مايروس النجوم الا سهيل ولا يقود الظبا غير العنود

البارت الثاني والعشرون

< فلة سهيل >
العنود كانت تجهز وسمعت صوت الجرس يدق وشافت من كاميرات مراقبة وراحت تفتح بعد ما حطت الشال على راسها:هلا سعود تفضل
سعود ابتسم وهز راسه بنفي:لا تسلمين بس بعطيك ثوب واغراض سهيل طلبهم مني وجيت احطهم وامشي
العنود ابتسمت له:شكرا قالي انه بيقولك تجيب اغراضه معليش ازعجناك
سعود ابتسم:لا عادي لا ازعاج ولا شي واذا بغيتو شي علموني انا بمشي مع السلامة
العنود:مع السلامة وسكرت الباب وحطت ثوب واغراض سهيل بصالة عشان ياخذها اذا رجع وراحت غرفتها تكمل تجهيز
بعد وقت دخل سهيل وشاف اغراضه واخذهم وراح غرفته يحطهم ورجع لغرفة العنود وطق الباب
العنود فتحت:هلا؟
سهيل مد لها ماتشا:جبت لك ذي الخضراء الي مايشربها الا انتي
العنود ابتسمت:اخخ جعل محد يشربها الا انا شكرا مره
سهيل ابتسم لابتسامتها:بروح اسبح والبس عشان نروح
العنود:تمام بخلص انا بعد باي وسكرت الباب
سهيل راح غرفته
~ بيت ال ملهم ~
كان خالد ومحب جالسين بصالة وكاشخين وريحة العود والبخور ماليه البيت بفخامتها
خالد ناظر الساعة:تاخرنا ترا بعد شوي بياذن العشاء
محب هز راسه ووقف:بروح اشوفه وراح لغرفة يوسف وطق الباب ودخل يوسف
يوسف لف وجهه وحط الصورة على الطاولة:ماتعرف تطق الباب؟
محب ابتسم ودخل الغرفة:الا اعرف بس تاخرت وقلت استعجلك
يوسف هز راسه:يلا الحين بجي
محب شاف الصورة على الطاولة كانت صورتهم مع امهم وابوهم وهز راسه:تمام نستناك وطلع
يوسف راح يغسل وجهه وعدل شماغه والكبكات والساعة وحط عطر وطلع واتسعت ابتسامته
العنود ابتسمت له:حبيبي
يوسف فتح يده لها وهي حضنته:ماكنت متوقع بشوفك
العنود شدت عليه:صح اني ماني راضيه بس مدامك تبيها بصير ابيها معاك الله يتمم لكم ومنك المال ومنها العيال
يوسف ابتسم بدون رد وبعدت العنود وناظرتهم وعقدت حواجبها:وين البشوت؟؟
محب:ياطيبه ملكه ذي مو العرس
العنود ناظرته:بتقولي ساهر بيفرق بين الملكة والعرس تلقاهم كلهم لابسين البشوت وقل العنود ماقالت
خالد هز راسه بتاييد:صادقه وين البشوت؟
محب ويوسف راحو يجيبون بشوتهم وبشت لخالد
خالد تقدم للعنود:وشلونك؟
العنود ابتسمت:الحمدالله انت وشلونك؟
خالد ابتسم لها:مدامك بخير انا بخير
العنود بس ابتسمت وصارت تناظر اظافيرها الي تكسرت
خالد تنهد وراح يجلس
العنود رفعت راسها يوم بدت تحس انها جالسه تغرق بافكارها وابتسمت لجيت محب ويوسف بوقت واحد وحاطين البشوت على يدهم
يوسف تقدم لها ومد البشت للعنود الي امتلت عيونها دموع وأخذت وحطته على اكتاف يوسف وحطت يدها على صدره جهة قلبه وصارت تربت عليه
يوسف تنهد مع ابتسامه
