مايروس النجوم الا سهيل ولا يقود الظبا غير العنود

البارت الثلاثين🤍

~ فلة سهيل ~
سهيل بعصبية:انا محترم نفسي بس انتم الي لا حياء ولا مستحى داقه عليك بنص الليل من بد العالم كلهم كانت ماتحرك اصبع لين تدق على محب ولا يوسف ليش دقت عليك ودف ماجد علمني تكلم ولا من سواد وجيهكم
ماجد دفه على ورا وبعصبيه اكبر وصراخ:عشانه ولدي واشر على ادم هذا ولدي ادم ماجد ال صالح
سهيل بصدمه:من امه؟؟؟
من ورا ماجد:انا
ماجد غمض:العنود
العنود وقفت جنب ماجد
سهيل ناظرها:يعني!!
العنود قاطعته:انا امه وابوه وكل ناسه خلني اخذ ولدي وامشي
ماجد مسك معصمها من فوق العبايه:العنود
العنود ناظرته:استنيتك تجيبه وطولت قلت اجيبه بنفسي مدامه يبيني ادخل
سهيل ناظر يدينهم:متى تزوجتو؟
ماجد ترك يد العنود بسرعه:ما وقاطعته العنود مالك دخل خلنا ناخذ ولدنا ونمشي
سهيل عصب ورمى الفازه وكسرت:ماعندك ولد انتي ماعندك
ادم فز وصار يبكي وتقدمت العنود ووقف قدامها سهيل
العنود تاشر على ادم بضعف:خلني اشيله خوفته بيتعب
سهيل ساكت
ماجد تقدم بعصبية:سهيل بعد
العنود بضعف:سهيل الله يخليك
سهيل بعد وركضت لادم تشيله وهدا بحضنها ورجع نام وحطته على الكنب وحاوطته بالمخدات عشان مايطيح
ماجد مسح وجهه وناظر العنود:خلينا نمشي
سهيل هز راسه بنفي وضحك بسخرية:لا ياطيب منتب ماشي من هنا لين تقولي وش ذي المسخره الولد عمره بحدود السنه يعني مستحيل يكون ولدكم
ماجد تنهد وناظر العنود الي رفعت اكتافها كانه تقول هذا موضوعك مالي دخل وجلس وجلست العنود جنبه بس بعيد شوي وجلس سهيل يناظرهم ومو بالعهم
ماجد:كنت متزوج مسيار وحملت بالغلط وولدت وتركته لي ماعرفت وش اسوي والعنود ساعدتني وسجلت اسمها باوراقه على انها امه بعد ماقالت لاخوانها اكيد ووافقو وتركته عندهم احول لها فلوس تجيب اغراضه الناقصه ولا اذا احتاج مستشفى اروح معاها عشاني الاب هذي السالفة ولا احنا متزوجين ولا شي
سهيل رافع حاجبه:يعني هي اخذك الشركة عشانها تربي ولدك؟؟؟
ماجد كان بيتكلم وردت العنود:لا عشان اربي جدك
ماجد غمض عينه بتعب من الي بيصير بعد كلمه العنود
سهيل عصب:احترمي نفسك وتكلمي زين مو سكت لك قمتي تتمادين
العنود:والله انا كيفي اتمادى بطريقه الي تعجبني مو عاجبك مشكلتك
ماجد تنهد وناظرها عشان تخف شوي:العنود
العنود هزت راسها ووقفت وراحت لادم وشالته:بروح البيت احسن لي اشوفك بشركة ومشت تطلع من الفله
ماجد وقف بعد:قلت لك لا توقف مع عدونا العنود مو عدوتنا
سهيل آبتسم:خلك مخدوع فيها ترا باقرب فرصه تترك
ماجد هز راسه وابتسم لانه عرف انه مافيه فايده من نصح سهيل:بس بقولك جدي سارق عمي عبدالله ومو العنود عدوتنا وطلع من الفله
سهيل بحاله صدمه وش الكلام الي قاله ماجد وليش العنود تغيرت كذا وقام يدور بالملفات القديمة عن حقيقه الموضوع
~ سيارة العنود ~
دق عليها ماجد وردت بعصبية:قلت لك تطلعه ليش تقعد سنه
ماجد تنهد:شفتيه ماكان راضي يطلعه
العنود:ماجد شف حل مع اهلك سكت كثير بس يوصل انه ياخذ ولدي مراح اشوف قدامي
ماجد يهديها:خلاص انتهى الموضوع لاتفكرين فيه ادم ومعاك ليش تشغلين بالك والي بيتعرض لكم بيلاقيني قدامه
العنود هزت راسها يوم وقفت عند باب البيت:طيب انا وصلت وبنزل البيت مع السلامه
ماجد ارتاح:مع السلامة وقفل
العنود دخلت البيت وكان يوسف جالس بصالة وحط يده على راسه وراحت له:يوسف؟!
