مايروس النجوم الا سهيل ولا يقود الظبا غير العنود

البارت الثاني وثلاثين

~ فله عبدالله,غرفة العنود ~
دخلت تغير ودق جوالها وابتسمت وردت بدون ماتشوف:خالد ما امدا محب يطلع وعلمك
خالد ضحك:اول ماطلع دق علي حتى كنت اسمع تسكيرت باب السيارة
العنود ضحكة معاه:ياربيه من محب
خالد تكلم بجدية:العنود
العنود اخذت الجوال وجلست على السرير :هلا
خالد:اعرف انك تسوين كل هذا عشان حق ابوك بس انتي متاكده تبين ترجعين لهم؟؟
العنود تنهدت:خالد انت تعرفني ما احب اخلي شغلي ناقص واذا رفضته الحين ما ادري متى بتجينا فرصة ثانية انا ابي اجيب حق ابوي واقفل على موضوعهم وادري انت ومحب ويوسف ماتبوني ارجع بس هذا حق ابوي الي سرقه ساهر
خالد:تمام مدامك متاكدة انا معاك لو بغيتي شي مايردك الا لسانك تذكري
العنود ابتسمت:ابشر اذا بغيت شي علمتك
خالد:بروح ارتاح قومني محب
العنود ودعته وقفلت انسدحت على السرير تنام
~ عند سهيل ~
طلع من القصر وهو حاس انه مخنوق لانه ما اكتشف جده من اول انه بهاذا الخبث
وطلب من السواق يوديه فلته وقاله يجي الصباح ويوديه شركة ملهم عشان سيارته هناك ورفع جواله يكلم:سعود تعال فلتي لو سمحت
سعود وقف:يلا جايك وقفل وطلع من مكتبه لفلة سهيل
سهيل وصل ودخل يستنى سعود مامرت ربع ساعه الا فتح الباب ودخل سعود
سعود:وش فيك؟؟
سهيل رفع راسه له:جدي
سعود بخوف:وش فيه العصر ماكان فيه شي
سهيل هز راسه:مافيه شي بس تعرف وش سوى بعمي عبدالله
سعود تنهد وجلس
سهيل طالعه بصدمه:تدري؟؟
سعود هز راسه:ايه وهو يدري اني ادري بالي سواه
سهيل:ليش ماعلمتني؟؟
سعود رفع حاجبه:سهيل انت تقدس جدي وشلون تبيني اقول لك انه حرامي عشان كذا ما علمناك
سهيل ضحك على غبائه:حتى انت مع العنود وماجد
سعود هز راسه:انا ما علمتك لاني بحطك بين نارين قلبك وعقلك
سهيل سند ظهره ورفع راسه يناظر السقف:اخترت قلبي
سعود ابتسم:اخترت العنود
سهيل على نفس وضعه:بس هي اختارت خالد
سعود:علمها طيب قبل ماتروح منك
سهيل تنهد:هي تحسب انه جدي الي زوجني اياها عشان ياخذ الربع من ورث عمي عبدالله وشلون تبيني اقول لها اني ترجيته يزوجني اياها بعد رفضه اصلا وشلون بتصدقني انا ختنها مع اسيا
سعود:انت ما خنتها سهيل كنت تحسب انه هذي الطريقة الوحيدة الي تخليك توفي بالوعد الي قطعته لجدي
سهيل ومسح وجهه:اخخ من الوعد الي حرمني منها
سعود وقف وربت على كتفه:بتهون ياخوي بتهون انا بمشي عندي شغل
سهيل ابتسم له ووقف:تعال معاي الظهر بروح املك عليها ثاني مره
سعود ضحك:انت بتجلس تلعب معاها لعبة الزوج وزوجة كل شوي عشانها ماختارتك وهي صغيرة؟؟
سهيل هز راسه بضحك:ايه ترا بستناك بنمشي الظهر
سعود:وش بتملك على مؤذن انت يوم انك بتروح الظهر
سهيل ضحك:رح رح بس و بستناك الظهر ياسخيف
سعود ضحك وطلع يرجع لشغله