محب تقدم:بس دوري دوري ومد لها البشت
العنود ضحكة ومسحت دمعتها واخذت البشت ولبسته:يلا عقبالك والبسك اياه معرس ان شاء الله
محب حب راسها
العنود ابتسمت وطاحت عينها على خالد الي ابتسم لها ولبس بشته
يوسف ناظرهم:يلا مشينا ؟؟
كلهم مشو مع بعض لسيارة يوسف الا العنود راحت لسيارتها
~ قصر ساهر ~
كان القصر يضج بالفرح والسرور والكل كان بصالة الي يصور ولا يتقهوى كان القصر مع الأضواء يبين انه فيه مناسبة فخمه تصير داخله هذا كله بعكس جناح سيل وودق
سيل كان مستانس ويتعطر ويغني على خفيف بس بجهة ودق الي كانت تسرح كل شوي وتمتلئ عيونها دموع وتحاول تخبيها
سيل لف عليها:انا بنزل وبرسلك اذا طلعو الشباب عشان تنزلين وتاخذين راحتك
ودق هزت راسها
سيل شاف نفسه بالمرايا ونزل لصاله
ودق اخذت شهيق وزفير تحاول تهدي نفسها وكملت الميك اب حقها ولبست فستانها كان احمر طويل ماسك على جسمها وطايحه اكتافه مما خلى بياض عنقها وعظمة الترقوة تبرز اكثر وتزيد الفستان جمال والميك اب الهادي بعكس روجها الاحمر الصارخ وتسريحة شعرها سوته ستريت بدون اضافات مما خلاها تكون انيقة جدا وهاديه وتلفت الانظار وابتسمت برضى على اطلالتها و وصلتها رسالة من سيل انه طلعو الرجال بس باقي الحريم بصالة لانه يوسف على وصول وابتسمت واخذت جوالها ونزلت لصاله
ام ماجد شافتها وصارت تسمي عليها:ما شاء لله تبارك الله وش حلوك يايمه اجلسي اجلسي
ودق ابتسمت وجلست
عشق رمقتها وهمست للبنات:ماتحسون مبالغه؟؟
لتين ناظرت ودق بغرور:خلوها تحسب كذا بتضايقني وانا ماطقيت لها خبر
توق:كفو طنشيها
لتين ابتسمت للبنات:يلا ارقصو
اشجان ضحكة:قلنا ملكتك بس يعني مو رقاصات احنا
لتين ضحكة:قصدي سوو جو
لين واشجان قامو يرقصون وعشق تصور ولتين تصفق
مجلس الرجال
دخلت سيارة العنود ووراها سيارة يوسف
قامو كل الموجودين بالمجلس من الجد ساهر وعياله واحفاده يستقبلونهم بهيبة وشموخ بالبشوت
العنود شافتهم ورسلت بقروب اخوانها:قلت لكم وقفلت جوالها ونزلت تدخل القصر
الجد ساهر ابتسم وصار يرحب ويهلي:ياهلا ومسهلا تفضلو يالله حيهم
محب ناظر يوسف ببتسامة وتقدمو يسلمون
خالد تقدم معاهم وعينه على سهيل الي عينه على العنود تدخل القصر
خلصو سلام ودخلو المجلس يجلسون لين يجي المملك
الجد ساهر كان وجهه يشع فرحة:الساعه المباركه ياخالد جيتك جابت الفرح لبيتنا
خالد ابتسم:ساعتك ابرك ياعم لو ادري كان جيت من زمان
سيل ابتسم:الوالد مستانس اكثر من يوم عرسي
الجد ساهر:يوسف ولدي ولتين حفيدتي اكيد بستانس
يوسف مبتسم بس
خالد ناظر محب وهمس:يوسف وش فيه كذا
محب تنهد:مدري ياخوي بس خلنا نخلص
~القصر جهة الحريم ~
العنود دخلت وشالت عبايتها ودخلت تسلم