يوسف رفع راسه وعقد حواجبه:انتي ماكنتي نايمة؟؟
العنود هزت راسها:رحت الصيدلية خلص حليب ادم ورحت اجيب
يوسف ابتسم:كان قلتي لي اجيب ولا تطلعين بليل
العنود ابتسمت وجلست جنبه:عادي خفت انه يصحى بليل يكون جوعان
يوسف حط يده على شعر العنود:زين روحي ارتاحي اكيد تعبانه ياروحي
العنود وقفت:تبي شي؟؟
يوسف هز راسه ببتسامة:لا حبيبتي
العنود شايلة ادم وراحت غرفتها وحطته على سريره وراحت تغير بعد التعب الي عاشته بس ليوم واحد من شافت ال نافل
~ الصباح ~
لتين نزلت ولقت يوسف نايم بصالة وراحت تصحيه:يوسف قوم بيقوم محب بعد شوي
يوسف هز راسه وجلس ومسح وجهه:صباح الخير
لتين مشت بدون رد للمطبخ تعلم العاملة وش تسوي فطور
العنود نزلت وراحت للمطبخ وبأبتسامه:صباح الخير ياحلوه
لتين ابتسمت لها:صباح النور والسرور ماشفتك امس و ماباركت لك بس باركت لماجد
العنود وطت صوتها:الله يبارك فيك يا قلبي اذا لقيتي نفسك فاضية اليوم برسلك اللوكيشن وتعالي تنورينا
لتين وطت صوتها نفسها:ان شاء الله ارسليلي اياه ماعندك جامعه اليوم؟
العنود هزت راسها:الا بروح الجامعه بعدها المكتب عندي محاضره وحده اليوم اشوا
لتين مسحت على كتف العنود بحنيه:الله يوفقك ياعيوني
العنود ابتسمت:امين وياك ولفت على دخول محب
محب:صباح الخير
:صباح النور
العنود ناظرته بزعل:الحين انت داق علي تدور حليب ادومي ليش ماقلت لي خلص عشان اجيب له معاي؟؟؟
محب حك حاجبه بوهقه:هو ما خلص انا كبيته طاح من يدي وانكب ورميته
لتين:ايه اشوا لاني توني شريت له وقلت شكلي نسيته
محب هز راسه:لا مانسيتيه بس زلق من يدي بعد ماسويت له الحليب اشوا
لتين ابتسمت:عادي فداك
محب ابتسم لها ولف على دخلت يوسف
يوسف يناظر لتين:صباح الخير كلهم ردو الا لتين الي لفت تاخذ الصحون توزعها على الطاولة ومتجاهلته
محب والعنود استغربو وناظر محب العنود بوش صاير معاهم ورفعت اكتافها بمدري
وراحو يجلسون على الطاولة
العنود ناظرتهم:صح بتاخر اليوم عندي محاضرات كثيره وعندي اختبار بدرس مع وحده من البنات
يوسف هز راسه:زين
محب ناظرها:من وحده من البنات مالها اسم؟؟
العنود عارفه انه محب بيحقق معاها:الا لها بس ماتعرفها لو قلت لك معاي بشعبة بنت شاطره ما شاءالله عليها وقلت لها ندرس مع بعض
محب هز راسه:طيب زين مدامها شاطره
العنود ابتسمت
يوسف ناظر لتين:بطلع اليوم بدري تبين نروح نتغداء بمكان؟
لتين هزت راسها بنفي:لا وعدت وحده من البنات نروح السوق
يوسف:من هي؟؟
لتين تاكل:ماتعرفها
يوسف ترك الملعقة ووقف:لتين تعالي ابيك
لتين:طيب اذا خلصت اكل جيتك
محب وقف:بالعافيه عليكم بروح انا عندي مراجعين مع السلامة
العنود وقفت معاه:وانا بودي ادم الحضانة ومشت لغرفتها تاخذ ادم الي نايم بعد مالبسته وطلعت من البيت
يوسف جلس:عاجبك شكلنا كذا قدام اخواني؟؟؟
لتين رفعت اكتافها:والله هذي معاملتك لي وانا بعاملك بالمثل مو عاجبك طلق
يوسف رص على اسنانه:انتهينا من ذا الموضوع طلاق مافيه
