مجنــ🤣ـــٌونتي ... الحلقه 19
خشت عليهم وبدموع : تبي تتزوج أمل
ليش ما لقيتش غيرها يعني مافيش ألا هي
حمزه ماردش عليها بس أمه ردت : هو يبي يتريح أنتي تعبتيه وخوك قهرنا كان حايقتل زمرد وراجلها .. وتوا عندك عين تحكي وتمنعيه عن حقه الشرعي يا حنه
بيان بحتت فيهم بقهر وعدت لدارها دغري تبكي وحالتها حاله .. حمزه أضايق وطلع برا من الأختناق يلي حاسس بيه وقاهره
بيان حالتها حاله ، جاها ايهم ولدها قعد يبحت فيها .. أشرت له يجيها في حضنها
قرب ايهم منها ، كان زعلان واجد علي وضع امه ومايقدرش يعطي رأيه لحمزه كان خايف منه لأن عصبي ويلي في راسه ايصير ... اذا قال حايتزوج أمل يكون كلامه جاد وحايتنفد بدون اي تغيير
أمل فرحانه وطاير عقلها لأنها حاتتزوج من حمزه .. جوهم رجاله واجدين عشانها وقتها حست روحها وحيده مافيش حد جنبها بس زادت فرحتها بعد عدو الرجاله رن الجرس وكانت زمرد ورويدا : خيرات
أمل مسحت دموعها : حاسه روحي نحلم
رويدا تبتسم : لا ما تحلميش شنو تبي تخلينا قدام الباب ، قولي تفضلو والله عيب
أمل : معليش هيا تفضلو الحوش حوشكم
خشت زمرد ورويدا كانو حاسين بوحدتها وحزنها لذالك جوها .. العرس أيامه تقرب حمزه قرر يتزوج بسرعه والكل وافق علي قراره وتواصل مع أمل يلي طايره من الفرح
طبعا البنات عدو معاها للسوق وغيرو جوها وساعدوها ما حسسوها بوحدتها
حمزه خش علي بيان : لازم تنقلي وتعيشي تحت مع امي وباتي انتي وايهم لأني عريس مانقدرش نقعد معاهم فهمتي
بيان بقهر : تلز فيا من حوشي يعني ؟
حمزه : انتي يلي لزيتي نفسك من حياتي
لك زمان وحتي عطيت حقك لخوك يلي باعك وسيبك بروحك وما تحشم علي وجه
لذالك ما تلوميني وهيا انزلي .. خودي حاجتك كلها توا نجيب عمال ينزلو غرفتك في الدار يلي تحت ونجيب غرفه جديده نحطها في مكان غرفتك ، وباركيلي هههه
بيان خشت الدار وسكرت في وجه ، قعدت تعيط وتبكي وحالتها حاله وهو يسمع فيها
تنهد وشد علي يده بالقوه وطلع من عندها
رائد فاتح المحل متعه كان زاحم بكل ويشرو منه كلهم .. بعت لزمرد صور هواتف جديده : يا بنت انا امس حطيتك مسؤله معايا في صفحة المحل هيا ابهريني ونزلي الصور هدينا بس أدبالك تردي علي رجاله في الخاص حانرد بروحي وانتي ردي علي البنات لأن مانبيش نحكي مع حد غيرك انتي ياعمري وكل شيء فيا
زمرد ضحكت وكتبت : هههه تمام توا انزل
رائد : حانشوفو ياعمري هيا نراجي فيك
زمرد نزلت الصور في الصفحه ودارت زي ما هو طلب كل صوره عليها سعرها
بس قعد يضحك لأنها كتبت فوق الصور
لَآ تٌفُوٌتٌوٌ مًتٌجّر رآئدٍ مًشُ حًآتٌلَآقُوٌ غُيَرهّ
رائد اتصل بيها : نجيلي نا وخلاص
زمرد بخجل : نبي نقولك شيء
رائد : قولي نسمع فيكي يا بنت
زمرد : لا تعال فوق ما اطولش تمام
رائد متشوق : تمام حانسكر المحل ونجي
زمرد ابتسمت وسكرت الخط دغري
أما رائد صبا وسكر المحل .. وعلي طول عدا شور الحوش ، فتحه وركب لعندها فوق لقاها تراجي فيه : هاا شنو في
زمرد بأبتسامه حطت يدها علي بطنها وهي تبحت فيه : قول لبابا اهلا وسهلا نورت وجبتلنا حاجه حلوه او لا ؟؟
رائد فتح اعيونه عالاخر : يعني حامل
زمرد هزت راسها وهي تبحت في ملامحه
رائد دمعو عيونه قرب وحط يده علي يدها وبحت فيها : يعني حانقعد اب ويقولي بابا
زمرد بدموع : اها حاتكون أجمل اب في هالدنيا وانا فرحانه لأنك الأنسان يلي حانكمل حياتي معاه بكل حب 😭
رائد مسح دموعها بحنان وحضنها بفرحه وما طلقها بسهوله : والله طاير عقلي
الحمدلله يارب .. حانقعد أب حايكون عندنا بيبي وتكبر عيلتنا اكتر واكتر
زمرد بحتت فيه : ليش كم تبي طفل ؟
رائد بخبث : نبي 20 نصهم أولاد ونصهم بنات ونبيهم يشبهولك زيك وحال الغايه تؤم يكونو البنات .. وسميهم انتي يا حلوتي
زمرد بصدمه : حاسه روحي حاتجيني سكتة قلبيه .. حرام عليك ارحمني اشويه
ضحك رائد : نبصر معاك ولكن ما تنسيش ان مهما كان العدد انا فرحان بيه وحتي لو جبتي بنات بس انا حانكون طاير عقلي ونربيهم ويكبرو بين يدي .. ماتنسيش اني مربي خواتي ونحبهم ونرعش عليهم رعش
زمرد : ربي يحفظك لنا ومايحرمنا منك يارب .. وخشت في حضنه مره تانيه تتهرب من ابتسامته يلي تجنن فيها ديما
