مايروس النجوم الا سهيل ولا يقود الظبا غير العنود

🤍 الاخير🤍

~ المقبره ~
كل الرجال عزو سهيل ويوسف ومحب ومشو وباقي سعود وماجد وسهيل ويوسف ومحب عند القبر
يوسف ربت على كتف محب:محب يلا عندنا عزاء بالبيت
محب مسح على قبرها ووقف وناظر سعود وماجد:جزاكم الله خير ماتشوف شر خالتي حصه
سعود هز راسه:احنا اخوانها بعد الشر مايجيكم ان شاء الله
يوسف سبق محب لسيارة وماجد وسعود لحقوه كل واحد بسيارته
محب لف بيمشي ووقف:جزاك الله خير اتوقع هنا انتهينا اخر شي يربطنا دفنته اليوم
سهيل يمسح على قبرها:تتوقع تسامحني؟
محب لف عليه وهز راسه:ايه -سهيل رفع راسه لمحب وكمل-اذا نشف قبرها ولف يمشي ووقف ثاني مره بس انا بتاكد انه يكون دايم رطب وخلى سهيل جالس وهو راح لسياره يوسف يتوجه للبيت
سهيل جلس عند قبرها لساعات بدون مايحس وفز يوم حس بيد على كتفه
سيل بحزن:سهيل مايصلح الي تسويه يلا نروح البيت
سهيل بغصة:١٥ سنه الفرق الي بيننا بحياتي كلها مافكرت بالخمس طعش سنه لين ماقال لي جدي يوم كان عمري ٢٠ هي كان عمرها ٥ كيف افكر فيها كزوجه كيف اجي اقوله اني ابيها وقلت له القلب مايعرف الفرق الي بيننا قالي بس انا وانت وابوها نعرف الفرق تتوقع بيرضى ماعرفت اجاوب تعرف ليش
سيل جلس جنبه:ليش؟؟
سهيل:لاني تعودت اي شي ابيه يجيني كنت بقول له من هو عشان يرفضني بس تذكرت انها مو اي شي و ١٥ سنه مو قليله اتذكر طلعت وهي داخله البيت مدري كيف صرت عند جدي ثاني مره واترجاه اني ابيها ومابي احد غيرها ويمكن يصير لي شي اذا ما اخذتها مدري متى حبيتها مدري من متى وهي داخله قلبي بس الي اعرفه الحين اني احس بفراغ كبير مابي اتحرك من مكاني عشان ما اضيع احس هذي البقعه الوحيدة الامان لي من الضياع
سيل تنهد:اعرف هذا الشعور بس مراح تفيدك ولا تفيدها جلستك هنا امك خايفه عليك و تحاتيك تعال معاي وريح قلبها يلا سهيل
سهيل مسح على القبر ووقف مع سيل يروحون لسيارة و توجهو للقصر بعدها بيطلعون يروحون لبيت عبدالله
~ فلة عبدالله ~
كانو البنات يحاولون ينشغلون باي شي عشان ما يتقابلون ويحسون بغياب العنود بينهم
ام ماجد كانت تشوفهم بس ماتقدر تسوي شي لانه حتى هي تستنى العنود تجي تسالها وش تسوي او وين تساعد فيه وناظرت لتين:امي لتين يوسف ومحب اكلو شي؟
لتين هزت راسها:لا يمه عطيتهم كل شي بس السفره نفس الروحه هي الجيه ما يلمسون شي
ودق وقفت عند ام ماجد ومسحت على كتفها:يا ام ماجد لاتحاتين الحين ادق على سيل يجيب لهم شي ياكلونه قبل مايجون الناس
ام ماجد ابتسمت بخمول:زين يمه وراحت
ودق ناظرت لتين:ارتاحي وجهك اصفر اكلتي شي؟
لتين هزت راسها بنفي:مانب مشتهيه والله
ودق:ليش يا لتين مو زين الي تسوينه اذا انتي ويوسف ومحب ما اكلتو لاسمح الله بيصير لكم شي
لتين:الحين باكل لازم واحد مننا يصمل
ودق ابتسمت لها وراحت تكمل تساعد بالاشياء الخفيفة عشانها حامل
~ مجلس الرجال ~
كان الصمت يسود على المكان وكل من محب ويوسف غارق بافكاره وهمه لين مالفو على دخول شخص
:دفنتوها؟
محب تقدم له بضعف:خالد اذكر الله
خالد غمض عيونه:لا الله الا الله يارب استغفرك واتوب إليك
محب شده ودخله يجلس وعطاه مويه
خالد ناظرهم:وش صار كيف
يوسف مسح دمعته الي طاحت:كذا على طول مدري متى وكيف شفت ماجد يقول تعالو معاي فجاه احنا عند سيارتها او الاصح الي باقي من سيارتها
خالد مسح وجهه:يالله
محب بزعل:قلت لابوي ماتحتاج سيارة احنا فيه
يوسف تنهد:محب
محب هز رأسه:سكت خلاص
مرت الثلاث ايام بغمضة عين وكل شخص رجع لبيته وخلى بيت عبدالله
يوسف دخل البيت بتعب واستقبلته لتين:حبيبي رجعت؟
يوسف مر من جنبها بدون ما يكلمها ولحقته:يوسف وش فيك؟
يوسف وقف ومسح وجهه ولف عليها:مافيني شي تبين شي انتي؟
لتين تقدمت له وحطت يدها على صدره وهو بعد عنها:محب بيشوفنا
لتين تكتفت:محب نايم بالمشب
يوسف هز راسه:زين وانا بعد بنام ودخل الغرفة
لتين لحقته للغرفة:يوسف وين كنت؟
يوسف يشيل اغراضه يحطها على التسريحة:وين بكون يعني
