أخذه قوي تركه ضعيف

Part 32

بارت 32

اول مكعدت الصبح جنت كلي نشاط محضرة ملابسي من البارحة كمت وكعدت يارا
- كومي اليوم اول يوم جامعة كوووومي
- انجبي عساس هامتج الجامعة
- المهم كومي
رحت بدلت اني اول شي 

ووحطيت مكياج عدلت شعري ورتبتة اخر لمسة جانت رشة عطر وكلشي تمام
اجتي يارا
-اتجننين ميحتاج اتسالين
-صدك
-والله اصلا اول مرة اشوفج ابينة
-امداج ليش شنو جنت
-ولد
-هههههههههههههه
طلعنا سوة وابوية وصلنا للجامعة
مرت الايام على الجامعة واني كليومية اتحضر كانو راح اشوفة اليوم صار عدي هواية صديقات من قسمي وهواية ولد يتوددولي اني ما اتقرب من احد واحس جسمي يرجف اذا اتقربلي ولد ما اتحمل احد اذكر الي اتعرضتلة وكانوا البارحة لدرجة انهزم راسا اذا المكان بي ولد
اعتقد لاحظوا هلشي بس ميهني اذا لاحظوا او لا كليومية افتر احاول الكى بس ما لكيتة ليهسة مر شهر وهو ماكو حتى رحت لمرحلتة  شفت اسمة اتاكدت انو موجود  بس ما ادري بي وين
- اه هوفففف
جنت كاعدة اسمع الاغنية الي غناها الي واذكرة كلبي يفز بس يمر يمي احد نفس مواصفاتة  نفس طولة  كلبي احسة يكمز من مكانة
فزيت على دكة التلفون
-الو
-ولج انتي وينج
-ليش ابيش الساعة
-١١:٣٠ يالثولة ابيش ملتهية
- منتبهت والله هسة جاية
-ديلى منتظرتج
كمت ومشيت رحت للمكان الي متواعدين بي  جنت مخبوصة بالجنطة والملازم بس رفعت راسي انصدمت احس الدنيا وكفت حتى تنفسي وكف ما اسمع شي حسيت بس بدمعتي

جان واكف وديضحك وية هواية طلاب وطالبات
-ايفين ايفين تسمعيني شبيج
انتبهت يارا كبالي وتهز بية
-شبيج ولج ليش تبجين
رجعت لفت علي  شفتة يضحك  وكانو مو سيف الي اعرفة  هو هذا سيف هذا حلكة وعيونة وشعرة هذا سيف رحت امشي علي عبالك مخدرة مدري شبية حتى دموعي ما مسحتهن بس اريد اوصلة اريد احس بالامان نفسة رحت ووصلت قريب شفتة باوع علية انتبه انصدم بس بعدين رجع يباوع على جماعتة انصدمت منة سوة روحة حتى مشايفني من انتبهت اكثر شفت بنية يمة وجنة لازمها
-هذا يطخها وهي يمة كلش هاي منو
عبالك انضربت راشدي قوي وعيت على نفسي اكثر  
-ايفين
-امشي يارا بسرعة امشي
ضليت امشي سريع كلش وجارتها وراية
-شبيج
وكفت وما اعرف شسوي كلبي حينفجر اختنكت مدا اكدر اتنفس
-ايفين ايفين اصحي
باوعت عليها بجيت
-شفتة يارا شفتة
-على كيفج ميخالف على كيفج اهدي حبيبتي
اخذت فترة على ما وعيت على روحي لكيت روحي بحديقة
-هاج مي حبيبتي هاج
شربت ضليت اتنفس  بقوة احس اريد ادخل كل الاوكسجين الي بالدنيا
- شنو صار ليش مرحتي الة
- ولج شافني بس مهتم حتى ما اجة  علية وانوبة انوبة اكو وحدة ويا حتى لزمها ويحجي وياها
- متاكدة ؟ خاف منتبهتي صح
- لا متاكدة والله
- اكلج يجوز زميلة ترة هو مرحلة ٣ يعني صالة سنتين هنا اكيد عندة صديقات
- لا كلبي يكول غير شي والله هو مالة علاقة باحد شمعنة هسة
-يولي شمدريج انتي صح الفترة الي ويا هواية بس لتنسين المكان الي جنتي بي مو مكان تعرفين بي هيج تفاصيل عنة
- هسة شسوي
- كلشي متسوين ترجعين لنفس وضعج الطبيعي ومن اتشوفي سوي روحج ممهتمة هم الولد يجون هيج والله
- دروحي 
راحت هي للمحاضرة مالتها واني ضليت كاعدة اخاف ارجع لقسمي لا اشوفة  كمت ورحت للقسم طبيت وكلبي يدك يدك قوي مر اليوم ومشفتة
خلص الدوام ورجعت للبيت بعدني مصدومة بي كلش ليش سوة روحة ميعرفني ليش وبعدين منو هاي معقولة ارتبط بيها ولهذا ميريدها تدري مثلا يخاف اكللها اني اعرفة لا لا ممعقولة  على شنو يخاف وسيف يخاف لا لا غلط ماكو هيج  شي
صبحت ثاني يوم
بالكوة جريت ووحي للدوام ساعة اي والف ساعة اكول لا ما اداوم

