تدخل مكتب الدكتوره بقوه متكتفه ورافعه حواجبها والعصبيه تملأ وجهها توقف قبال الدكتوره بطولها
الدكتوره : هاه ياست فلك وش عندك
فلك : انا قايله لتس انها سارقه بحثي
الدكتوره بملل : طيب هي سلمته لي قبلك وش يثبت لي انه حقك ليه ماسلمتيه من بدري
فلك بقهر : شفتها مرسله بالقروب تبغى نموذج للبحث عشان ماعرفت تسويه ارسلت لها حقي من طيبة قلبي ماتوقعت انها سروق نسخ لصق تسذا
وهاه تبغين الدليل شوفي المحادثات
طلعت فلك جوالها عشان توريها
الدكتوره وهي تبغى الفكه : خلاص خلاص بحسب لتس الدرجه هالمره بس
فلك : وهي طيبب المفروض تنقصينها
الدكتوره : وانتي شدخلتس فيها خلاص بحط لتس الدرجه قلت
فلك تأففت وطلعت برا المكتب : هييّن هييّن ذا وجهي كان سويت خير مره ثانيه
طلعت جوالها تدق على ابوها يجي ياخذها
فلك تحاول تعدل نبرة صوتها : الو يبه خلصت محاضراتي تعال لي اذا قدرت
ابو فلك : ابك انتي ماعاد تشوفين سيارتي قدامتس يالخبلا بدق بوري عشان تنتبهين
طالعت فلك باستغراب فعلا طلع قدامها
دخلت السياره متنرفزه من الي صار مع الدكتوره
ابو فلك : وراتس معصبه تسذا
فلك بقهر : كله من الدكتوره حسبيا الله عليها انا قايلتن لها انه في وحده سارقتن بحثي طلبت منها تنقصها وتقول انتي وش دخلتس فيها
ابو فلك وهو يشغل السياره : وهي صادزه عاد تبغين تنقصها على كيفتس الدنيا
فلك بشهقه : يبه لا يكون حتى انت ضدي
بحركة دراميه سريعه حطت راسها على الشباك وقالت انا داريه انكم ماتحبوني اصلا انا ماني بنتكم
بو فلك وهو يطلع جواله : البخي بس صجيتي راسي عندي مكالمه مهمه ذحين سدي حلقتس
فلك : ابشررر
دخلو البيت واستقبلتهم ميلاف بصوت رقيق :
اهليينن يبه وسلمت على يده وراسه
بو فلك باستغراب : وانتي وراتس ماداومتي
ميلاف بقهر وهي حابسه البكيه : شسوي يبه تخييلل داومت والا رجعوني يقولون المدرسة امطار لاتقعدين والله مقهورره ولا حق قومت الصباح حتى
فلك بضحكه : وهم صادزين عاد لاتروحين ثم يشيلك السيل نبلش فيك
ام فلك وهي طالعه من المطبخ : فال الله ولا فالتس يافلك اذلفي نادي اختس هالنفاس الي فوق مغير منسدحه ليل نهار
لفت لأبو فلك وانت معهم يلا رح غير ملابسك على بال ما اجهز الغدا
فلك راحت ركض لأختها
دقت باب غرفتها
ايلاف منسدحه وهي رافعه صوتها : هاااااه
فلك دخلت وبشهقه حطت يدها على صدرها : يمممه اثاري امي صادزه تقل نفاس
إيلاف بطفش : ترا نفسيتي في خشمي لاتخليني اطلع حرتي فيتس
فلك وهي متمايله على ايطار الباب : اقول بس امي تناديك مجهززهه غدا على كيف مختس يلا يلا ولا ترا بخلصه عليتس
ايلاف وهي تقوم من السرير : جايه جايه
في مكان ثاني عند بيت بو نواف ..