ام سعود طارت من الفرحة يوم شافتها:يمه بنيتي جت وحضنتها
العنود شدت عليها:هلا خالتي حصه وبعدت وحبت راسها وسلم على الموجودين ووقفت عند لتين
لتين ابتسمت لها:العنود وشلونك؟
العنود ابتسمت وشدت على يد لتين:الحمدالله مبروك عليك يوسف
لتين بدت تختفي ابتسامتها لانه تاكدت انه العنود ماتبيها ليوسف:الله يبارك فيك
العنود سحبت يدها وجلست
عشق جلست جنب لتين:هذي هي راضيه اسيا ماعندها سالفه
لتين هزت راسها وبدون رد وخلت ودق تنتبه وتزيد ابتسامتها
اسيا نزلت وشافت العنود جالسه وتذكرت العنود تطردها
اشجان ولين جلسو جنب العنود
اشجان:وحشتيني والله
العنود ابتسمت لهم:والله حتى انتو
لين مسكت يد العنود:تعالي المطبخ نسوي ماتشا
العنود هزت راسها وبدون ماتنتبه:توني شاربه سهيل جابلي
اشجان كشرت
ولين ضربت كتفها بكتف العنود وغمزت:سهيل جابلك اجل
العنود لفت راسها بعد ماتسوعبت:قصدي
اشجان ناظرت لين:بروح اسويلي اجل مدامها ماتبي
العنود قامت معاها:متى قلت مابي بجي وراحو المطبخ
العنود دخلت المطبخ:يمه احس نفسي مفصخه اول مره ادخل المطبخ بدون عبايه
لين ضحكة بس اشجان كانت سارحه
العنود انتبهت لها:بنت وش فيك انتي؟؟
اشجان ناظرت لين الي تهز راسها بنفي:مافيني شي بس اختبارات
العنود ابتسمت وهي مو مصدقتها:يلا اجل خلنا نسوي ماتشا
اشجان ابتسمت:حلو فستانك مره محب ولا خالد جابه وغمزت
العنود ضربتها:سهيل اختاره
:طلعتي تقولين اسمي وانا مو موجود؟
العنود طارت عيونها بصدمة وصارت تطالع البنات بتهديد ولفت عليه ببتسامة:حبيبي اشجان ولين معاي
سهيل رفع يده:شفتهم ياعمري
اشجان تنحنحت وهمست:منافق
سهيل سمعها ولين ضربتها بخفيف وسحبتها يطلعون من المطبخ
العنود تنهدت براحه:وش انت بتفضحنا؟هم كاشفيني ماقول اسمك كثير وش بيقولون الحين
سهيل ابتسم:يقولون الي يبون اهم شي سمعت اسمي
العنود بتضيع الموضوع:وش تسوي هنا؟؟
سهيل حط يده على عيونه وضغطها:ريحة العود والعطور جابت لي صداع قلت اخذ قهوة يمكن يخف شوي
العنود هزت راسها:تمام تبي اسويلك؟
سهيل ناظرها:انتي تسويلي قهوة؟؟؟؟
العنود :ماتبي خلاص بروح
سهيل مسك يدها وفزت العنود وبعد يده:اسف
العنود طلعت كوب وشغلت مكينة القهوة:لا عادي
سهيل ابتسم وتسند على الثلاجة:قلتي لاخوانك؟
العنود هزت راسها بنفي
سهيل تنهد:قلتي بتروحين لهم عشان تقولين لهم وما قلتي لهم
العنود ناظرته ومدت له الكوب:ماقدرت يوم دخلت عليهم كانو جاهزين واذا قلت لهم بيطول الموضوع وخفت نتاخر
سهيل تافف:طي ولف وحط العنود ورا ظهره يغطيها وعقد حواجبه ماجد وش تسوي هنا؟؟
ماجد رفع الدله:خلصت القهوة وجيت اعبيها فيك شي؟؟
سهيل اشر بيعينه على مكان:حطها واطلع العنود هنا