سهيل راح لغرفة العنود الي بفلتة وانسدح على السرير حقها واخذ جواله واتصل عليها
العنود ردت وهي نايمة:خالد قلت لك اذا بغيت شي بكلمك والله
سهيل فز:ليش تعلمينه؟؟
العنود بدت تستوعب وبعدت جوالها تشوف الاسم ورجعته لاذنها:اووه ماشفت الاسم تبي شي داق هذا الوقت؟؟
سهيل:خالد ليش داق عليك الحين؟
العنود تبي تنام:عندي بكره مليون شي ممكن تقول ليش داق؟؟؟؟
سهيل غمض عيونه يهدي نفسه:الظهر بنجي نملك
العنود:اوك مع السلامة وقفلت
سهيل عصب ومسح وجهه:خالد خالد ورمى الابجوره الي جنبه بعصبية وتبعثرت بالارض واخذ شهيق وزفير عشان يهدأ
~ فلة عبدالله، الساعة ٩ صباحاً ~
العنود نزلت لصالة وشافت الكل موجود:صباح الخير جوعانه وش فيه اكل؟؟
لتين ابتسمت:صباح النور يوسف جاب من برا تلاقينه بالمطبخ
العنود ابتسمت ورسلت لها بوسه بالهواء ومشت ووقفت ولفت عليهم:صح ساهر وحفيده المصون بيجون الظهر بيملكون
لتين ناظرتها بصدمه:ان شاءالله الظهر حق بكره ولا الي بعده
يوسف رفع ظهره:ظهر وش
العنود:وش فيكم الظهر اليوم خلنا نخلص بدري
يوسف ناظر محب الي يشرب شاهي:محب اكيد انك نايم عشان كذا ماعلقت
محب ناظره:انت قلت انها كبرت ومعاد هي صغيرة صح ولا؟؟
يوسف تنهد وناظر لتين ورجع ناظر العنود:متاكده تبين هذا الشي؟؟
العنود ابتسمت وهزت راسها:متاكده لاتخاف علي اعرفهم واعرف كيف اتصرف معاهم
لتين وقفت:يوه عندي اشياء كثيره الحين ٩ معد فيه وقت
العنود راحت لها ومسكت اكتافها:مايحتاج تسوين شي بقول لتومي الحين تنظف المشب وبس شاهي وقهوة وسلام وعليكم السلام وخلصنا
لتين هزت راسها بنفي:لا الحين اكلم البنات ويجون يساعدوني ونحتفل شوي هذا عرس مو سلام وعليكم السلام
العنود تنهدت:لتين حبيبتي انتي مافيه عرس ولا من هذا الكلام هو قال بيساعدني لا اكثر ولا اقل والبنات اشوفهم هناك مايحتاج يجون ويتعبون
محب يناظر يوسف بهدوء
لتين بضيق:بس
العنود قاطعتها ببتسامه:لا بس ولا شي نفس ماطلعت من هنا برجع هنا لاتخافين بس اخذ حقنا وبرجع
لتين ناظرت يوسف عشان يقنعها بس يوسف رفع اكتافه بمالي دخل وتنهدت وجلست:طيب خلاص مراح نسوي شي
العنود ابتسمت:وش جايب يوسف جوعانه؟
يوسف ابتسم لها:ادخلي شوفي ياكسوله
العنود ضحكة وراحت المطبخ
محب رفع ظهره ووطى صوته:هذا صاحي وش الظهر
يوسف ضحك:مو تقول كبرت وش صار الحين؟
محب عصب:يوسف عندنا موضوع اهم ممكن تركز؟؟ماكنت ابي اقول شي قدامها عشان ماتسوي نفس هذيك المره
يوسف يناظر يد لتين وصار يلعب باصابعها:عشان كذا خلاص مدامها تبيه الظهر خلها
لتين ناظرته وهمست:صاير شي؟
يوسف ناظرها وابتسم:مافيه شي لاتحاتين
لتين تضايقت انه مايعلمها شي وسحبت يدها وتكتفت
يوسف تنهد
محب وقف:بروح اشوفها طولت بالمطبخ
العنود كانت تسوي ماتشا لها وسرحانه محب وقف وتسند على الباب وتكتف يستناها ترجع لارض الواقع
