مايروس النجوم الا سهيل ولا يقود الظبا غير العنود

البارت الرابع عشر

~بيت عبدالله ~
سهيل دخل البيت مع محب والعنود وجلسو بصالة
سهيل ناظر محب يستناه يمشي ومحب تكتف وسند ظهره على الكنب
العنود ابتسمت على حركة محب وناظرت سهيل:قلت بتكلمني وش فيه؟
سهيل ابتسم:كنت باخذك مطعم بعد العرس بس قالو البنات انك رحتي
محب ابتسم على جنب:البنات ولا بنت وحده بالاخص؟
سهيل طنش محب:واتصلت فيك بس مارديتي قلت اجي اشوفك احسن
محب كان بيتكلم بس العنود حطت يدها على رجله وابتسمت لسهيل:معليش مره ثانية الحين تعبانه من الطريق والعرس نشوف يوم ونطلع ان شاء الله
سهيل ابتسم وهز راسه:تمام ان شاء الله ووقف اجل انا بمشي بروح اريح بعد
العنود هزت راسها:مع السلامة
سهيل ناظرها يعني امشي معاي بس هي ابتسمت له وهو مشى يطلع من البيت وركب سيارته وصار يناظر الباب وحرك للفله حقته
محب وقف والسعاده واضحه على وجهه:بنوم احلى نومه الحين
العنود رمقته باستهبال:كل ذا عشان مارحت معاه؟؟
محب هز راسه ببتسامة:ايه يلا بروح انام وانتي حطي جوالك للمهم يمكن يوسف يتصل
العنود هزت راسها:تمام و راحت لغرفتها ومحب راح غرفته
العنود شالت فستانها وتروشت وطلعت تلبس بجامتها وشهقة يوم شافت سهيل على السرير حقها:وش تسوي هنا؟؟
سهيل ابتسم:ماكملنا كلامنا امس انتي نمتي قبل ماتسمعيني
العنود لمت روبها عليها:طيب اطلع بلبس
سهيل:متاكده تبيني اطلع؟؟؟
العنود هزت راسها:اييه تفضل واشرت على الباب
سهيل:محب وين؟
العنود:بغرفته يعني وين
سهيل هز راسه:مانب طالع مايصدق على الله يطردني البسي وانا موجود ولا البسي بالحمام
العنود اخذت بجامتها ودخلت الحمام تلبس وهي تتافف من سهيل وحركاته وهمست لنفسها:اصبري اصبري كم يوم وتفتكين منه لبست وخلصت وطلعت وجلست على كنب بغرفتها
سهيل عدل ظهره:تعرفين انتي انه مو قصدي اصرخ عليك واسحب يدك بس عصبت شوي انك متجاهلتني واحنا اتفقنا نكون اصدقاء يعني نعلم بعض كل شي حتى لو تضايقتي مني تعالي قولي انا قلت كذا وكذا وضايقني هذا الموضوع او انت قلت كلمه ضايقتني واشرحلي وش تقصد يمكن طلعت مني الكلمه بدون ما انتبه او مقصدي بالكلمة مو نفس ما فهمتيها
العنود هزت راسها:تمام
سهيل بنصات يستناها تكمل
العنود تطالعه:وش؟
سهيل عقد حواجبه:بس تمام؟؟؟
العنود:ايه وش اقول بعد؟
سهيل رفع اكتافه:مدري حسبتك بتقولين شي ثاني بعد تمام
العنود هزت راسها:لا ماعندي شي
سهيل وقف:تمام اجل بطلع انا بروح البيت ارتاح شوي
العنود هزت راسها ووقفت تروح لسرير:تمام وانا بنام
سهيل طلع
الفندق الي فيه سيل و ودق
دخلو الجناح الي حجزه ساهر لهم وكان ناوي سيل يوديها القصر على طول بس السواق وصلهم الفندق
سيل جلس على الكنب وشال شماغه وحطها جنبه وودق مشت من جنبه ووقفها صوته:لاتفكرين اني اخذتك بنفس اليوم ملكه وزواج اني ميت عليك وصبا مستحيل تطلع من قلبي
ودق بدون ما تلف:ولا انا ميته عليك وخل صبا وعشره ولا اقولك مليون غيرها بس لاتحسبني معاهم لانه حتى انت مستحيل تطلع وسكتت حست بغصه كيف تنطق اسم يوسف وهي تحس انها تخونه بهذا الزواج الاجباري ودخلت الغرفة وسكرتها بالمفتاح
سيل ناظر باب الغرفة وهمس:ليش وافقتي مدامك ماتبيني واخذ جواله واتصل على يوسف
