𝓱𝓲𝓼 𝓶𝓲𝓼𝓽𝓻𝓮𝓼𝓼..🖤🦋

الحلقهه «25»

للكاتبة الملكهه.. 🖤🪶 (آيات البشتي)

عند ايات...
ميس: اييه اسمها ليبيا🤍
رغد: حلوو
ايات: يسس نوعا ما عجبني
ردينهه: معناته نطلعو مع بعض
ايات²: اني كان مجاش بوي نطلع معاكم
ميس: خلاص معناهاا مع بعض
رغد: اني الباص اللي نركب معاه هدا حصلة
ردينهه: خيرهه
رغد: مبرد دمهه، يجي اخر اخر واحد ولا يقلك كنت نستنى م بكري غير انتي مشبحتينيش
ميس: حلوا هادي مشبحتيني
ايات: منحكيلك ع منذر لعند انتي تمشيله هوا ميجيكش، تمشيله واقعدي دوري ف هديك المدرسة عادد
ردينهه: اخي لما يبدا عندك خو اصغر منك
يدره الكبد بنت اي لاكن ولد يعع
ميس: اني عندي زوز اصغر مني الكبير ديما اني وياه نتعاركو مدرهلي كبدي
ايات²: وين يقروو؟
ميس: الابتدائية هاديي
ايات: ميروحوش معاك؟
ميس: واحد عشية والتاني صبح، يروحو ع رجليهم مش بعيد، واني نروح مع عمي
رغد: صف شن هما خوتك
ميس: واحد خامس وواحد سادس
ردينهه: ربي يحفظهملك
ميس: ان شاء الله
مسرة(بنت عم ميس): هاايي شجوو
الكل: هااي& اهلين
مسرة: هيا ميس ليبيا جت
ميس: باهي هي، انتم بتطلعو توا
ردينهه: ع ايات
ايات²: هيا هوا اصلا بوي قالي كا عطلت روحي ع رجليك
ايات: باهي هيي، بايي رغد
ردينهه&ايات²&ميس: بايي
رغد: بايي
طلعو البنات، ايات فاتت ع منذر لقاته هوا وولد جيرانهم الجديد قعدو يمشو قدامهم ومنذر وصاحبه وراهم، ميس وبنات عمها وايات دخلو يمين وردينهه وايات كملو طول
ردينهه: شفتيهم جيرانكم
ايات: لاله مشفتهمش
ردينهه: وين يسكنو، اما حوش
ايات: اللي بجنبنا ع اليمين
ردينهه: اللي ع دورين؟
ايات: ايي
ردينهه: ان شاء الله يطلعو كويسين
ايات: ان شاء الله، نحس فيهم كويسين مدام جو وعزونا
ردينهه دخلت الشارع تبعهم: اي ممكن، هي بايي
ايات كملت لشارعهم: باي، كلميني بعدين
ردينهه: باههي... كل وحدة روحت لحوشهم

عند محمد...
قعد يستنو لعند طلعو الكل واتجه لحوش صالح
معاذ هاتفه يرن: ايواا
محمد: اهاا قول لمسلم يطلع نستنى فيه قدام الحوش
معاذ: باهي اللي جيت. حتى اني ناوي نطلع
محمد: تمامم سكر... سكر منه
معاذ: محمد يستنى فيك برا
مسلم: تمام، مسلم خدي بضاعته ومعاذ برضو وطلع علق المفتاح م برا وطلع
منذر: طالعين؟
معاذ: اييه ما تبي شي، تمام
منذر: تمام... طلع مسلم ومعاذ مسلم مشي مع محمد ومعاذ اتجه لحوشهم
محمد وصل للحوش نزل هوا ومعاذ فتحله المربوعة ودخل
محمد: السلام عليكم
هيفاء: وعليكم السلام توقعتكم تجوو لما مرديتش عليا، وحسبتكم ف الغدي
محمد: باهي كويس، مرام روحت؟
هيفاء: اي اوينه ف دارها رقت تعبانة بترقد، باهي اللي اليوم معندهاش كورس
محمد: باهيي، وبوي
هيفاء: حتى هوا ف داره، قال حتى الغدي بيتغدا فوق
محمد: تمام اني ف المربوعة مع الولد...