العنود بعد مده تنهدت وصبت الماتشا بالكوب ورفعت راسها وخافت:محب خوفتني
محب للحين متكتف:بسم الله عليك وش تفكرين فيه؟
العنود سحبت كرسي وجلست:بليلي
محب عقد حواجبه:وش فيها تبي ترجع؟؟
العنود تذكرت انه ماقالت لهم انها كانت تعطيها ادويه ماتحتاجها:لا بس اتصل عليها ماترد اخاف عيالها فيهم شي ولا تحتاج هي شي
محب ابتسم:اذا احتاجت شي اكيد بتكلمك يمكن مشغوله ولا اخذوها عايله ثانيه
العنود تفكر كيف تجيبها وتنهدت:يمكن
محب جلس قدامها ومسك يدها:العنود للمره الاخيره بسالك متاكدة من الي بتسوينه؟؟
العنود شدت على يده:محب متاكده مليون بالميه لاتخاف برجع وعد
محب ابتسم:تمام مدامك وعدتيني
العنود ابتسمت ووقفت:بروح اشوف اغراضي واجهزها ومرت من جنب محب ومسحت على كتفه وطلعت من المطبخ
~ غرفة يوسف ولتين ~
لتين دخلت ترتب اغراضها وهي متضايقة من يوسف
يوسف دخل الغرفة:لتين
لتين ناظرته بدون رد
يوسف راح لها ومسك يدها وجلسها على السرير:وش فيك؟
لتين رفعت اكتافها:مافيني شي انت الي وش فيك على سهيل؟
يوسف:مافيني شي عليه بس هو من الناس الي ما اتقبلهم وش اسوي اذا مابيه مع اختي؟
لتين مسحت على خده:يوسف سهيل زوج العنود سابقاً والحين اذا انت ومحب ماتقبلتوه بتحطون العنود بين نارين اخوانها ولا زوجها يمكن الحين هي عاميها الانتقام بس اذا اخذت حقكم من جدي كيف بتكون مشاعرها بعد ماتشوف سهيل انه ساعدها وانه كان واقف معاها ولا تنسى هي عاشت معاه ثلاث سنين مو قليله يمكن تتجدد المشاعر
يوسف مسح وجهه يوم حس انه كلام لتين صح وتنهد:هذا الكلام الي كنت مابي اسمعه كنت ابي اسمع انها بترجع لنا بس تخلص من الموضوع ترجع مابي افكر انها بتجلس بهذاك القصر ثاني مره
لتين شدت على يده:لازم تسمعه عشان ماتنصدم بعدين
يوسف وقف وحب راسها:بس يخلصون مسرحيتهم حقت الظهر خلينا نطلع نغير جو ونروح الفندق يوم يومين كذا ونرجع
لتين أبتسمت:ان شاء الله
~ الظهر فلة عبدالله ~
دخل الجد ساهر المشب بعد ما رحبو فيه يوسف ومحب وابتسم لهم بتكبر:الله يبقيكم وشلونكم انتم عساكم بخير طلعت العنود من عندنا وانقطعت اخباركم وناظر محب والله اني شرهان عليك يا محب اجل كذا تقطع مره يوسف نشوفه اذا نزل لتين بس انت مره معد شفناك
محب موب طايقه بس يحاول عشان مايخرب الخطه:الحمدلله بخير والله مشغول مناوبات ودورات معد صار عندي وقت احك فيه راسي الله يعين بس
الجد ساهر هز راسي:الله يعين الله يعين وناظر سهيل وين المملك ياولد تاخر علينا
سهيل طلع جواله:بدق عليه
محب لقاها فرصة:يمكن مشغول نشوف واحد وسكت يوم دخل المملك مع سعود وزفر بعصبية خفيفه وقام يسلم مع يوسف
سهيل ابتسم براحه انه جاء سعود
سعود سلم على يوسف:بالمبارك معليش جيت على غفله بس سهيل قالي تعال
يوسف ابتسم:الله يبارك فيه لا وشوله الاعتذار البيت بيتك اي وقت تعال