- الو
- ها
- اذا ما امبدلة اذبحج
- لا امبدلة بس ما اريد اداوم
- لا بالعكس جنت تنتظرين شوكت يداوم وهسة من داوم متريدين اداومين
باوعت على المراية للمرة الاخيرة
وصلت للجامعة واني كلبي مثل الدنبك احس حشوفة باي وقت
- يلى حبيبتي حروح
- اوكفي اوكفي حلوة ؟
- اتخبلين بيباي
راحت واني ضليت واكفة اباب القسم اخذت نفس وطبيت
- هلوو فيفو شلونج
- ها ياسمينة الحمدلله انتي شلونج
- هاي شنو الجمال عيني هيج راح تكسرين علينا فدمرة
-هههههههه عيونج الحلوة
- اكلج مصعب سال عليج
- مصعب ؟
- اي يريد منج معلومات مدري شنو عود روحيلة
- ها اوكي الله كريم
- بيباي حب اخليج
- باي
يامعلومات هاية اوف اني وين وذولة وين
مشيت وايدي على كلبي
كلبي صار براسي من شفتة حسيت روحي حطير شفتة داير مدايرة هواية طلاب هو كاعد وهمة يسولفون ضليت اتاملة واتامل تفاصيلة الي مشتاقتلها حسيت غبت عن الوعي رحت بغير عالم عالم بي سيف من شوكت اني احبة انتبهت انو صديقة يحجي ويا ويعدين هو باوعلي وكام يمشي بتجاهي
شنو باتجاهي هذا ديتقرب عزة هاي عود يارا كالت اهملي
صار مقابيلي ما اشوف غير صدرة غمضت واشتميت ريحتة اخ هاي الريحة
رفعت راسي علي نظرتة كلها غضب
- شكو اتباوعيلي
نعم هذا شبي
- تعرفيني ؟
ما اعرف شجاوبة انصدمت دخت هذا شديكول
-سيف
-روحي من وجهي
-سيف حبيبي شدسوي هنا
باوعتلها هاي نفسها هي
- منو هاي
واتاشر علية
- ابنية مخربطة عبالها واحد لاخ
- اها ديلى حب امشي
اخذت وراحت
- واووو
ضليت ما اكدر حتى ابلع ريگي
- ايفين دزيت عليج ياسمين والبنات محد كالج ؟
- الو ايفين
رفعت راسي علي
- نعم
- شبيج
لزمت جنطتني والتفت ورحت طلعت من الكلية رحت اقرب كافتريا ضليت كاعدة بس اباوع على الرايح والجاي ما اكدر افكر مجرد اباوع

يتبع