اتبع هواك ومتجه في مصيرك.

٥٠

لبست مخورتي وشيلتي و
نزلت تحت مره ثانيه وشفت عمي وعمتي ومايد
سلمت عليهم وقعدت وياهم
طبعا عمي وعمتي مايعرفون عن ناصر
ام ذياب : نور البيت بوجودك حبيبي
مايد : منور بأهله خالوه
ام ذياب : وين يا يمه البيت مستوي كئيب. . العنود ويا ريلها . . ودانه وذياب اربعه وعشرين ساعه رقوده
انصدمت وطالعتها: عموه تراني قاعده اهني
ام ذياب : ادري اقول عشان تحسون على دمكم شوي
دانه : ههههه عاد ما تفجرينها فويهي
مايد : ولا يهمج خالوه . . اليوم باخذج ونطلع ونستانس انا وانتي . . "يهمس لها " . . ونسحب على عمي بعد . . خلاص شيب ماتبين تاخذين غيره؟
ام ذياب تضربه : الله يقطع سوالفك ياميود
مايد يضحك : صدق خالوه
ام ذياب : اسكتت اسكتت
مايد يهمس لها : صدققق خالوه . . تراج للحين حلوه وصغيره  والف من يتمناج . . اطلقي من عمي وشوفي حياتج . . تزوجي اطلعي استانسي اسحبي عليه وانسيه تمامًا
ام ذياب بتهديد : بتسكت ولا امرغك بنعال
ابو ذياب : مايد لاتلعوز حرمتي ترا ما ارضا عليها
مايد : اوبببب اوببب اوببب
ام ذياب تسوي روحها مستحيه
وكلنا ضحكنا
.
.
.
كان الوقت لليل عندهم بحكم اختلاف الدول
وصلو الفندق وهم حدهم تعبانين
راح حمد وطاح عالسرير وزفررر
العنود راحت صوبه وقعدت على طرف السرير
حمد : الحمدلله على السلامة حبيبي
العنود : الحمدلله على سلامتك بعد
حمد يبتسم
العنود : يلا قوم خلنا نصلي صلاوتنا وعقب نوطي راسنا ونرقد
حمد : ان شاء الله
العنود قامت وطالعته : يلا
حمد مد ايده : ساعديني
العنود : واييي عالعيازه
حمد : والله تعباننننن
العنود مسكت ايده : يلا قوم . . وحاولت تسحبه بس ماقدرت عليه
حمد : يالله فقدتج
العنود : تتحرا عمرك خفيف
حمد ابتسم وسحبها بقوه وخلاها اطيح على صدره ورص عليها بأيدينه
العنود : ماتفقنا على جي
حمد : اشششش . . مب لازم نتفق
تمو جي لمده خمس ثواني
عقب خازت عنه العنود وباسته على خده
العنود : يلا قوم
حمد : ان شاء الله
وقامو هم الاثنين توضوا واغتسلو عدل . . وصلو ودعو . . خلص حمد وراح انسدح عالسرير . . وعقبه بشوي خلصت العنود . . راحت غيرت وردت انسدحت حذاله وحطت راسها على صدره . . وكان هو يلعب بخصل شعرها . . لين ما رقدوا من التعب
.
.
.
هديتهم وطلعت قسمي فوق
شفت ذياب للحين راقد وناصر ناش وقاعد يتحرك فحضنه
ابتسمت وسرت شليته عنه
وقعدت الاعبه
انجذبت له بشكل كبيرررر ما تتصورنه . . عمر ناصر خمس شهور حسب الي اعرفه . . وما شاء الله عليه تختوخ شوي . . وجميل
كان يلعب ويضحك ويسوي حركات عفويه
ومانتبهت انه سوينا حشره . . الا لما قام ذياب وكانت كشته ناقعه على فوق ومعصب وواقف فوق راسي
دانه : هههههههههههههههههههههههه
ذياب : تضحكين ؟
دانه : كشتك ليش طامره
ذياب : مالج حايه. . انتي ماقلتي مابطولين. . شهالشور الساعه
دانه : مانتبهت اني خذت راحتي . . بعدين ليش معصب تراك رقدت وريحت
ذياب : وين ريحت وانتوا مسوين كل هالازعاج
شهقت : سوري حبيبي ماقصدنا
ذياب يبتسم : عشان حبيبي بسامحج
قفطت
قرب ذياب صوبنا وقعد يلاعب ناصر ويبوسه ويشمه
ذياب : فديتتتتتتت هالريحههههه . . احسن من وهفان الصبح
ضحكت
ذياب شله ووقفه وهو ماسك ايدينه
دانه : شوو تبا فيه
ذياب : بعلمه يمشي
دانه : بعده ياهل وين يقدر يمشي
ذياب : والله من متنه مابيقدر يمشي
ضربته : حرام عليك لاتقول جي
ذياب : اذا يبتيلي ولد بهالمتن بفره
حطيت ايدي على خصري : لا والله
ذياب : تخيلي ينقز فوقي فيوم من الايام واموت
دانه : عاد الا ياهل مابيذبحك
ذياب : من قالج . . يمكن يطيح عالعمود الفقري يمكن يخنقني وانا نايم ويمكن ويمكن ويمكن
دانه : حشى حشى خليته مجرم انته
ذياب : صدق
قعدت انزل شعره على تحت
دانه : كشتك خايسه وهي ناقعه
ذياب : لو بتعدلينها كليوم والله لانقعها بشلق بعد
ضحكت عليه : مب صاحي والله