سعود ابتسم وسلم على محب واختلف الجو عليه عن سلامه ليوسف:وشلونك
محب ابتسم له بتسليك:نحمده تفضل وترك يده وراح يجلس
يوسف هز راسه لمحب انه يهدا
سعود ناظر سهيل ببتسامه وجلس
بدت مراسم الملكه
~ غرفه العنود ~
دقت الباب لتين ودخلت:عادي ادخل؟؟
العنود ابتسمت:ايه حبيبتي تفضلي
لتين دخلت ومعاها فستان و ببتسامة رفعته:عادي؟؟
العنود ميلت راسها:لتين
لتين:ماسوينا حفله ولا سويت شي لك خليني اكشخك عن نفسي
العنود ابتسمت وجلست على التسريحة حقتها:كشخيني ولا تزعلين
لتين استانست وحطت الفستان على السرير وراحت تحط ميك اب للعنود وتسوي شعرها بعد تعليماتها الي مايكون شي كثير وتسريحة هادية خلصت وراحت تلبس العنود وطلعت لتين كانت تسمي عليها وتذكر الله كان فستان كحلي ماسك لين على الفخذ بعدين منفوخ مو طويل وجهه اطول من جهه و اكمام منفوخه وطايح الكتف وشعرها سوته ويفي ونزلت غرتها الخفيفه وميك اب ناعم خلى إطلالتها جميله وهاديه وفخمه بنفس الوقت
لتين ابتسمت ومسحت على شعرها:العنود لاتخلين حقكم يعمي عيونك
العنود كانت بتتكلم بس دق الباب ودخل يوسف:العنود جاك رابط ادخلي وحطي مواف وسكت يوم شافها وغمض وتنهد وكمل كلامه حطي موافقه ولف طلع من الغرفة بدون مايسمعها اذا كانت بتقول شي
العنود ناظرت لتين وهزت راسها :مو حقنا الي بيعمي عيوني ولفت اخذت جوالها ودخلت الرابط وحطت موافق ورمت الجوال وطلعت عبايتها وحطتها على السرير ونزلت الشنطه على الارض وتنهدت ويوم طلعت لتين من غرفتها وجلست على السرير دق جوالها واخذته كان اشجان
العنود ردت:هلا شوشو
اشجان فاتحة السبكر وكانت لين معاها:اهلين نوني كنت افكر امرك ونطلع نشوف فيلم ولا نروح السوق
العنود:مشغولة اليوم شوشو خليها يوم ثاني
اشجان ناظرت لين:تمام اجل بنجي نشوف لتين و ادومي اشتقتنا لهم
العنود ناظرت ادم الي يلعب:انا وادومي مشغولين اذا بتجون تشوفون لتين تعالو كيفكم بس ادومي معاي عندنا ديت
اشجان ضحكة:خلاص اجل يوم ثاني نشوفكم وحشتينا انا ولين
العنود ابتسمت:ان شاء الله أشوفكم قريب
اشجان أبتسمت اكثر للين :ان شاء الله ان شاء الله
العنود:يلا انا بقفل بلبس ادم وودعت اشجان وقفلت وقامت طلعت شنطة وحطت فيها اغراض ادم وراحت له
العنود شالته:يحسبوني بخليك يحلمون يامامي انت ولبسته ثوب صغير وطلع شكله ينوكل ولفت على طق الباب ودخول محب
العنود ابتسمت:شووفف
محب راح وشاله:ياربيه وين لقيتي له ثوب وباسه ادم كان يضحك
العنود:هذا ولد العنود نسوي له مصنع ثياب
محب آبتسم:شف تقول ولد العنود وهي بتروح وتخليك
العنود اخذته من يد محب:ادم معاي لو اروح لاخر الدنيا ما اخليه
محب:العنود بس
العنود هزت راسها:مراح اخليه هنا محب
محب:طيب ماجد؟
العنود شدت على ادم:هو حطه عندي وسجله اني امه مو لازم يدري احد انه ولد ماجد حتى لتين للحين ماتدري