عند ردينهه...
دخلت غيرت لبسها توضت وصلت وطلعت للكوجينهه
حنين: عطلتو ليوم شوية
ردينهه: اي قعدنا نهدرزو
حنين: خميس عادد
ردينهه: اييه
حنين: مكلمكم حد ف المدرسة؟
ردينهه: من الابلات؟
حنين: لا قصدي ع الشباب متع يومها
ردينهه: واحد مسافر وتانية واقف قدام المدرسة
حنين: اكيد قاعدين ع خاطر خايفين ع ايات م الجماعة اللي قتلو بوها
ردينهه: ممكن لاكن هما اصلا م قبل يخدمو غادي مناوبة
حنين: هما نفسهم السيارة اللي تحرس قدام مدرستكم
ردينهه: اي نفسها، ع خاطر السنة اللي فاتت و المشاكل اللي يصيرو قدام المدرسة
حنين: اييه احسن، فتكيتو والله السنة اللي فاتت كل م نسمع ف مشكلة نقول زعما شن صاير ف بناتي
ردينهه: اه ي الحنونة انتي😂
حنين: اسمي حنين ومنحنش
ردينهه: صووح، بابا قعد مروحش؟
حنين: حطني ومشي بيروح باختك ويجي
ردينهه: ومعاذ مروحش؟
حنين: لا مروحش، علاش تسالي
ردينهه: لا شيي، انتي امتى روحتي
حنين: 11 ونص
ردينهه: غريبة بكري اليوم
حنين: القسم اللي فيه احني بيديروله صيانة حولونا لعيادة برا
ردينهه: امم كويس، باه معاش تخدمو ولا شن
حنين: غدوة بيفتحو العيادة اللي برا لان كانت مسكرة وينظفو فيها
ردينهه: اهاا، حقا قلتي لبابا غدوة بنمشو لطرابلس
حنين: حوش خالتك؟
ردينهه: اي مش قلتي
حنين: مقتلاش تو نقله
ردينهه: يروح ب الاء وقليله طول باهيي... شوي وخشت الاء وصلاح
الاء&صلاح: السلام عليكم
حنين&ردينهه: وعليكم السلام
ردينهه تأشر لامها: ماما
حنين: اهو بوك قدامك شن تكلمي فيا اني
صلاح: خيرك شن تبي
ردينهه: لا شي، غير غدوة نبوك ترفعنا لحوش خالتي
صلاح: اي منهم
ردينهه: خالتي هبة اللي ف طرابلس
صلاح: يصير خير، توا خلي نمشي نصلي
الاء:? what are you doing
ردينهه: بالله شن🙂
الاء: يسس
ردينهه: nothing
حنين: تكلمي باهي انتي وياهها
ردينهه: قتلك شن اديري
حنين: عارفتها، نستنى ف الغدي قريب يطيب ونسقيلكم
الاء: باه خلي نمشي اني نصلي ونغير
ردينهه: خلي اني نوتي الصفرة
حنين: طلعي الزيتون والمسير... وتت ردينهه الصفرة وامها سقت الغدي وقعدو يتغدو غسلت ردينهه الماعين وكل حد شد داره
ردينهه: شن جو الجامعة؟
الاء: تصوير اي نقلك لاكن محاضرات دراهه، الاساتذة نصهم رافعين علينا خشمهم ع اساس حاجة كبير، وعندك واحد هدا نسونجي لدرجة لاتوصف
ردينهه: امتى لحقتي تعرفيهم؟
الاء: ازك مش كلهم لاكن اللي عرفتهم كلهم هك
ردينهه: كلهم اساتذة؟
الاء: لا اليوم دكتورة جوها كيوت هكك
ردينهه: صغيرة شكلها
الاء: لا لا كبيرة قصدي طيبة لما قلت كيوت
ردينهه: اهاا والنسونجي هدا مش متحشم م الشباب اللي معاكم ولا كيف
الاء: هوا مش قصدي نسونجي يعني هك يهدرز مع البنات وهك يعني كانك تكلمي ف بنت
ردينهه: كذبهه، يععع عليك عادد، ودكتور معاها راحت الهيبة
الاء: اوك م يهدرزش معاهم يعني هدرزة لاكن ف المحاضرة عنده لقطات هك تافهة
ردينهه: ربي يجيرنا😂...