لتين رفعت اكتافها:علمني انت وين كنت يخلص العزاء تطلع ماترجع الا وجه الصبح -وقربت تشمه وبعد يوسف عنها بستغراب-مافيك ريحة عطر ومسكت ياقة ثوبه ولا علامات انك تخوني
يوسف تكتف:يمكن غيرت ثوبي عندها طيب
لتين هزت راسها:طيب ولفت راحت لسرير
يوسف راح يغير ملابسه ورجع لقاها جالسه على الجوال وتبتسم بخفيف وعقد حواجبه:لتين؟
لتين رفعت راسها وتحاول تكتم ابتسامتها:وش؟؟
يوسف تكتف:وش تسوين؟
لتين هزت راسها:ولا شي
يوسف:وش تبتسمين عليه؟
لتين:واحد يرسلي فيديوهات بتيك توك تضحك
يوسف حك حاجبه:نعم؟؟؟
لتين هزت راسها:ايه مو تبي نكون صريحين مع بعض واحد يرسل لي فيديوهات
يوسف سحب جوالها ووقفت:يوسف جب الجوال
يوسف الشرار يطلع من عيونه:انتي وحده متزوجه كيف ترضين تردين على واحد خسيس ماتعرفينه
لتين تكتفت وسحبت الجوال من يده:حسيت بالي حسيته يوم قلت يمكن غيرت عندها وانسدحت على السرير وسكرت جوالها وغمضت عيونها
يوسف تنهد وجلس على السرير:بسجن جدك
لتين جلست ولفت عليه:وش قلت؟؟
يوسف هز راسه:الشرطة لقت ابو ودق وهو اعترف انه ساهر هو الي كان يسوي كل شي هو بس كان يعرف و ماعلم عليه عشانه غني وعنده نفوذ وخاف وهرب
لتين:لا لا جدي مايسوي كذا ليش اصلا يسوي كذا
يوسف:كان يبي نصف ابوي عشان يفلس
لتين:ليش يبيه يفلس وش مسوي ابوك له؟؟؟
يوسف:جدك كانت عينه على امي بس هي تزوجت ابوي يحسب بذي الطريقة بتترك ابوي وتروح له
لتين ضحكة:يوسف نسمع نفسك انت وش ذا الفيلم الي تقوله خالتي منى كبر امي اكيد انه كذب
يوسف رفع اكتافه:بنشوف اذا كذب ولا حقيقة بكرة
لتين:وش بتخلي الشرطة تاخذه؟
يوسف هز راسه:لتين موب انا الي اعطيه لشرطه الشرطه طالبينه من كم يوم بس انا خليتهم يخلونه لين يخلص العزاء بكره بياخذونه يحققون معاه هذا شي الزامي اذا كان حقيقه ولا لا هذي فيها حق ناس كثير القضايا الي شفتها عليهم تزوير وفساد وتدمير ممتلكات والله اعلم وش بعد
لتين:بس
يوسف مسك يدها:مافيها بس يا لتين هم لعبو بنار والحين مانقدر نسوي شي لانها قاعده تحرق كل شي
لتين حطت راسها على صدره:عشان كذا كنت تتجاهلني
يوسف مسح على شعرها:ماعرف وشلون اقولك انه الموضوع اكبر مننا
لتين شدت عليه:الله يخليك لعد تخبي شي علي
يوسف شد عليها:وعد
~ ٩:٠٠ الصباح بقصر ساهر ~
دخلت عليهم العاملة وهم بصاله: Mr. Saher, the police are at the door
ابو سهيل عقد حواجبه:الشرطه؟؟
العامله هزت راسها:yes
الجد ساهر وقف ووقفو عياله معاه:خير اللهم اجعله خير وطلع
بدر:سيد ساهر؟
الجد ساهر مد يده يصافحه:وصلت
بدر صافحه:تفضل معانا القسم لو سمحت
ابو سعود:لو سمحت فهمنا وش فيه ليش تبون ابوي؟
بدر ناظره:سيد ساهر متهم بتعاون مع محمد الفيصل بقضايا فساد وتزوير وتدمير ممتلكات خاصة تفضل معاي استاذ ساهر
الجد ساهر هز راسه ومشى معاه
ابو سهيل:يبه بكلم يوسف يلحقنا بالقسم ودخل يجيب مفاتيحه ويدق على يوسف يروح القسم
وصل بدر مع الجد ساهر:سيد ساهر بيحطك الضابط بغرفة التحقيق وبجيك بس اخلص كم شغله واشر لضابط واخذه لغرفة التحقيق
الضابط فتح الباب وكان جالس ابو ودق ورفع راسه وشاف الجد ساهر وخاف:اعتذر غرفه ثانيه وسكر الباب و وداه غرفة ثانيه
الجد ساهر جلس وكان هادي عكس ابو ودق مر الوقت ودخلت هيام
هيام حطت الملف:سيد ساهر ال نافل صحيح؟
الجد ساهر هز راسه:صحيح
هيام جلست:ما احب لف ودوران محمد الفيصل اعترف بكل شي انه انت الي سويت كل شي عشان كذا انت الي بتتحاكم بداله بس انا قلت وشلون نسمع من طرف واحد يمكن انه يكذب ويبي يتهمك ولا
الجد ساهر هز راسه:صح
هيام ابتسمت:عشان كذا ابي الحقيقة كلها
الجد ساهر:الصراحة انا ما اعرفه زين هو يكون ابو زوجة ولدي سيل ولا اعرف هو وش يحكي عنه جبتوني تزوير وفساد بس انا شغلي نظامي وحسب القانون
هيام حطت الملف وفتحته:عبدالله ال ملهم تعرفه؟؟
الجد ساهر ناظرها:اكيد الله يرحمه كان اخو دنيا واصدقاء من الجامعة يمكن او اقدم
هيام هزت راسها وطلعت صوره:هذا أنتم بالجامعة صحيح
الجد ساهر اخذ الصورة وابتسم:ايه هذا انا وهذا عبدالله من الجامعة