محب تنهد واخذ شنطها ينزلها:تفضلي حرم سهيل ال نافل
العنود كشرت
محب حب راسها:انتي الي جبتي هذي التسمية لك
العنود ضحكة ولبست عبايتها ونزلت هي ومحب
لتين كانت بصالة ولفت على نزولها ومسحت دمعتها ووفقت ببتسامه:بتروحين خلاص؟؟
العنود عطت محب ادم وحضنتها:تعالي انتي لاتقطعين
لتين ابتسمت:ان شاء الله بنجي انا وادم نشوفك
محب:لا انتي الي بتروحين تشوفينهم بتاخذ ادم معاها
لتين بزعل:لااا
العنود ابتسمت:امانه عندي ما اقدر اخليه تعرفين انتي
لتين بحزن:يعني بيفضى البيت
العنود هزت راسها:لا برجع عطيني شوي وقت ونرجع لاتخافين وبنزعجك بعد
لتين حضنتها ثاني مره:قلت لك لا تخلين الحق يعمي عيونك
العنود شدتها:وانا قلت مو الحق الي عامي
لتين تنهدت وبعدت ببتسامة وراحت لادم تاخذه وتودعه
يوسف دخل:العنود سهيل يستناك ساهر ذلف يوم خلصت الملكه
لتين ناظرته:تعال ودع ادم بيروح معاها
يوسف طلع جواله يلهي نفسه:لتين اجهزي بنمشي حجزت
محب ناظره:على وين لو سمحت؟
يوسف مارفع راسه ابد:بنروح مكان يومين ثلاثة واحنا راجعين يلا لتين بسرعة
العنود اخذت ادم وسلمت على لتين ومحب ومشت ليوسف بس هو مشى من جنبها ووقف قدامه محب يهز راسه بنفي كانه يقول لاتسويها بس يوسف رفع راسه لمحب ونزل راسه محب بسرعة وبعد عن قدامه ومشى يوسف يرقى غرفته
العنود ابتسمت لهم وودعتهم وطلعت مع محب الي يسحب شنطها
سهيل رفع ظهره يوم شافها جايه وفتح لها الباب وناظرته وفتح الباب الي وراء:حطيت له كرسي اطفال لاتخافين ومد يده بياخذ ادم العنود خافت وشدت على ادم وبعد يده وبعد عن الباب والعنود دخلت ادم وحطته بالكرسي ونزلت تركب جنب سهيل وسكرت الباب
محب ابتسم على حركتها وركب شنطتها وناظر سهيل:انت عارف اني لا حبيتك من اول ولا بحبك الحين خلك بحدودك وسو الي انطلب منك لا اكثر ولا اقل مدامك تبي تساعد ومشى ووقف بعيد بس عند دريشة العنود واشر لها بباي مع ابتسامة
العنود ابتسمت له واشرت بباي وتحرك السيارة بعيد عن فلة عبدالله
سهيل ناظرها:وقت غداء نروح نتغدى اول تمام؟؟
العنود هزت راسها:مطعم ....
سهيل تنهد:غيره
العنود ابتسمت:ليش حلو ولا عشانه مطعم نزواتك مع بنت عمتك؟؟
سهيل ناظرها:انتهينا من هذا الموضوع قديم لا تعيدينه
العنود سكتت وطلعت جوالها وصارت تراسل مع ابتسامه خفيفه
سهيل ناظرها ورجع ناظر الطريق ووقف عند مطعم
العنود رفعت راسها ورجعت نزلته لجوالها:ادم مايحب اجواء هذي المطاعم
سهيل شغل السيارة ثاني مره:تمام وش يحب عشان نروح له
العنود بملل:البيت طفش وزهق من جلست السيارة والحين وقت الناب حقته نروح البيت
سهيل زفر بعصبية:كل الي ابيه نجلس نتناقش على الي بيصير هناك
العنود ناظرته:تناقشنا امس على كل شي بنلعب نفس لعبة جدك معد فيه تناقش اكثر وش الي مو مفهوم؟؟
سهيل حرك السيارة للقصر

تفاعلو 🩵