رد عليه يوسف بصوت مبحوح:سيل وش فيك؟؟
سيل تنهد:قل وش مافيني ياخوي وينك فيه؟؟
يوسف خاف على ودق:سيل فيكم شي؟
سيل:لا مافينا شي بس وينك فيه؟
يوسف مسح وجهه:بالاستراحة
سيل عقد حواجبه لانه يوسف مايروح الاستراحة الا وهو مهموم:الاستراحة ليش ولا اصبر جايك
يوسف توهق:وين جاي وتارك وسكت كان بيقول اسمها وقال زوجتك
سيل اخذ اغراضه:جايك استناني لاتروح مكان وقفل وطلع يطلب اوبر لانه ماعنده سيارة
ودق سمعت تسكيرت الباب وفتحت الباب على خفيف وطلت ومالقت احد وشافت شماغ سيل نفس مكانه ورجعت تسكر الباب وراحت على السرير تبكي
سيل وصل للاستراحة ونزل ودخل
يوسف كان جالس بدكة بنص الاستراحة وشاب النار ومتلثم وسرحان بنار سيل جلس جنبه بس ماحس عليه
سيل عقد حواجبه:يوسف
يوسف فز:بسم لله هلا متى وصلت؟
سيل تنهد:من شوي وش فيك؟؟
يوسف هز راسه:ما
سيل قاطعه:لا تقول مافيني شي انت جيت الاستراحة يعني فيك شي
يوسف مايدري كيف يقوله انه الي صارت حلاله كانت حبيبته وهز راسه:مافيني شي بس قلت لك عن البنت الي احبها صح؟
سيل ابتسم:ايه الي رحتو تخطبونها وش فيها؟
يوسف تنهد بالالم:تزوجت
سيل تلاشت ابتسامته:ايش كيف وليش؟؟؟
يوسف رفع اكتافه:مدري بس اليوم كان عرسها
سيل تنهد:الله يوفقها وانت بتلاقي الي احسن منها ان شاء الله خيره ياخوك
يوسف هز راسه وهمس:ان شاء الله ورجع يصرح بنار هو وسيل
يوسف تذكر ولف على سيل:زوجتك
سيل رفع اكتافه:مدري
يوسف خاف عليها:سيل كيف تخليها بالفندق لحالها صاحي انت يمكن تحتاج شي ولا
سيل:عندها خدمة الغرفة اذا تبي شي تدق عليهم
يوسف وقف وسحب سيل معاه :امش امش مخليها لحالها مدري كيف وتنهد سيل ومشى معاه عشان يوديه الفندق وقلبه ينقطع انه حبيبته صارت حلال اخوه بس فيه شي مريحة انه سيل معاه الحين مو معاها كان يوسف يمشي على مهله عشان يتاكد انه ودق الحين نامت ووطاحت انظارهم على جوال يوسف الي دق وكان الاسم ودق يوسف واخذه بسرعة يقفل الجوال وحطه بحظنه
سيل ناظره:هي؟؟
يوسف هز راسه
سيل هز راسه باشمئزاز:عرسها اليوم و داقه صدق ماتستحي
يوسف شد على يده:سيل لاتقول ذا الكلام
سيل:صدق ماتستحي اجل وحده توها متزوجة وتكلم حبيبها لو انها تستحي على وجها كان جلست مع رجلها
يوسف بعصبية:يمكن رجلها خلاها بالفندق لحالها نفسك
سيل:يوسف وش تدافع عنها وهي مافكرت فيك وانا جيتك عشانك متضايق بس الشرهه علي
يوسف شد على يده:ما ادافع عنها بس ماندري وش ظروفها لاتقول انها ماتستحي
سيل:ماتستحي ترضى انت زوجتك بيوم زواجك تكلم حبيبها ياخي خذها بالعقل ماينفع
يوسف وقف قدام الفندق:سيل انزل
سيل اخذ جواله:بنزل بدون ماتقول لي وانت خلك معمي عندها ظروف قال اقول تلقاها الحين بحضانة وانت الي ميت هنا على فرقاها
يوسف ضرب الدركسون:سيل انزل
سيل نزل وخبط بالباب ويوسف مشى بسرعة
~قصر ساهر ~
كانو موجودين بصالة كلهم يتكلمون عن العرس وكيف كان جميل وهادي
ام سهيل بغرور:ايه هذا النسب الي يشرف بنفس مستوانا مو العنود
ام عشق وتوق:وش فيها العنود والله اليوم انبهرت صح ما اشوفها كثير بس ما شاء لله عليها
ام اسيا بتاييد:ايه والله شفتها ما شاء لله عليها
ام سهيل انقهرت:ايه من فلوس ولدي