هيام:بس انت قلت انك ماتعرف محمد الفيصل بس آلصوره تحكي شي ثاني وطلعت صوره فيها الثلاثة واقفين جنب بعض وهم صغار بعمر المراهقه
الجد ساهر حك طرف الصوره الي معاه:المراهقه ما اتذكر يمكن يكون صديق عبدالله
هيام:طيب ماعلينا من الصور الحين انت متهم بعدت قضايا عندك دليل انك برئ؟؟
الجد ساهر هز راسه بنفي:ماعندي شي لاني ما ادري وش تتكلمون عنه
هيام ابتسمت:بس انا عندي دليل انه شركتك كانت واجهه لكل عمليات التزوير محمد عطانا اياها كنت تضحك على الشركات الصغيرة انك بتنجحها واذا اتفقتو تسحب نفسك وتفلس الشركة وترجع تشتريها باوراق ثانيه
الجد ساهر ضحك بخفيف وحك حاجبه:هذا مو صحيح
هيام ناظرته بحده:مانتهيت فيه شهود واوراق من التأمينات ومن الناس واخر شركة كانت شركة الملهم ووقفت خبطت الطاولة الي هي حقت العنود الملهم واكيد انك تعرفها مدامك صديق ابوها وزوجة حفيدك واذا ماكنت تعرفها وتبي تستغبي شريكها يكون ماجد الصالح وهو الولد الكبير لبنتك نوره
الجد ساهر هز راسه:لا شركة الملهم كنا نبي نشترك معاهم ماكان بيكون فيها نصب ولا احتيال
هيام رفعت حاجبها:يعني تعترف انه الشركات الاولى كنت تنصب عليهم
الجد ساهر هز راسه بنفي شديد:لا لا انا ماقلت كذا انا ما اعرف وش صاير ووش قال لكم محمد بس انا مالي دخل
هيام جلست:يعني مانصبت على عبدالله الملهم يعطيك نص حقه الي بينكم؟؟؟
الجد ساهر كان بيتكلم فجاة سكت وناظرها:ابي محامي
هيام ابتسمت ووقفت:حقك المحامي يوسف الملهم اكيد وصل
الجد ساهر وقف:ابي غيره
هيام اشرت له يجلس ومدت له ورقه:اكتب اسمه ورقمه
الجد ساهر كتب الاسم ورقم اخذت هيام الورقه والملف وطلعت
بدر ويوسف طلعو من غرفة القزاز وراحو لمكتب بدر
يوسف جلس:الحين وش نسوي؟
بدر رفع اكتافه:مدري والله بس وشلون عرفت انه بين ساهر وعبدالله شراكه وانه ناصب عليه؟؟
يوسف تذكر العنود وتنحنح:عرفت قريب انه كان بين ابوي وساهر شراكه بس ماعندي دليل ملموس
بدر مسح على وجهه وتنهد
صوت من عند باب المكتب:انا عندي الدليل
يوسف لف على الصوت:سعود
سعود دخل وحط الملف على الطاولة ناظر يوسف:العنود حطته على مكتبي قبل الحادث
يوسف حضنه لانه رجع الامل له وسعود ربت على ظهره وبعدو
بدر وقف وصافح سعود:مشكور بتساعدنا كثير اننا نكشفهم
سعود ابتسم:ولو صح انه جدي بس القانون قانون
هيام ناظرته وطاحت عينها بعينه وصد عنها سعود:استاذن انا ابوي وعماني موجودين بحاول ارجعهم للبيت
بدر هز راسه وعينه على هيام الي جلست وكانت سرحانه
يوسف اخذ الاوراق وصار يقراهم:هذي الاصليه الاوراق الاصليه
بدر وقف جنبه وصار يقراها وابتسم:تبي تشرفنا بكشفه
يوسف وقف:اكيد وطلع هو وبدر لغرفة التحقيق
يوسف فتح الباب ورفع راسه الجد ساهر:ساهر ساهر كنت اعدك حسبت عمي الحقيقي الي هو اخو ابوي بس -ورمى الملف على الطاولة- بعد هذا الشي ماضنتي حتى اني بتذكرك بالحسنه
الجد ساهر مسح وجهه:ابوك اخذ مني كل شي
يوسف تكتف:كل شي الي هي امي؟؟
الجد ساهر هز راسه:وش تقول انت امك بنتي انا كنت متزوج غير ام فيصل وتوفت وهي تولدها وماقدرت اربيها او اعطيها لام فيصل وابوك كان يدري بس امك ماتدري لانه المربيه عدتها بنتها وماكنت ابي اخرب كل شي عشان كذا حطيتها بمدرسة نوره عشان يكونون خوات وصديقات
يوسف جلس من الصدمه:يعني كيف وش تقول انت؟؟؟
الجد رفع ظهره:يوسف كل الي اقوله حقيقه امك هي بنتي وعندي اثباتات كلها بمكتبي خذ المفاتيح من الشرطي
بدر حط يده على كتف يوسف:يمديك تطلع
يوسف هز راسه بنفي:وش قصدك باخذ كل شي منك؟
الجد ساهر:محمد الفيصل ليش ما زوجك بنته بعد ماعرف انك ولد عبدالله الملهم تعرف ليش اكيد لا محمد وعبدالله صار لهم شي وهم مراهقين من بعده عبدالله ومحمد معد صارو اصدقاء ولا يحبون بعض
بدر ضرب الطاولة:ساهر لاتغير الموضوع ليش عبدالله الملهم اخذ كل شي منك؟
الجد ساهر تنهد:عرفت بعدين انهم كانو يبيون يسون معاي مقلب وبالغلط انحرق البيت وامي كانت فيه وماتت مخنوقة ومحروقه بسبب محمد وعبدالله ماعرف الا من كم سنه عبدالله كان هو الي فكر و نفذ وتعاونت مع محمد عشان نخليه يعترف اذا اخذت كل شي له وهو شرط عشان يوافق اني ازوج ودق لسيل عشان تبعد عنها