لتين ناظرته ببرود ورجعت تاكل:اوكي اوه صح طلعت مانع الحمل حطيته على الطاولة واخذت حبة اليوم عشان ماتعطيني اياها بسر عشان اريحك من الاحساس بذنب
يوسف ضرب الطاولة بقوى وطلع من البيت
لتين يوم تاكدت انه طلع ارتخت ملامحها وبكت ووقفت تروح الغرفة وقفلت الباب عليها وصارت تبكي بالم وقلبها موجوع
مر الوقت لين الظهر
دخلت العنود الشركة وراحت مكتبها وجلست وصارت تدور على الكرسي وتناظر السقف وهي مغمضه ودق الباب ودخلت نوال:استاذة العنود فيه احد يبيك ادخله؟
العنود هزت راسها بايه ولسى تدور على الكرسي
:انتي مراح تطلعين من حياتنا وش تبين كم تبين وتفكينا من شرك
العنود وقفت الكرسي وابتسمت:اسيا اشتقت لك حبيبتي
اسيا بعصبية:وانا ما اشتقت لك ولا بلعتك يوم بدينا نعيش ونفتك منك رجعتي ليش ليش
العنود رجعت تدور وبأبتسامه :تعرفين انه كنت ادري عنكم بس كنت ساكتة لين ما تفضحين نفسك امم طول السنتين الي دريت فيها انك عشيقة زوجي وانا احاول اخلي احد يشوفك بالمنظر البشع الي شافتك فيه اشجان بس كل مره كنتي تخافين وترجعين لين ما انا خليتك تتجراين وتروحين غرفتي برجولك ووقفت الكرسي ووقفت هي على طول و تكتفت عشان يكون لي سبب انفصل عنكم مايمديني اقول والله طفشت من العيشه معاكم لا لازم سبب يخليكم تستحون ترفعون روسكم قدامي وقدام الناس لانه ورفعت كفها فضيحة بنتكم ورفعت كفها الثاني وفضيحة ولدكم وصفقت بكفينها ببعض تكون فضيحة اكبر لو درو الناس حفيد ساهر ال نافل يخون زوجته مع بنت عمه وضحكت وش رايك بتفكيري
اسيا هزت راسها بصدمه:انتي مريضه لازم تتعالجين انتي واخوك مرضى
العنود رفعت اصبعها تاشر بلا:تو تو تو لا حبيبتي انا مو مريضة انا باخذ حق ابوي الي سلبه منه جدك ونفس ماتعرفين لكل حرب ضحايا
اسيا بتطلع بعد ما لقت شي تقوله ووقفها صوت العنود:اذا طلع الكلام برا المكتب صورك انتي وحبيب القلب مراح تكون مستوره للابد عاد دمعتين مني راح يورونك العجب
اسيا فتحت الباب تطلع وسمعت صوت العنود المنتصر: باي حبيبتي
العنود جلست على كرسيها ورجعت تدور بروقان وتدندن
ماجد دخل ببتسامه:مروقة اليوم جعله دايم
العنود هزت راسها:كثير الحمدلله
ماجد اشر على الباب:تو شفت اسيا ولا يتهيأ لي
العنود:ايه توها عندي موب صاحيه تقولي كم تبين وتطلعين من حياتنا من زين حياتكم عشان ادخل فيها انا بعطيكم فلوس بس تتركوني بحالي
ماجد انسدح على الكنب وضحك :ضحكتني والله
العنود رجعت تدندن وماجد منسدح وغمض عيونه
نوال دخلت بخوف:استاذه العنود استاذ ماجد سيد ساهر جاي ومعاه ناس كثير
ماجد تنهد والعنود ابتسمت:دخليهم غرفة الاجتماعات نوال
نوال هزت راسها وطلعت ماجد وقف يعدل ثوبه وشماغه والعنود وقفت وعدلت طرحتها واشرت:تفضل استاذ ماجد
ماجد ابتسم: تفضلي استاذه العنود وضحكو وطلعو لغرفة الاجتماعات وتحولت وجهيهم للجديه وفتحو الباب ودخلو
كان الجد ساهر مبتسم على جنب لانه خطته تمشي تمام
العنود وماجد جلسو على راس الطاولة
العنود وماجد :السلام عليكم
:وعليكم السلام
العنود ابتسمت:شرفتونا وجلست هي وماجد
رجال 1:معاك ابو محمد صاحب شركة.....