يدخل بو نواف المقلط بعصبيه وصراخ : انت ياراس البلا ليش ماداومت اليومم هاه؟موظفك ليش انا مو عشان شركتي تغيب على كيفك زيك زيهم
نواف وهو يشيل السماعات من عند اذنه : يبه معليش والله بس ماكان فيني حيل اداوم ترا الدوام متعب بشكل
بو نواف بصدمه : الله اكبر يالمتعب اقول بس تراك تداوم مغير ترتب كم ورقه فوق بعضها وتنقلع البيت وبعدين كيف بتشوف حياتك اذا ماتوظفت
نواف بثقه وابتسامه كأنه جاب الحل : دندن يبه وازهلها معليك متى ماحسيت اني مطفر وطفشان توظفت عندك
بو نواف : نعنبوك انت شايف الدنيا سهالات تسذا
انا الغلطان اني وظفتك اصلا قم انقلع من قدامي شف كيف خليت المقلط مخنز بعوايزك كن ماعندك غرفه
فجأه بدون سابق انذار رفع عقاله يرميه على نواف
نواف بألم : اخخ الله يسامحك يبه
ام نواف وهي رافعه صوتها من المطبخ : انتم ورا اصواتكم مرتفعه تسذا فضحتونا محد بيته صوته يلعلع بالحاره غيرنا
نواف وكان ماله دخل : يمه شوفي ابوي هو الي يصارخ فشلنا
بو نواف بصدمه : انا فشلتك ياقليل الادب الظاهر ماربيتك زين انت الوحيد الناشب بحلقي من يوم ماولدت وبصوت عالي : قمم افللحح عن وجهي قم لابارك الله فيك
المها وهي نازله من الدرج وآثار النوم فيها : لا اله الا الله عسى خير
نواف : انتي شدخلتس كملي رقاد احسن
المها بقهر وبصوت ناعس: يبه ترا نواف من امس فاقع مرارتي شرايك اجيب السلاح نذبحه ونرتاح منه مامنه فايده
ام نواف بفجعه : بسم الله على وليدي منتس اذلفي عن ابوتس بس محد يقرب صوب وليدي
نواف بحركه مستفزه يرفع حواجبه ويطلع لسانه للمها
المها بقرف : يع تقل بزر
قاطع كلامهم عز وهو داخل وماسك بيده خوذة الدباب
عز بضحكه : اخ يانواف يقطع بليسك كأنك انت المراهق مب انا
بو نواف حوّل على عز :خذلك انت ثاني من وين جاي هاه ؟
عز بنكبه : اء...انا.. يبه نسيت صدقني
نرجع لبيت فلك ..
الكل ملتم حول سفرة الغدا ويسولفون
فلك وهي تعيد نفس السالفه حقت الدكتوره
إيلاف بطفش : اقول ترا تعبنا واحنا نسلك لتس حلبتي السالفه حلب معليش مقدر اسلك اكثر من تسذا وبعدين وراك مافقعتي وجهها وريحتينا دامك كذا مقهوره هاه
فلك بقهر : والله لو اقدر كان دخلت يدي بعينها بس قلت آخر سنه جامعه لي مابي اخربها ابي اتخرج بسلام وافتك
ايلاف ودقت الصدر : معليتس انا توي صغيره وديني لجامعتس اتوطى ببطنها وارجع محد بيقول لي شي
ام فلك بحسره وهي تضرب يدينها ببعض : اخ بس حشى تقل عندي عيال مب بنات صاحين انتم
ميلاف واللقمه بفمها : متوحشات تفجعون
فلك وهي تطالع بميلاف : اقول خفي علينا يامختمة الانوثه انتي
ميلاف ماردت
بو فلك : اقول وش رايكم الاسبوع الجاي نروح صوب مزرعتنا من زمان عنها ننام فيها
فلك بتأييد : معك يبه احتزم بي
إيلاف : ماعندي مانع يبه تغيير جو
ميلاف: تمام
ام فلك : اي والله خل نغيير جو طقت كبودنا من البيت
بو فلك : الله الله كل ذا بخاطرتس كان علمتيتي الله يهداتس ان ودك تروحين
ام فلك اكتفت بأبتسامه مستحييه
ايلاف بضحكه: اخسس حصحوصه استحيتي
ام فلك ضربت ايلاف من كتفها : وجع ماتستحين انتي تقولين لأمك تسذا
ايلاف بألم : شدعوه يمه بس دلعتس
صدت ام فلك : مابي دلعتس هذا وفريه
وفجاه كذا الكل قام يضحك بقوه على السفره حتى
ابو فلك معاهم
بو فلك والإبتسامة باقي بوجهه : شرايكم اعزم خويي بو نواف مع اهله
ام فلك : اي والله عادي
يتبع ...
تعليقاتكم تهمني
ولاتنسون تضيفوني بقية حساباتي..
أنت تقرأ
لا تباطيتي بوصلك ..والبطى ماني خويٍ له
Randomتدور عن روايه عائليه؟فالديره؟ اي شي يخطر ببالك موجود مكانك هنا .. كاتبه مبتدأه.. حللتم أهلا ووطِئتم سهلا.. بقلم الكاتبه / هَـاء . الانستا / haal.sl