يوسف قام معصب وطلع من غرفه التحقيق بعد مده قصيره رجع ودف محمد لداخل غرفه التحقيق وناظر ساهر:ارجع عد كل الي قلته
الجد ساهر:بس -يوسف ضرب الطاولة بعصبيه-عد الي قلته -الجد ساهر عاد القصة كلها كان كل ماله ابو ودق يعتلي الخوف ملامحه
يوسف ناظر ابو ودق:هل قصه حقيقيه؟؟
ابو ودق فز وهز راسه:ايه ايه كذا هي
يوسف تقدم وبدر وقف قدامه بس هو ربت على صدر بدر وهز راسه انه هادي وجلس:وش الجزء الي حقيقي؟
ابو ودق:كله
يوسف ابتسم:بس احنا اتفقنا مع ساهر يقول كل هذا
ابو ودق تلخبط:بس هذي الحقيقة انا شبيت بالبيت
الجد ساهر وقف:انت؟؟؟؟
ابو ودق استوعب:عبدالله عبدالله الي حرق البيت
بدر قوم ابو ودق وطلعه يحقق معاه هذي جريمه قتل هذي لفل ثاني مو نفس النصب والاحتيال
الجد ساهر حط يده على راسه:كيف
مرت الشهور من التحقيق والمحاكمة وحكمو على محمد الفيصل مؤبد لانه متهم بقضية قتل ام ساهر وقتل عبدالله ومنى هو الي دبر الحادث عشان كان رايح يفضحه عبدالله من تأنيب الضمير الي قاعد ياكل معاه وخلى سياره تصدمهم وقضية فساد وتزوير
وحكمو على ساهر ١٠ سنين وغرامه مليار بتعاون مع محمد الفيصل بقضايا الفساد وتزوير
~مكتب هيام~
هيام دق جوالها:هلا غيث طيب طيب الحين جايه ووقف طلعت مسرعه ودخلت المستشفى
غيث كان واقف وراحت له:وش فيها؟
غيث رفع اكتافه:رحت اعطيها اكل ولقيتها طايحه على الارض وجبتها مدري وش صار
هيام هزت راسها:طيب كلم سعود يجي
غيث طلع جواله ودق على سعود يجيهم
طلع الدكتور وتقدمو:دكتور
الدكتور تنهد:انتم عارفين من اول انه مابيدي شي وكيماوي معد صار يعطي مفعول معاها افضل شي تسونه الحين انكم تكلمون اهلها
من ورا الدكتور:واموت مرتين لا شكرا
هيام تقدمت لها:العنود ليش قمتي
العنود ابتسمت بشحوب:وش بيصير لي اذا جلست بالمستشفى سمعتي الدكتور وش قال مافيه شي باليد يتسوى
غيث حك حاجبه:وسمعتيه يقول افضل شي تسونه تكلمون اهلها
سعود جاي راكض بخوف:العنود
العنود اشرت له يهدا:هنا انا هنا لسى مارحت مكان
سعود مسح وجهه:استغفرالله ليش ليش تحبين الكلام الي ماله داعي
العنود ابتسمت واختفت ابتسامتها تدريجيا وصدت:يوسف هنا
سعود هز راسه:صح ودق تولد بالمستشفى والعائلة كلها هنا وهو جاي مع لتين
العنود لفت عليه ببتسامه:امانه تولد هنا؟
سعود هز راسه:قسم الولاده الدور الي فوقنا تبين تشوفينهم؟
العنود هزت راسها بنفي:لا لا اخاف يشوفوني
هيام بحنيه:روحي شوفيهم من بعيد محد راح ينتبه لك
العنود:صدق كلهم هزو راسهم باكيد وتنهدت ومشت للمصعد معاهم ودخلو كلهم وتسكر وانفتح ثاني مره ودخل سهيل الي صار محد يعرفه من الهم وطق شعره ودقنه ابيض
سعود حط غيث قدام العنود عشان ماتشوف شكل سهيل:وش فيك جاي المستشفى؟
سهيل تنحنح:مدري امي قالت تعال المستشفى
العنود رفعت راسها يوم سمعت صوته شهور ماسمعته وصارت تتحرك تبي تشوفه بس غيث صاد عليها و مايمديها تتكلم عشان مايعرفها
هيام بعدت غيث شوي عشان العنود تشوف سهيل والعنود يوم شافت طرف وجهه صدت ماقدرت تشوفه
هيام تنهدت ووقف المصعد ونزل سهيل ووراه سعود ومشو للقسم الي يبونه بعد وقت العنود وهيام وغيث راحو للقسم الي فيه العايله بس بعيد عنهم
العنود ابتسمت يوم شافت اشجان ولين وام ماجد وام سعود كلهم كانو بشوشين ومبتسمين ومسحت دمعتها الي طاحت ولفت على دخول لتين وهي ماسكه بطنها وزادت ابتسامتها لانها بتكون عمه وصدت يوم حست انها ماتقدر تكمل توقف وتعبها بدا يزيد وبهت وجها وشفايفها
هيام شدتها لها:بسم الله يلا نمشي ماينفع توقفين كثير
العنود ابتسمت:بخير انا شوي بس
غيث ناظرها:العنود خشمك
العنود حطت يدها على خشمها وكان فيه دم وحطت منديل عليه:بروح الحمام اغسل وبعدت عنهم وصدمت احد واعتذرت وكملت مشي للحمام
يوسف شاف غيث وراح يسلم:غيث الهامي؟
غيث ابتسم وبتوتر:ارحب يوسف الملهم وصافحه وشلونك
يوسف ابتسم:الحمدلله وشلونك انت وبدر والعايلة كلكم بخير ان شاء الله