العنود وماجد هزو راسهم ببتسامه:تشرفنا
ابو محمد:جينا اليوم عشان العرض
ماجد ناظر العنود الي ملامحها للحين مبتسمه وعادي عندها الوضع
العنود:ايه سمعت عنه بس مو عندي العرض
رجال الاعمال صارو يتلفتون انه وش فيه والجد ساهر ابتسم اكثر
العنود اشرت على ساهر:العرض بشركة سيد ساهر رسلته له على انه الاجتماع عنده وناظرته بستغراب ماوصلك؟؟؟
الأنظار تحولت لساهر الي رفع جواله ورد
:سيد ساهر قاعد الاجتماعات مليانه عشان العرض ومالقيت لا استاذ سهيل ولا استاذ سيل وش اسوي؟؟
العنود وقفت:مو مهم انا عندي نسخة من العرض وشغلتها وصارت تشرح
ساهر كان على اعصابه لانه قروب رجال الاعمال بدا يشتكي من تصرفه انه يقول عنده عرض بيعوضهم عن خسارة المسابقة ومايجي هذا غير مسوؤل والي كان يقول كيف فاز طول هذي السنين
العنود ناظرته:سيد ساهر عندك شي مهم يمديك تتفضل
ساهر طفى جواله وهز راسه:لا كملي كملي
العنود رجعت تشرح وكان رجال الاعمال منبهرين بالأفكار وتطور الي بيصير بسوق العمل اذا انتشرت هذي الفكرة
العنود خلصت:احنا مهتمين انه يكون عندنا ارض مستويه عشان نوقف عليها وحابين انه تكونون هذي الارض بس مشكلتنا مافيه الا عدد محدود بهذا العرض
ماجد ابتسم:الي حاب يكون معانا راح نسعد كثير وان شاءالله نكون من الاوائل
ساهر:والي يبي يشتري العرض؟؟
ماجد:ماوصلنا لذي المرحلة وما اتوقع فيه انسان واعي بيشتري عرض ماتطبق ولا ياجدي؟؟
ساهر هز راسه ووقف:انا راح اتكلم مع المحامي ويشوف الوضع وارد عليكم
العنود تذكرت انه يوسف محامي ساهر وابتسمت:بلغ سلامي له
وخلت قاعه الاجتماعات من جميع رجال الاعمال وجلست العنود بتعب
ماجد راح لها:وشلون طلعتي العرض بذا السرعه؟؟
العنود:كان عرض ابوي عرضه لساهر بس قاله انه مو جيد بس شكله ماقراه اصلا
ماجد:محامي جدي؟
العنود هزت راسها وحطته على الطاولة:يوسف
ماجد تنهد:لازم تقولين له اجل
العنود رفعت راسها ببتسامه وماجد هز راسه برفض:لا مالي دخل انا اساعدك بس بشركة امورك الخاصه مالي دخل فيها
العنود كشرت:ياشينك
ماجد:قولي للتين تساعدك
العنود تذكرت لتين والي صار الصباح وتنهدت:شكلي ووقفت بروح البيت اجل
ماجد وقف معاها ودخلت نوال:سيد سهيل برا ادخله؟؟
العنود تاففت:يارب وش ذا الشغله وجلست ايه دخليه
سهيل دخل:السلام عليكم
ماجد والعنود:وعليكم السلام
سهيل جلس وناظرهم:ابي الحقيقة
ماجد ناظر العنود الي تناظر ببرود
العنود:ماعندنا لك حقيقة
سهيل رمى ملف على الطاولة:هذا ملف فيه اختصار شغل جدي القديم والجديد بس مالقيت شي من الي بتقولينه
العنود وقفت:اجل مايحتاج اقوله ومشت
سهيل سند ظهره: بس ابي اسمع منك
العنود وقفت:مراح تصدقني
سهيل ناظرها:جربيني
العنود ابتسمت على جنب ورجعت تجلس:

تفاعلو💗💗