ماجد آبتسم وحط الدله وطلع
سهيل لف على العنود:طيب كيف الحين؟؟
العنود تنحت شوي بعرض ظهره الي غطاها وريحه عطره مع الدخان كان يلفت مع انها ماتحب الدخان ولا تتقبل المدخن
سهيل هزها بخفيف:العنود
العنود صحصحت وهزت راسها:بقول لهم بروح داخل انا ومشت بدون ماتسمع رده
سهيل شرب قهوته وعبا الدله ورجع للمجلس
~مجلس الرجال ~
دخل المملك وقام الجد ساهر يسلم ويرحب فيه وجلس بقلب المجلس جنبه اليمين الجد ساهر وجنبه اليسار يوسف الي كان قلبه يقول شي وعقله يقول شي ثاني ورفع راسه لمحب الي يهز المفتاح يعني خلنا ننحاش وابتسم ومحب ضحك
المملك تنحنح عشان يبدا: إن الحمد لله نحمده ونستعينه ونستغفره، ونعوذ بالله من شرور أنفسنا ومن سيئات أعمالنا، من يهده الله فلا مضل له ومن يضلل فلا هادي له، وأشهد أن لا إله إلا الله وحده لا شريك له، وأشهد أن محمدًا عبدالله ورسوله ومسك يد يوسف الي ارتجف بخفيف بس شد على يد المملك ناظر المملك ماجد قل زوجتك اختي لتين على سنة الله ورسوله على المهر المقدر بيننا
ماجد ابتسم ليوسف:زوجتك اختي لتين على سنة الله ورسوله وعلى المهر المقدر بيننا
المملك ناظر يوسف:قل وانا قبلت هذا الزواج
يوسف طاحت عينه على سيل وتذكر ودق:وانا قبلت هذا الزواج
المملك ترك يد يوسف واخذ بطايق محب وخالد لانهم الشهود وكتب كل شي ورجع بطايقهم: باركَ اللَّهُ لكَ وباركَ عليكَ وجمعَ بينكما في خيرٍ
يوسف ابتسم:الله يبارك فيك
الجد ساهر تقدم له وصافحه بشده:اخذت حفيده من حقيداتي ونبض من القلب ما اوصيك
يوسف هز راسك وشد زياده تاكيد:لا توصي حريص صارت بالقلب والعقل
الجد ساهر ابتسم ورخاء يده
سيل حضنه:مبروك مبروك ياخوي
يوسف ضحك وربت على ظهره:الله يبارك فيك
باركوله الموجودين ويعطونه نصايح مبطنه تحذيرات بس يوسف يرد عليهم بحرص ويطمنهم
وجلسو يتقهون
يوسف اشر لماجد يجي جنبه
ماجد انتبه له وراح جلس جنبه:سم يالنسيب
يوسف آبتسم:سم الله عدوك بشوف لتين اذا ماعليك امر
ماجد هز راسه:ابشر الحين بقول لها تدخل المجلس وبدخلك
يوسف هز راسه بموافقه
ماجد طلع جواله واتصل على امه:يمه
ام ماجد كانت طايره من الفرحة وتبين من صوتها:هلا يمه
ماجد ضحك:مبروك عليك يا ام ماجد اليوم ملكت بنتك اكيد مستانسه ما شاء الله
ام ماجد :ايه والله يا يمه والله كل شوي اقرا عليها الاذكار اخاف احسدها
ماجد ابتسم:ما شاء الله الله يتمم لهم يا يمه اسمعي يوسف يبي لتين قلت له بدخلها المجلس واقولك
ام ماجد:تم يا يمه الحين اقولها وادخلها وبرسلك عشان تجيبه وقفلت
ماجد رجع جلس جنب يوسف:شوي بس وادخلك قلت لامي تقول للتين
يوسف هز راسه ببتسامة
~ داخل القصر ~

تفاعلو لو سمحتو🥹