غيث هز راسه:الحمدلله كلنا بخير عسى ماشر ان شاءالله مافيك شي؟؟
يوسف هز راسه ببتسامة:الشر مايجيك بس اخوي سيل جته بنت اليوم الحمدلله و جاين نبارك له ونشوف البنيه
غيث صافحه يبارك له:ما شاء الله مبروك ماجاكم تتربى بعزكم يارب
يوسف ابتسم:الله يبارك فيك وعقبالك ان شاء الله يلا واضح انك مشغول جيت اسلم وامشي
غيث هز راسه:مع السلامة وتركهم يوسف وراح للتين
يوسف همس لها:تعبانه يابوي؟؟
لتين هزت راسها ببتسامه:لا والله مانب تعبانه حبيبي ولفت ناظرته وشهقت بخفيف يوسف فيك شي يعورك شي؟
يوسف خاف:لا وش فيك انتي يعورك شي
لتين اشرت على الدم:هذا دمك؟؟
يوسف شافه وهز راسه بنفي:لا ياقلبي قبل شوي صدمتني وحده وشكله منها مافيني شي انا
توق وقفت مصدومه جنب البنات
عشق:وش فيك؟؟
توق هزت راسها بنفي وساكته
لتين لفت عليها وتاشر لها تجيها وراحت لها توق:وش فيك تكلمي؟
توق ناظرت يوسف الي معقد حواجبه وهو فهم وراح:بالحمام شفت العنود
لتين ابتسمت بخفيف:توق حبيبتي يمكن وحده تشبه لها الله يرحمها
توق هزت راسها:يمكن بس كانت مره تشبه لها بس الله يشفيها شكلها عندها سرطان وكان خشمها ينزف
لتين تذكرت كلام يوسف وابتسمت:لا ينشغل بالك بمواضيع كثيره خلينا نستانس مع سيل ووقفت بروح الحمام وارجع توق هزت راسها وجلست تفكر
لتين دخلت وكان فيه بنت شايله طرحتها ومافيها شعر وتغسل وجها:العنود
العنود لفت تحسبها هيام وانصدمت
لتين مسكت بطنها بخوف انه عقلها يوهمها:لا لا لا
العنود اخذت طرحتها ولفتها على راسها وكانت بتطلع
لتين وقفت قدامها ومسكت وجها:العنود
العنود هزت راسها بنفي ماتبي تتكلم عشان اكيد صوتها بياكد انها العنود
لتين تركتها ومشت العنود ووقفها صوت لتين:اذا مو انتي العنود المنديل بيحدد كل شي
العنود لفت عليها:الله يخليك لاتعلمين احد انك شفتيني الله يخليك
لتين حطت يدها على قلبها:كيف تبيني اسوي كذا العنود ماتدرين وش صار فينا من رحتي خالتي حصه جتها جلطه وامي عايشه مو عايشه ويوسف ومحب ما احكيلك وش صار فيهم وسهيل سكتت يوم رفعت العنود يدها تسكتها
العنود بتعب:الله يخليك لاتكملين
لتين قربت منها:ليش سويتي كذا بس ابي اعرف
العنود هزت راسها:ماكنت ابي اسوي كذا انا طلعت من القصر بروح لسعود اعطيه الملف ونزلت حطيت الملف فمكتبه وطلعت كنت جايه لبيتنا بس سيارتي ماكانت موجوده نسيت اطفيها او مدري بس ماكانت موجوده ورجعت لمكتب سعود استناه عشان اقول له بس طول وسالت عنه قالو عنده عزاء زوجة ولد عمه توفت الي هي انا وطلعت من مكتبه وصحيت انا بالمستشفى كان غيث معاي قالي عندي ورم بدماغ والحالات الي كانت تجيني مو صرع وكنت اكل ادويه غلط جاني سرطان الدم مايمديني ارجع لتين وشالت الطرحة انا كنت عارفه بورم الدماغ عشان كذا قصيت شعري مو عشان اني ما احبه لا عشانه بيطيح
لتين حطت يدها على فمها:العنود
العنود حضنتها:وحشتني والله كلكم بس ما اقدر ارجع حضرت عزاي مره وشف كيف حالتكم مابيها تنعاد وبعدت وحطت يدها على بطن لتين ببتسامة بصير عمه
لتين هزت راسها:ايه يوسف يبي يسميها العنود بس سيل سبقه
العنود ناظرتها وهزت راسها:لا لا تسمونها العنود قولي لسيل لا يسميها يدور اي اسم ثاني غير العنود
لتين:بس
العنود:لا بس ولا شي لا تسمون العنود روحي قولي اي قصه اهم شي لا تسمين العنود روحي
لتين حضنتها وطلعت لسيل وطلعت العنود من الحمام بتطلع من المستشفى كله
لتين وقفت جنب سيل:سيل تعال بكلمك
سيل ناظرها ومشى معاها: فيك شي؟
لتين توترت:ماكنت ابي اقولك بس احس لازم حلمت بالعنود
سيل مسح وجهه:وش فيها تتالم حزينه
لتين هزت راسها:قالت قولي لسيل ويوسف لا يسمون العنود وكان وجها تعبان الله يخليك لا تسمي العنود
سيل هز راسه:ابشري مراح نسمي وحضنها على جنب وراح لجهة العايلة وهو مشغول تفكيره
عند العنود طلعت مع غيث وهيام
غيث ركب سيارته ويستنى العنود عشان يوديها البيت
هيام وقفت مع العنود:لازم تعلمينهم انك عايشه
العنود هزت راسها برفض:ما اقدر افهميني