اشجان هزت راسها:لا خالتي هذي فلوس محب ويوسف العنود ماتاخذ شي من سهيل
ام سهيل ناظرتها:وانتي وش يدريك يمكن تاخذ من ولدي وتمدح اخوانها
سهيل دخل:ماقد عطيتها شي هذي فلوس اخونها صدق
ام سهيل انقهرت زيادة:والله عيال الفقر يشترون من مصممين
سهيل جلس:يمه
ام سهيل تكتفت وسكتت
لين بهمس لاشجان:اخيرا احد سكتها
اشجان كتمت ضحكتها وهزت راسها
اشجان ناظرت سهيل بكره:العنود راحت بيتهم؟
سهيل ابتسم:ايه توني كنت عندهم
لين:متى بتجي؟
سهيل رفع اكتافه:والله ما سالتها متى ماتبي ترجع ترجع
اشجان رفعت حاجبها:ايه اكيد مراح تسال عشان تاخذ راحتك
سهيل عقد حواجبه:وش؟
لين قرصت اشجان وضحكة بوهقه:لا تقصد يعني تنام مرتاح وكذا
سهيل عينه على اشجان الي الكره واضح بعيونها وابتسم:اهاا بس انا ما ارتاح بعيد عن زوجتي
اشجان ضحكة بسخرية ورجعت شعرها ورا اذنها:استغفرالله بس انا بقوم اغير ابرك
سهيل استغرب منها
ماجد دخل:لين لتين يلا
الجد ساهر:وين بتودي البنات اخر اليل؟
ماجد ببتسامة مستفزة:جهنم
سهيل ناظره:ولد كلم جدي زين
ماجد ابتسم لسهيل:اتكلم بطريقه الي ابي وناظر البنات يلا يابوي
لين ولتين وقفو
الجد ساهر عصب:اجلسو محد طالع من البيت
ماجد حك حاجبه:اغراضكم بسياره يلا حبيباتي
سهيل:سمعت جدي محد طالع من البيت ماتفهم؟؟
ماجد:سهيل لا تدخل وخلك لاهي بنفسك
ام ماجد بدموع:يمه اجلس اسمع جدك وش يقول
ماجد حب راسها:يمه بتجين معانا لانه مالنا جلسه بمكان محد يبينا فيه
سعود ماكان يبي يتدخل بس ماجد زودها:ماجد وش تقول انت من الي مايبيكم جدي يبيكم والبنات يبون البنات وش جاك ياخوي؟
ماجد ابتسم لسعود:ماسمعتهم يقولون عني موظف عند سهيل ويوم قلت ابي حقي بشركة اني اكون مدير حطني مسؤول قسم محد يعرفه ورفعت هذا القسم صار اساسي وماتمر معامله الا لازم نوقع عليها بعدين يقول عني ماسويت شي واني موظف وين العدل ياخوي؟
سعود ابتسم له:هذا الموضوع مالي دخل فيه والله ولا اعرف عن الشركة شي بس مو معقوله انه امك تترجاك تسمع جدي مره وتسفهه وتشتت خواتك عشان موضوع شركة ولا موظف اسمع جدي يمكن تغير رايك حتى لو ماغيرت رايك لا تشتت خواتك وامك مالهم الا انت صح كلنا معاهم بس انت اخوهم من نفس الدم وهي امك الي حملت فيك وتعبت لين صرت الي انت اليوم فيه
ماجد تنهد وناظر الجد ساهر:تفضل؟
الجد ساهر ناظر سعود الي ابتسم انه ماجد سمع له:ماجد تبينا نتكلم هنا ولا بالمكتب؟
ماجد:الي انت تامر فيه
الجد ساهر وقف:يلا المكتب ومشى هو وماجد
ام ماجد ولين ولتين جلسو جنب بعض بخوف لانه اخر مره دخلو المكتب طلعو متهاوشين
المكتب
الجد ساهر جلست على كرسيه واشر على كرسي قدامه:تفضل ياماجد
جلس ماجد ويستناه يتكلم
الجد ساهر طلع اوراق وحطها قدامه:هذا مكتب كنت بحطه فرع جديد لشركتنا بس من بعد الموضوع قررت انه يكون لك لاكن بشرط هذا المكتب فاضي مافيه اي شي لا اسم لا نوع ولا حتى موظفين ابيك تبدا من الصفر وماتجيب اسم شركتنا الاساسيه وطلع شيك وحطه قدامه هذا راس مال بهذي الفلوس والمكان ابيك تسوي شركتك وان شفتها مع الشركات الكبيرة والحفل الي راح يقدم بعد كم شهر وبتكون لك وان فشلت راح ترجع تشتغل بشركه وتكون موظف وراح نسكر ذا الموضوع للابد وما يكون عندك اعذار لانه عطيتك فرصتك اتفقنا؟ ومد يده
