مجنــ🤣ـــٌونتي ... الحلقه 21
رحمه ماتبيش تطلع وقاعده في دارها متحشمه وبنات العيله زادوها عليها لأنهم ينابشو فيها خاصة بعد عرفوه الدكتور طارق مشهور ومحبوب للجميع اساسا
خشت عليها رويدا : يا بنت اطلعي شنو صايرلك هما يراجو فيك وانتي كارسه
رحمه : والله زعمولي كبدي البنات 🥺
كوثر جات طبعا هذي دمها بارد لا تتحشم ولا أي شيء : رحومه تعالي يا بنت كنك
رويدا ضحكت : سبحان الله المشكله خوات وحده متحشمه والتانيه يلي هي الصغيره .. جوها تمام وتضحك وتبصر
كوثر انفجرت ضحك : عادي الموضوع بعدين عليش نخاف انا قاعده مع صبايا
رويدا تضحك : يعني حاتخافي مع معاذ
كوثر لفت دغري وطلعت من الدار بسرعه
رويدا ضحكت : طلعت تخاف شفتيها ههه
رحمه : كذابه هذي اتخوف بلد بحالها هههه
رويدا : باهي يا خوافه انتي تعالي معايا
رحمه : لا قوليلهم نعسانه وحانرقد اشويه
رويدا : معناها توا نكلم اختي تتفاهم معاك
رحمه : والله كنتنا زمرد مش حاتقدر عليا
رويدا : معناها انتي ما شفتيها لما تعاند
رحمه : كيف يعني .. شنو ادير مثلا ؟
رويدا ضحكت : توا اتجيك راجي اشويه
وطلعت خلتها تبي ترقد ومش معدله عليهم
عدت لزمرد همستلها : اسمعي راه رحمه ماتبيش تطلع برا وناويه ترقد امشيلها ههه
زمرد فتحت عيونها عالاخر وعدت شورها دغري .. لقتها مغمضه عيونها وناويه ترقد
كرت الفوطه من عليها : صبي توا الوقت
رحمه ماتردش ودارت روحها راقده
زمرد كرت شعرها : تبي اتصبي او نكلم رائد يجيك ويشيلك يعزقك في نص صاله
رحمه انصدمت : لالا مستحيل رائد يجي
زمرد مسكت تليفونها : باه تمام راجي اشويه وتلقيه قدام خلقتك ههههههه
رحمه خافت لأنها تعرف رائد : لالا خلاص
ادبالك تتصلي توا نطلع عليهم اوف منك
زمرد ضحكت : ماتجيش ألا بالعين الحمرا
رحمه قلبت وجهها وهي قريب تعض يدها
اما زمرد طلعت من الدار وعدت تبي اتشوف رائد يمكن قاعد قدام الباب ، بس شافت بيان مقمعزه وحاطه يدها علي راسها أنصدمت قربت منها : كنك شنو في
بيان بحتت فيها : تزوجتي رائد يعني ؟
زمرد رفعت حاجبها : يا بنت تستهبلي ؟
بيان حطت يدها علي راسها : والله الاستهبال شفته لما جيت لحوشكم
زمرد عصبت : انتي كنك كل مره شكل ؟
بيان صبت وبحتت فيها : شنو تحقي فيا مجنونه مثلا .. بس انا حذرتك وقتلك ما تتزوجي رائد وتوا انشوفك في حوشه
زمرد همست : انتي فعلا مجنونه ، ولفت تبي تمشي .. بس يد بيان كانت أسرع منها
كرت شعرها بالقوة وزمرد عيطت من قوتها
الكل جاه بعد سمعو العياط وانصدمو من شوفت بيان وهي ماسكه زمرد بهالشكل
الرجاله سمعو الهرجه وصاحب الحوش عدا يشوف شنو في .. اول ما فتح الباب شاف زمرد تعيط والتانيه اتكر في شعرها ومافيش حد قدر عليها .. دف الباب بكل قوته واعيونه نار : اطلقيها راه نكسر يدك
كوثر قبل ناويه تضرب بيان بحاجه حاده بس يد رائد منعتها : كوثر اهدي خلاص
بيان اول ما شافت رائد طلقت شعر زمرد
يلي كانت مصدومه وأعيونها علي بيان