هيام تنهدت وفتحت الباب لها عشان تركب:كلميني اذا احتجتي شي العنود أبتسمت وحضنتها وركبت السيارة وحرك غيث لبيت هيام القديم والبعيد
غيث تنهد:شوفي مادري انا ليش ماتبين اهلك يدرون بس لو اختي لاسمح الله فيها الي فيك ودي ادري عشان اقدر أساعدها نفسيا ومعنويا لو تشوفين نفسك كيف اشرق وجهك يوم شفتيهم ماكان سكتي العنود انتي حسبت اختي الصغيره وما اتمنى لك الا كل خير وانك تقومين من هذا الخبيث بخير وسلامه
العنود:مراح اقوم بخير وسلامه غيث كلنا عارفين وش النهاية البدايه راح ابدا كيماوي ويخف الورم واسوي عمليه يستأصلونه بس وش قال الدكتور طلع عندي سرطان الدم وجرعات الكيماوي بتزيد ان شاء الله كم شهر ويبدا العلاج يعطي نتيجة واليوم معد صار يعطي نتيجة غيث نهايتي انا وانت واي احد تساله بيقولك اجابه وحده
غيث:محد يعرف الاجابه العنود محد يعرف الا رب العالمين لا انا ولا انتي نقدر نحدد متى يومنا
العنود سكتت وتنهد غيث يغير الموضوع:تبين ماتشا حقتك؟؟
العنود هز راسها:لا احس مالي نفس
غيث حس انها زعلت منه:العنود مراح اعتذر على شي مو غلط واذا زعلك كلامي يعني صح وانتي ماتبين تصدقينه
العنود ابتسمت بتعب:غيث مازعلت منك بس والله مالي نفس احس اني تعبانه ابي انام بس
غيث هز راسه ووقف عند بيت هيام ونزلت العنود وناظرته:شكرا على كل شي
غيث ابتسم:لا تشكريني انتي اختي واذا بغيتي شي كلميني وكلي شي قبل ما تنامين
العنود هزت راسها ودخلت البيت وفصخت عبايتها وجلست على الكنب تتذكر اهلها الي ما غابو عن بالها ولا لحظة ووقفت يوم طق الباب وراحت تفتح:غيث اذا بغيت وسكتت لحظة دخول سهيل وسيل وصدت بسرعة ماتبيهم يشوفونها
سيل انعقد لسانه ماكان يقدر يقول كلمتين على بعض وسهيل موب احسن منه بعد
العنود تنهدت:ادخلو واشرت على الكتب
سهيل وسيل عيونهم عليها مع انها مغطية وجهها بس عرفوها من صوتها وراحو يجلسون
سيل شافها بتسكر الباب:يوسف محب
العنود غمضت ورجعت تفتح الباب لدخول يوسف ومحب:فيه بعد ولا اسكر الباب
محب ناظر بصدمة يوسف انه صوت العنود
يوسف خانته رجلينه بصدمه وشده محب وكانت بتقرب العنود وصدها ورجعت
العنود اشرت على الكنب:حطه على الكنب
محب شده وجلسه على الكنب وهو واقف تكتف وهي راحت تجلس بتعب لانه يومها شكله طويل
مر الوقت وهم ساكتين يناظرونها وكل ماوقفت يسالونها وين رايحه
العنود شالت الطرحة عن وجها عشانها بدت تنكتم
يوسف وسيل صدو لانه وجها شاحب بدون حواجب ولا رموش شفايفها جافه كانها وحده ثانيه
يوسف:سويتي كل هذا عشان ما نعرفك؟؟
العنود تنهدت بدون رد
محب مسح وجهه:المرحلة كم؟
العنود:الرابعه
سيل ناظر محب:مرحله وش؟
محب جلس:سرطان
يوسف غطى وجهه:لا لا لا
العنود وقفت بس تذكرت صده لها:يوسف يوسف اهدا وسكتت لما حست بيدينه ورا ظهرها و شادها له
وببكي يوسف:انا اسف انا اسف قلت انه انتي و ماتاكدت زين
العنود شدته:يوسف الله يخليك اهدى مافيني حيل والله
محب ربت على ظهر يوسف عشان يهديه
يوسف تركها وجلس جنبها:علمينا كل شي ليش صدمتي بسيارتك
العنود هزت راسها بنفي:ماصدمت فيها هي اختفت مدري من اخذها رحت لسعود اعطيه الملف ومدري وين اختفت وكنت بجيكم وسالت عن سعود بس قالي الضابط انه زوجة ولد عمه توفت وصحيت بالمستشفى مع الضابط غيث وهيام -ناظرت اخوانها وسيل وسهيل-وسعود
سيل زفر بعصبية:الخسيس
العنود ناظرته:انا قلت له لا يعلمكم لانه اكتشفت انه ايامي معدوده غير ورم الدماغ عندي لوكيميا بمراحله الاخيره واليوم قالي الدكتور معد يعطي العلاج نتيجة يعني كلها كم يوم بالكثير كم اسبوع
سهيل طاحت دمعته وناظر محب:انا اسف وقام حضن العنود بكل ما اوتي من قوه وصار يستنشقها بالم الفقدان
العنود ربتت على ضهره بخفيف وهمست:انا للحين موجوده سهيل للحين
سهيل:انا اسف والله اسف ماكنت ابيك تطلعين من القصر
العنود بهمس:عارفه والله
سهيل خفف حضنه وبعد تدريجيا
العنود جلست بتعب وناظرتهم:لتين علمتكم؟
يوسف عقد حواجبه:لتين تعرف؟؟؟؟
العنود هزت راسها بنفي:لا لا
محب مسح وجهه:اكيد تدري
يوسف اخذ جواله والعنود مسكت يده:يوسف ماتدري