ماجد يناظر الاوراق والشيك ومد يده يصافح جده:اتفقنا
وقف الجد ساهر ووقف معاه ماجد وطلعو من المكتب
ام ماجد تستنى يقولون شي:ها يمه بتاخذ خواتك؟
ماجد ابتسم لها وهز راسه بنفي:لا يمه خواتي بيجلسون معاك محد بيروح
ام ماجد زفرت براحه:وانت؟
ماجد ابتسم:وانا بعد
ام ماجد حضنته:الله يحفظكم لي يايمه وحضنت بناتها
لين ناظرت ماجد:ترا محد بيطلع اغراضي الا انت
ماجد اشر على خشمه:ابشري على ذا الخشم
لتين ناظرته:وانا بعد
ماجد حب راس خواته وامه
الجد ساهر ابتسم لهم ورفع جواله الي اتصل وعقد حواجبه:يوسف وش فيك؟؟
سهيل رفع ظهره يسمع
الجد ساهر حط يده على لحيته ويفركها:زين استناك بالمجلس وقفل
سهيل:العنود فيها شي؟
الجد ساهر هز راسه:لا جاي يكلمني ووقف وسهيل وقف معاه واشرله يجلس وطلع من البيت بهدوء غريب الي خلى البيت يخاف
لين حطت يدها على شفايفها:اتوقع الموضوع
البنات هزو راسهم بايه
ام ماجد عقدت حواجبها:وش الموضوع
لين ابتسمت بوهقة:موضوع يخص عايلة عمي عبدالله
ام ماجد:وش فيهم يعني موضوع فلوس؟
عشق هزت راسها:شكله تذكرين قال بيكلمه عن الديون حقت عمي عبدالله يمكن ماقدر يسددها وجاي ياخذ سلف
ام ماجد بحزن:ياحبايبي تشحططو بعد اهلهم الله يرحمهم
المجلس كان جالس الجد ساهر بقلب المجلس كل من دخل شافه بهيبة وشموخ
يوسف دخل وابتسم على جنب لانه هذي حركات ساهر وتقدم سلم عليه وجلس:عمي جيتك عشان موضوع الدين الي على ابوي عطني المبلغ وبدبره واعطيك اياه
الجد ساهر هز راسه:قلت لك مسامحة انا
يوسف تنهد:عمي ساهر وانا قلت لك لازم اسدده
الجد ساهر فرك باطن يده:المبلغ عالي ياولدي
يوسف:قله وانا بدبره
الجد ساهر:ليش تبي تسدد ديونه؟؟
يوسف:عشان يرتاح بقبره وباخذ اخواني
الجد ساهر:وين بتاخذ محب؟
يوسف ابتسم:بنطلع من الرياض ومو بس محب حتى العنود
الجد ساهر عقد حواجبه:العنود زوجة سهيل مراح تروح مكان
يوسف ابتسم:العنود بنت عبدالله واخت يوسف ومحب لها قرار ومو موضوعنا الحين كم الدين عشان ادبره؟
الجد ساهر تنهد:المبلغ فوق ٥٠٠ مليون
يوسف بصدمة:٥٠٠ مليون؟؟؟؟
الجد ساهر هز راسه:ايه وابوك ماكان يبيكم تعرفون لانه مبلغ يشق الظهر
يوسف مسح وجهه:٥٠٠ مليون ابوي وش ماخذ منك؟؟؟؟
الجد ساهر هز راسه:ما اخذ مني شي انا سددت ديون لشركة كانت خسرانه وكان حد الخسارة مليار ريال كنا داخلين شراكة مع رجال طلع حرامي وانا خسارتي كانت قليله يمكن حوالي ١٠ مليون بس ابوك والرجال الثاني كانت خسارتهم عاليه ونحاش الرجال الثاني وصار ابوك يسدد حقته وحقت الرجال الي انحاش لديانه لانهم كانو يطقون عليكم الباب بنص اليل عشان فلوسهم وابوك خاف عليكم وعلى العنود وقالي اسدد وهو يرجعها لي
يوسف ضغط على عيونه لانه الكم الهائل من المعلومات والحقائق الي قاعد يقولها عمه ساهر شي يشيب الراس يعني لو فنى عمره كله مراح يقدر يسدد حتى ربع المبلغ
الجد ساهر طلع ملف:هذا الملف فيه السدادات والباقي وكل شي يخص القضية
يوسف اخذ الملف ووقف:لاتعلم محب والعنود بالموضوع خله بيننا لو سمحت
الجد ساهر هز راسه:ابشر وطلع يوسف من المجلس
الجد ساهر تنهد:بتشيل الهم نفس ابوك لحالك اخخ منك ياعبدالله ورثتهم هصفه ووقف يطلع من المجلس

تفاعلو🤍🤍