وحضنتها صح انه بعمرنا ما اتفقنا على شي بس هل مره بنتفق على حب يوسف وبعدت ولتين امتلت عيونها وشدت على يد العنود وهمست اسفه
العنود هزت راسها بنفي وناظرتهم واخذت شنطها وعبايتها وطلعت
ام ماجد استغربت:لين وآسيا وين؟؟
لتين:اسيا تعدل الميك اب حقها ولين اكيد هنا
ام ماجد هزت راسها:زين
ام سعود مو متطمنه ابد واخذت جوالها:سعود امي تعال عند الممر الي ورا المجلس بعطيك شي
سعود:ابشري وتوجه للممر لامه
ام سعود قلبها مقبوض وشافت سعود يدخل ومدت يدها:وش فيك تاخرت مو مهم الحين عطني الي بجعبتك ياسعود
سعود تنهد ومسك يدها وباسها:سهيل طلق العنود
ام سعود شهقت:ياويلي ياحبيبتي ليش وش صار بينهم؟؟؟
سعود رفع اكتافه:والله مدري يا يمه مدري
اشجان من وراها:درت انه سهيل يخونها وانه جدي زوجها اياه عشان يعقل بس ما عقل للحين يخونها
ام سعود حطت يدها على فمها:بنتك يامنى وبنتي وش عاشت واحنا ماندري ماندري
سعود حضنها على جنب:يمه يمه لاتسوين بنفسك كذا اهدي عندنا مناسبة وخالتي نوره مستانسه بملكة بنتها لاتدري الله يخليك
ام سعود مسحت دموعها بسرعة:صح العنود طلعت بدون ماتعلمنا عشان ماتخرب وناستنا
أشجان هزت راسها واخذت امها ودخلت
سعود مسح وجهه:لا حول ولا قوة إلا بالله وش ذا اليوم قبل كم ساعة كانو مستانسين انهم بيسافرون ويفتحون صفحة جديدة وش سويت يا سهيل وش سويت؟؟؟

تفاعلو حبايبي🥹