يوسف ابتسم:طيب بدق عليها اطمن بس لاتخافين ودق على لتين
لتين ردت:هلا يوسف
يوسف:لتين ابوي دقو علي المستشفى فيك شي؟
لتين عقدت حواجبها:لا حبيبي انا بالبيت سالت ليش دقو عليك؟
يوسف:امم يقولون عشان فحوصات الدم وجرعات كيماوي مافهمت عليهم بس شكلهم غلطانين
لتين فزت:يوسف امي تدق علي شوي وارجع اكلمك وقفلت مر ١٠ دقايق ودق جوال العنود
العنود تنهدت وردت:الو مين؟
لتين بخوف:العنود انا لتين اخذ رقمك من هيام المستشفى دقو على يوسف عشان فحوصاتك والجرعات حقتك يوسف بيعرف اذا مارحتي للمستشفى لانه شكله بيروح
يوسف اخذ الجوال من يد العنود:لتين موب كانت امك تدق عليك؟؟ وناظر الجوال الا انها قفلت وضحك بخفيف
العنود ابتسمت:والله اليوم هي عرفت دخلت على الحمام وانا فيه ولا ماكنت ابيها تعرف ولا احد كنت ابيه يعرف
محب ابتسم لابتسامتها:وش بتسوين الحين؟
العنود رفعت اكتافها:ولا شي ولفت على دقت باب مميزه وابتسمت سعود
سهيل وقف ومسكت يده العنود:بيخاف اجلس انا افتح له ولفت على الدقه الثانيه الي اختلفت عن الاولى بكثير
العنود وقفت وراحت تفتح:هلا سعود
سعود مسح وجهه بخوف:العنود الله يهديك ليش مافتحتي من اول
العنود فتحت الباب اكثر :ادخل
سعود هز راسه:لا بس جيت اطمن بعد المستشفى الحمدلله صرتي زينه ومد لها الادويه وهذي الدكتور وصفها بس قال انك اختفيتي ودق علي واخذتها وجيت
سهيل بعصبية :الله عليك ياحنون
سعود ماستوعب الصوت ودخل:سلام وسكت يوم شافهم واقفين ومتكتفين وناظر العنود يعني ما تلمحين
العنود ضحكت وهزت راسها بنفي
سعود حك حاجبه:السلام عليكم
يوسف ابتسم:وعليكم السلام والرحمه ومد يده يصافح سعود وتقدم سعود و ماحس الا انه يرجع من ضربت راس يوسف بخشمه ومسك خشمه متالم
العنود فزت:يوسف واخذت منديل تعطيه سعود اصبر اجيب لك ثلج
سعود هز راسه بنفي:لا لا مافيه شي بغسله ويخف
العنود اشرت له على الحمام وهو ابتسم لها ودخل وناظرت يوسف:ليش سويت كذا يوسف عورته
سهيل:يسلم راسك كان عطيته كم وحده بعد
العنود تنهدت بتعب:اجلسو اجلسو
محب تقدم لها:العنود تعبانه فيك شي؟؟
العنود هزت راسها:لا مانب تعبانه
سعود طلع من الحمام:مانمتي صح؟
العنود:ماكان عندي وقت دخلت البيت من هنا هم جو من هنا وناظرتهم الا صح انتو وش عرفكم اني هنا؟؟
سيل:توق قالت للتين انها شافت وحده تشبهك وسهيل سمعها ولحق لتين للحمام وهي تطلع وانتي طلعتي وراها وهي جت قالت لي انها حلمت فيك وجيت بطلع من المستشفى باخذ هواء وشفت سهيل يلحق احد خفت انه فيه شي ولحقته ويوسف ومحب لحقوني
العنود:اههااا ظلمت لتين
سعود عقد حواجبه:لتين تدري؟؟
العنود هزت راسها:ايه شفتها بالمستشفى اليوم ودق منبها عن اذنكم باخذ ادويتي واجيكم ودخلت الغرفه حقتها
جلسو كلهم سيل:وش بيصير الحين؟
سهيل رفع ظهره:بترجع معانا اكيد
سعود تنهد:ماتوقع لانها قالت ماتبي تموت مرتين
محب ناظر يوسف:وش قولك؟؟
يوسف رفع اكتافه:ماعندي شي بس انتم شفتو وش صار بالعزاء خالتي حصه الله يحفظها جتها جلطة والبنات كانت حالتهم حالة وباليالله رجعو نفس قبل وخالتي نوره الله اعلم وش بيصير لها لو انعاد العزاء ثاني مره
سيل ناظره:يعني قولك ما نعلم احد؟؟
يوسف هز راسه:هذا الي تبيه وهذا الي بيصير
سيل ناظر سعود:اذا العنود هنا الي بسياره مين؟
سعود:مراهق شاف السيارة شغاله واخذها وشكله مايعرف يسوق والله يرحمه
يوسف تنهد:لاحول ولاقوة الابالله علمتو اهله طيب؟؟
سعود هز راسه:ايه بعد فتره من الدفن عرفنا من اخوه وعلمناه و دليته على القبر
العنود طلعت من الغرفه وهي مغيره ملابسها وحاطه على راسها شال:ما اكلتو صح بسوي نودلز تبون؟؟
محب وقف:بساعدك
العنود هزت راسها:خلك انت اذا دخلت معاي مراح اخلص الا بكره من كثر اسالتك وضحكة وناظرت سهيل وصدت ودخلت المطبخ
سهيل دخل وراها:ناديتيني؟؟
العنود ابتسمت:يمكن
سهيل تقدم لها بخفيف:ليش قلتي لسعود وماقلتي لي؟؟
العنود لفت عليه وحطت يدها على شعره ودقنه:عشان ذول اكلهم الشيب وانا لسى مامت
سهيل اخذ يدها وباسها:بسم الله عليك يومي وسكرت فمه وهزت راسها بنفي وبعد يدها عن فمه طيب نسافر نسال دكاتره ثانين يمكن عندهم علاج
العنود شدت على يده:من طلعت من بيتك المره الاولى وانا كلمت يمكن ١٠٠ دكتور من هنا ومن برا وكلهم قالو لي نفس الكلام الورم يخف مع الكيماوي و بيشيلونه بعمليه وهو خف الحمدالله بس مايقدرون يشيلونه الحين لانه عندي لوكيميا والحمدلله اللهم لا اعتراض سهيل خلنا نعيش كل يوم بيومه و مانفكر بالمستقبل خلنا نعيش الحاضر بس
سهيل حط يده على خدها وباس راسها:ابشري
مر شهر على معرفة يوسف ومحب وسيل وسهيل ولتين وصارو يتناوبون كل يوم احد يمر عليها الا سهيل صار ساكن معاها وهذا الشي ريح يوسف ومحب انها معد صارت لحالها
العنود بالغرفة تلبس بجامتها وحطت الشال على راسها:سهيل
سهيل فز:عيونه وش فيك؟؟
العنود ابتسمت:نشوف فيلم ولا ننام؟
سهيل اتسعت ابتسامته:نسوي شي ثاني ماينفع؟؟
العنود ضربته:قليل ادب
سهيل ضحك:خلينا ننوم احس اني تعبان شوي
العنود تثاوبت:حتى انا احس
سهيل وقف عندها و وخر الشال عن راسها:لا تلبسينه اذا يضايقك ويجيب لك الحر
العنود اخذت الشال من يده:بس
سهيل هز راسه :شوفيني قد شفتيني اغطي قرعتي خليها تتحرر بس
العنود ضحكة وهو باس راسها و انسدحو على السرير
سهيل حضنها:عشان ما تبردين
العنود شدته وهمست:احبك
سهيل سمعها:وانا اعشقك
العنود ضحكة بحياء لانه اول مره تقولها ونامت بتعب
سهيل جافاه النوم بعد كلمتها وجلس حاضنها طول الوقت
توفت العنود بعد معاناتها من المرض بتاريخ ٥/٣١ م بحضن سهيل بعد ماقالت له الكلمه الي يحلم فيها سنين  وهي مخبيتها من سنين.
سهيل تغير للأفضل لانه جته فرصة انه يودعها واخذ مكانها بشركة الملهم مع ماجد وكل نجاح ينسبه للعنود لانها غيرته.
محب تزوج دكتوره معاه بالمستشفى كانت واقفه معاه بجميع حالاته وحبها وتزوجها وجاب ولد منها.
يوسف ولتين جابو بنتين زي القمر ويوسف مايقدر يستغني عنهم الثلاثه وكل مره حبه للتين يزيد وجالس يحاول يطلع الجد ساهر من السجن او يخفف الغرامة.
اسيا دخلوها مصح بعد ماحاولت تنتحر من قلة الاهتمام من امها وابوها ويوم دخل جدها الوحيد الي كان يهتم فيها السجن محد كان حولها.
اشجان ولين كملو دراستهم و توظفو وجالسين يشوفون حياتهم من سفر من مطاعم وكل شي كانو يحلمون يسونه وهم صغار الحين يسونه.
سيل و ودق كانت بدايتهم صعبه بس تخطوها بحبهم واهتمامهم لبعض وسيل ماقال لها عن العنود عشان ماكان يبيها تتالم مره ثانية وجابو بنت وحده وجالسين يفكرون بثاني.
ماجد علم العايلة انه ادم ولده وام ماجد وام سعود رجعت الحياة لهم بعد ما صارو يهتمون بادم لانه يذكرهم بالعنود وشركته صارت تطلع الاولى بعد ما صار شريك مع سهيل.
خالد سوا البيت الي كانت تحلم فيه العنود وهي صغيرة و انشهر على انه افضل تصميم وافضل مهندس وسمى التصميم الظبا وصار يسافر للخارج لانه صار يطلبونه الاغنياء يصمم لهم بيوتهم او يعيد تصميم بيوتهم.
و اخيرًا ليس اخرًا سعود صار يطلع اسمه بالجريدة وعلى السوشل ميديا انه افضل محقق وانهم فخورين انه فيه شخص مثله معاهم وصار يزور اسيا كل اسبوع وبدت تتحسن حالتها بعد كل زياره منه وهو بدا يميل لها.

اللَّهُمُّ لَكَ الْحَمْدَ حَتَّى تَرْضَى، وَلَكَ الْحَمْدَ إِذَا رَضِيَتْ، وَلَكَ الْحَمْدَ بَعْدَ الرِّضَا، وَلَكَ الْحَمْدَ عَلَى كُلِّ حَالٍ، وَفِي كُلِّ حِينَ، اللَّهُمَّ لَكَ الْحَمْدَ حَمْدًا كثيرًا طَيِّبًا مُبَارَكًا فِيهِ.
انتهيت اليوم من روايتي الثانية بتاريخ ٢٠٢٤/٦/١٤ م عشت معاكم اجمل ايام حياتي وانا ارد على تعليقاتكم او اشوف تفاعلكم مع البارتات وعشت اتعس لحظات حياتي من ضغط الاختبارات وفقدان الشغف وكتابة البارتات بمده قصيره جدا بس كنتم الشي السعيد والحلو بهذي الفترة دعواتكم لي وتفهمكم مع اني كنت اسحب مره كثير بتنزيل البارتات بس كنتم متفهمين و واعين شكرا لكم جميعا على كل شي واتمنى تضموني معاكم بدعواتكم مع كل صلاة واني ادخل الجامعة هذي السنة احبكم واتمنى لكم دوام الصحه والعافيه والقاكم عن قريب🤎🤎